第130集 ~ 米︰大結局喇!(二)

阿狗講呢句嘅同時,做咗一個不文手勢…

起初阿明同阿輝都唔明係咩,但係…

兩秒之後,佢哋你眼望我眼咁,大家似乎都諗通咗D嘢喇!

「妖,死人狗,你一早諗到又唔講出口!」





之後阿輝立即跳上阿明背脊,好似想飛上天一樣…

而阿明就裝兇作勢,好似想閃速埋去攻擊「地魔」咁…

「冇用嫁喇,你哋頭先都殺唔到我,依家力量細咗,仲點樣可以殺到我啊?」

「龍飛鳳舞!」阿明同阿輝一齊大嗌。

阿輝飛咗上天,而阿明就衝咗前去…





「哈哈哈,又係呢D下三流招式,虹吸!等我撕爛晒你哋啦!」

「你用埋虹吸就啱喇!光管陳嚟到呢度先教我哋嘅係…」

「擎,天,式!」

「咩話?」

「鳳凰火炎」同「九陽草薙」原來一早已經唔喺佢哋手…





而係去咗地下,而家兩把神劍都由下至上咁插上嚟,仲要…

(插 ~!)

中正「地魔」下陰…

「哇丫~~~~~~!」

正所謂塵世間邊個男性可以頂得住呢種痛楚丫…

「地魔」亦唔會例外…

仲同時俾兩把神劍插中下陰…

「地魔」已經再冇反抗嘅能力…





自己真身亦從「大袋」身體走返出嚟…

「大袋」肉身就訓咗喺地下,而「地魔」真身就躝吓躝吓咁…

佢原本個樣根本就已經唔係人型,只係一堆腐爛到不堪入目嘅血肉泡…

真係可以講句,世上任何一種生物外表都要比佢好睇…

佢臨死前仲要問咗一句︰—

「點解…點解我擋唔到呢劍嫁?」

大家都冇答「地魔」,只有佢出聲…





「係因為我阻咗你零點零一秒。」

大家都好錯愕,另咗去發出呢聲嘅方向一望…

見到「妖刀村正」變返做「司徒不正」,原來發聲嘅係「司徒不正」。

「點…點解你要背叛我?」

「因為你自把自為,破壞咗我未去過又好想去嘅購物天堂,香港。」

今時今日仲有冇人會話香港係「購物天堂」,我諗香港人心中有數…

所以阿明同阿輝都冇講其他,只係對住「地魔」講︰—

「哈哈哈,連你手下都背叛你喇,你仲有咩遺言啊?」





「我…我…吊!」

大家都呆咗半秒…

「咩D人咁衰嫁,臨死都仲要講粗口,教壞細路。」阿明講。

「總之一切都告一段落就好喇。」阿輝講。

「唔該晒啊,師兄,即係其實你一直都係無間道,暗中幫緊我哋呀?」

「肥龍大師」咁講,好似強行幫「司徒不正」澄清同將功補過咁呃自己。

而「司徒不正」就擺咗個懶有型嘅甫士之後就好似煙銷魂散咁走咗。





大家見現場平靜落嚟,應該所有嘢都告一段落…

所以阿欣就去叫返醒佢家姐,而阿明阿輝佢哋就想去扶起「大袋」,點知…

突然有一隻巨型蝙蝠飛到「大袋」身邊,再將佢爪起到半空…

而巨型蝙蝠到達半空之後,上身竟然變成外國貴族咁款嘅男人,仲講嘢添…

「你哋嘅戰鬥好精彩,我有睇晒,不過魔鬼之子而家就由我「德古拉伯爵」帶走喇,唔好意思,希望以後有機會見面啦。」(英文)

「佢講咩啊?」阿明問。

「係LUR脷D,仲重低音,但係係英文嚟。」阿狗答。

「德古拉伯爵」講完之後,就帶走咗「大袋」…

因為大家都已經耗盡精力,所以根本反應唔嚟去對付「德古拉伯爵」或者去追…

所以大家只能忍痛同無奈咁睇住「大袋」被帶走…

「估唔到個男仔竟然咁搶手,霧水情緣,黃大仙籤文真係準。」白百龍咁講。

「解籤先生,原來你一早就知會係咁?」欣家姐已經醒咗。

「唔好意思啊,大妹妹,當初嘅籤文係講話你有「霧水情緣」,但係一來我估唔到咁準,因為不嬲都唔準,點知今次咁準,二來我真係估唔到會「霧水」成咁嘅款。」

講完之後,欣家姐一臉惘然,冇再出聲,只係望住「大袋」被帶走嘅方向流眼淚…

「好喇,我諗我哋都唔應該諗太多喇,不如盡快離開呢度先啦!等我開個門啦,異界開門之術!」「肥龍大師」開咗道門俾大家。

大家之後就慢慢沿住條路出返去…

途中大家都打咗電話返去屋企,問吓香港究竟點樣…

「喂,我係阿明啊,你係咪阿媽呀?」

「唔係,我係你阿爸。」

「阿爸你冇事丫嘛,阿媽冇事丫嘛,大家冇事丫嘛,香港冇事丫嘛?」

「你冇事丫嘛?做咩咁緊張啊?傻仔,保護你阿媽係你阿爸我嘅責任,保護好大家都係你阿爸我嘅責任,保護好香港亦都係我呢個小市民嘅責任,你放心去玩得開心D啦,香港有老豆睇住就得喇!」

呢一刻,阿明開心到流咗眼淚出嚟,亦都知道咗「地魔」話毀滅咗香港只係吹水…



之後,大家終於行返咗去球場…

現場所有妖怪竟然向大家起立同致敬…

主角佢哋同一班同學都表示尷尬…

「我諗班妖怪應該俾地魔同鬼王佢哋害得好慘頂喇。」白百龍講。

「係呢,頭先地魔唔係話見到大嶼山咩?我仲以為返咗去香港添。」阿輝講。

「係PAKKA嘅術,一時之間,呃吓人係可以嘅。」阿明講。

「你隻二郎神走咗喇?」阿明再問。

「走咗啦,仲叫我提南龍先生記得找數添。」阿輝答。

「咁我哋而家返酒店先啦。」阿狗講。

… (返酒店)

返到酒店,發現原來「異域魔城」時間同人類世界又係唔同…

大家似乎仲趕得切正常回程時間…

所以大家嗱嗱聲就執好行裝落樓去搭預約咗嘅旅遊巴走喇…

「肥龍大師」講聲再見就離開咗大家…

「美奈子」留低打理鬼酒店…

「沙婆婆」冇咗屋企,所以帶埋「寶寶」一齊住喺鬼酒店…

而「龍也」就多咗個「寶寶」做朋友仔可以一齊玩喇…

至於「肥妹鬼」,咦,點解唔見咗嘅?

「居居」跟咗阿輝…

「洋腸」就一早有異性冇人性跟咗「彩雲」走…

「鐵拳」好彩,肉身冇事,只係「中神通」力量冇咗啫…

「黃仔」就俾人救返,要食返幾盒驚風散先定返落嚟…

「校長」冇事,不過仲要留醫,要遲D先返得香港…

到主角佢哋喇…

「阿妮,我要走喇。」阿狗講。

阿妮好似好唔捨得,含住一包眼淚咁,真係我見猶憐啊…

「其實…其實你偷偷地跟我去香港係得嫁喎。」阿狗偷偷地咁講。

阿妮諗都唔諗立即就變咗做隻小狐狸捐咗入阿狗個身度。

「小倩,我要走喇。」阿明講。

「哼,你係咪想留低我?我係鬼嚟,去邊度都唔使通行証嫁喎。」

「咦,係咩?原來係咁呀?咁就好喇,哈哈哈。」傻佬明依然係傻佬明。

「阿欣,咁我哋走囉。」阿輝講。

「好啊,仲有家姐啊。」阿欣講。

欣家姐就仲係痴痴呆呆咁跟住阿欣。

………

大家不經不覺,好快就上咗機,仲坐定定添…

點知阿欣一坐低就諗起D嘢…

「輝輝啊,我哋好似忘記咗D嘢。」

「咩啊?」阿輝問。

「紙妖,紙妖講過話「北轍」田育文喺我哋班人度,仲話佢係想害我哋嫁喎。」

「會唔會係佢講大話啊,你睇吓「黃仔」,傻吓傻吓咁,邊似係「北轍」啊?」

「但係…」

正當阿欣問緊「但係」之際,前排一個同學遞咗個水晶球俾阿欣…

阿欣揸住咗,但係未睇,反而睇住「呢個同學」…

「呢個同學」一步步行到去最前排度,而且…

又係呢兩個空姐啊!「深田恭子」同「夏惠姨」空姐啊!

「夏惠姨」遞咗支咪俾「呢個同學」…

而阿欣就望一望手上嘅水晶球…

發現…係紙妖啊!紙妖俾人困咗喺水晶球度…

阿欣立即打開水晶球,紙妖就立即飛返出嚟,仲…

「係佢喇,佢就係想害死你哋嘅「北轍」田育文喇!」