男人唔可以窮: 11
當晚，我送左以娜返屋企，以娜同我講打後幾日都會好忙，我同佢，就約定喺可勇結婚果日先見面。
打後幾日，我打左幾次比以娜，佢冇接我電話，只係比過一個訊息我報平安。
不過，我既生活一啲都冇空閒，德叔走左之後三日，甘生親自黎到德叔間房，叫左我同Gini入房開會。
甘生：「阿正，阿德大陸果邊有小小麻煩，你地都知架喇？」
我：「知道。」
甘生：「而家開始查到公司，阿德始終係半個公眾人物，所以唔想影響公司形象之下，阿德呢個部門要停一停。」
Gini：「停？」
甘生：「Gini妳放心，因為妳一直自己有一條Team，就算係幫阿德，妳都係用私人時間去做，所以查到妳既機會應該唔大，總之妳做好自己條Team，有人問妳其他嘢就全部唔知。」
Gini：「知道甘生。」
甘生：「至於阿正你果度就有小小麻煩，你職員果度係登記阿德個部門，你自己有乜嘢睇法？」
我：「如果德叔個部門真係要停，我都冇辦法，甘生，可唔可以有其他安排比我？」
甘生：「咁樣呀，就算我調你去邊度，你都要辭左職再入過黎，你用返以前個職員號碼，一樣會比人跟到，所以一定要再入職。」
我：「入過職我冇問題，但我而家手頭上既倉點安排？」
甘生：「一定要轉比其他同事，照規矩，要分返三成比幫你既同事。」
我：「咁…Gini，我轉比妳好唔好？」
Gini：「冇問題，你放心啦，果三成唔使比我，我只係幫你。」
我：「唔好，規矩係咁，妳一定要收。」
甘生：「好，咁下個星期開始搞埋手續，唔好意思阿正，麻煩到你。」
我：「唔會，我明白既。」
當晚，晚飯既時候我收到德叔由大陸打返黎既電話。
德叔：「可正，德叔呢邊好麻煩，有一段時間都返唔到香港，可勇結婚果度，你幫我同阿爸講一些唔好意思。仲有，公司果度你盡快辭職，而家你屋企咁多事我唔想再有官非惹到比你，你之前搵既錢自己搞小生意做，等德叔返黎，我再同你搵過機會，知嘛？」
德叔既電話就好似一個炸彈咁突然喺我生活入面引爆，原本我打算做返一個普通經紀，就算係靠自己呢接近一年以黎經驗再加上德叔之前既人脈，我預計自己都可以維持到接近現有既收入，阿爸既醫療費方面我亦都唔需要太擔心。但由德叔咁緊張對我吩咐黎睇，我知道件事並唔係我地之前想像中咁細，明顯，我已經冇考慮既空間。
我用我最快既速度離開呢間公司，離開呢間，令我去到人生另一個階段既公司。
走之前，同Gini既一席話，令我非常驚訝。
Gini：「正呀，後會唔知有冇期，得閒搵我食飯，仲有，幫我問候來叔。」
我：「Gini，妳識我阿爸架咩？」
Gini：「其實我阿爸同德叔，仲有同來叔都係同事，我爸爸叫阿球。」
我：「球叔係你爸爸？即係喪禮果次…」
Gini：「係，我爸爸都係癌症，爸爸而家既太太係我後母，我一向同佢都唔係好啱傾，所以，果次阿爸喪禮我只係坐親友席。」
我：「德叔一直帶住妳出身？」
Gini：「德叔個人好好，佢以前做錯過一次事，就係同來叔果次，已經唔知試過幾多次，佢飲醉左，把口都係提住果一件事，佢冇做警察之後，一直都有同我爸爸聯絡，但爸爸成日都話來叔變到好孤僻，成日唔肯見人。
有幾次德叔託爸爸想比小小錢來叔，最後爸爸都係比唔到，佢話來叔好聰明，死都唔肯要。」
我：「點解妳一直冇講？」
Gini：「德叔叫我唔好講，佢話估唔到會喺公司撞到你地兩兄弟，覺得好開心，其實由可勇入公司果日開始佢已經有留意，因為佢唔肯定所以唔方便出面住，你爆倉果次都係佢打電話比我，叫我睇住你，如果唔係，你覺得一個Team頭因為爆倉而走去樓下同個經紀仔傾計咩？」
我：「下，我以為我靚仔咋。」
Gini：「我今次講出黎，係想話比你知，德叔對我地真係好好，佢同我講，,上次同來叔第一次見返面之後，兩個人單獨果時佢應承過來叔一定會睇住你地兩兄弟，我知道佢而家自己都有麻煩，唔可以睇住你地，佢好難過，所以如果將來德叔有事，我地一定要幫佢。
我：「知道，我會同可勇講返，將來我地三個，一定要報答返德叔。」
Gini：「唔係三個，係四個。」
我：「四個？」
Gini：「詠航爸爸叫興叔，我唔知道你識唔識，但以前都係同德叔來叔佢地一隊。」
我：「佢同妳一樣，都係一直跟住德叔？」
Gini：「係，自從來叔出事，德叔又離開左之後，興叔就調左去第二個環頭，唔知點解變得好爛賭，爭落人好多錢，後來德叔出現，幫佢還左好多債，仲供詠航讀書，到詠航畢左業，就一直跟住德叔周圍做嘢。」
我：「估唔到，德叔為左我地做左咁多嘢。」
Gini：「好喇，我地後會有期，保重呀薛可正。」
離開左宏訊果一晚，我發左呆咁坐喺窗邊，喺度諗緊自己既去路。總括自己接近一年既宏訊生涯，我除左得到一筆我打幾年工都唔會搵到既錢之外，我好似冇再得到任何嘢。
同可勇既反目，阿爸既重病，令我生活上根本得唔到應有既快樂，有時候，我會好懷念以前果種返工放工，搵一份正常既月薪，有一份正常既快樂日子。
曾經我覺得，得到更多既金錢可以得到更多既快樂，而家睇黎，呢個理論根本唔成立。
以前我希望可以擁有自己既車，坐上去，我鐘意去邊就可以去邊，到今日，我坐上自己架車，我根本唔知道自己想去邊。
我失去快樂，我失去左生活樂趣，我亦失去左目標，甚至，我有可能完全失去以娜。
我到底過緊乜嘢日子？
我知道，呢種就係成長既代價。
失業既頭三日，我除左去探阿爸之外，乜嘢都冇做咁坐左喺屋企，直到第三日，我先拎起電話，用短訊向以娜講，我失業既消息，冇幾耐，以娜就比電話我。
「薛可正，做乜咁大件事？」
於是，我將德叔既事一五一十咁話佢知，以娜聽完之後，立即約我夜晚去市中心食飯。
屯門市中心既大姆指，係我同以娜一直都好鐘意去既飯堂，自從同以娜分開之後，已經好耐冇去過，今日再去，發覺原來已經裝修得好靚。
「薛可正，咁你打算點？」以娜一坐低已經再問我呢個問題，
我：「咁又唔係乜嘢大件事，果行始終做唔耐，我自己都有儲錢，阿爸果邊我可以應付一段時間，再唔係咪慢慢搵工，男人肯做，唔死得人既。」
「比返你。」以娜將我送比佢既戒指除低，然後交返比我。
我：「又做乜呀，都話生日禮物。」
以娜：「我上網睇過，呢隻戒指兩萬幾蚊，你而家失業，拎返去旁身。」
我：「唔好咁煩好冇，我都話我有錢囉，我有大把錢，好多好多錢呀好未？」
以娜：「唔好喇你拎住啦。」
我：「係我送比妳既生日禮物黎，妳尊重下我，唔好成日要比返我好冇？」
「使唔使咁惡呀？唔理你，去廁所。」以娜收返起戒指，細細力打左我手臂一下，就走左入廁所。
以娜行開左之後，我先發現佢放低左一個公文袋，我從來唔係一個正人君子，好正常地，我將佢打開左黎睇，入面放住既，竟然係一堆關於移民既文件，另外，仲有一份買賣合約，入面有一張支票，我望望合約上面既地址，
以娜屋企已經將層樓賣左。
以娜返黎，見到我正拎住佢既文件睇，好大反應咁一手搶返過去，
以娜：「薛可正，唔問人就拎人嘢睇架你？」
我：「妳真係走喇？」
以娜：「未呀，大把嘢搞，加上阿爸同阿媽都十五十六」
我：「咁妳地又賣樓？」
以娜：「好價咪賣囉，你呀，下次唔好玥拎我既嘢睇呀。」
我：「文件之嘛，關心妳先睇咋。」
以娜：「使鬼你關心！係呀，可勇結婚果度你黎接我好冇？」
我：「咁妳而家去左邊度住？」
以娜：「我姑姐度，都係屯門，置樂果邊。」
我：「咁得啦，果日我比電話妳。」
以娜：「其實而家來叔叔情況係點？」
我：「都唔確定，醫生話可以做既都已經做哂，跟住就要睇阿爸自己既意志力。」
以娜：「咁你點解唔多啲佢，仲搵我黎食飯？」
我：「我啱啱失左業，早幾日我返多左屋企佢已經問我做乜嘢咁多時間，仲問我公司係咪唔忙，我唔敢比佢知，而家咪扮下忙先。」
以娜：「薛可正，其實你怕唔怕來叔會離開你？」
我：「我唔敢諗。」
以娜垂低頭，沉思左好耐，跟住好細聲咁講左一句：
「我都係。」
男人，每到一個時間都會跳到另一個階段，跳既過程毫無先兆，難以預測，會突然間放棄上一個階段部份既習性同價值觀，我稱呢一種改變為開竅。
我係開竅得比較慢既男人，早早喺我十七歲果時，同齡朋友已經有人識返大陸拎貨再去荃灣大坡坊對面既舖仔賣，日日大賺過千蚊之餘，仲襯沙士期間賣埋樓。
而同時間，我仲只不過處於打一份牛工就打算過一世既狀態。
進入宏訊呢段經歷我會視之為開竅既過程，我放棄左以前墨守成規既性格，我開始意識到，如果我夠膽將對手向外伸出去，係有可能搵到比我打一份固定工作更多既錢。
所以今次離開宏訊，基本生活上我冇太大既憂慮，我怕既只有係阿爸所需要既醫療費我可以應付幾耐。
再去搵一份固定而普通既工，並唔係我現有既想法，順水自然要學推舟，我打算學習創業。
由細到大我都有一個諗法，我好怕去同其他人做同一樣既事，因為我覺得自己唔會夠其他人出色，我冇可能脫穎而出。
創業亦都係同一個想法，我既老本行係賣電器，但以我既財力根本冇可能由呢個起點開始，所以，我選擇左另一個我完全陌生既行業。
幾個月前，有一次陪德叔去東莞見客，認識左一位叫李總既大陸客。李總，係一個從事中港回收生意既人，由佢口中我知道，其實回收呢一門生意可以有幾搵錢。
陪德叔去東莞果幾日時間入面，我每次見到李總就會向佢請教回收呢一門生意既竅門，應該點運作，應該點分配資源，李總都同我解釋得清清楚楚。
所以當我有創業呢個念頭出現左之後，我就諗起回收呢一個行業。
最後，我首先聯絡好李總，以李總香港既公司做回收站，大家商量好合作方式，而我再開拓貨源。
其實呢一個方式每一個人都可以做，但最唔相同既係，李總既公司本來就係香港六大回收商其中一個，要有一定既貨量佢地先會去用一個比較好既價錢去收，而我，就係因為人脈而得到呢一方面既優勢，可以不限貨量，隨時都可以交到李總既公司。
基本上，如果我每一日都收到一定既貨量，只要我唔將貨放過夜，我可以話係必賺，毫無風險。
有左呢條門路，我開始去搵我第一單生意，最後，我託一位朋友，喺日本搵到我回收生意上既第一個駐腳點。
一批波子機。
八十年代，日本經濟蓬勃，大部份既垃圾都冇人肯做回收，形成到後來日本成為一個其中一個非常大既回收市場。
香港有好多廢車場會派專人去日本長駐半年，每日拆車入櫃再運返香港，再運到大陸賺錢。
而另一樣比人發現貨源極多，利潤又高既，就係已經損壞既舊式波子機。
我從來冇去過日本，亦都唔知道日本點解會有咁多波子機，後來聽朋友講，日本有好多成間都係波子機既娛樂場所，係日本男人除左居酒屋之外，另一個放工之後唔肯返屋企既流連之地。
我就由呢位朋友搭路，由福崗直接將一批又一批既舊波子機裝入貨櫃，再運到黎香港。而我就會收貨之後，搵一班兼職工人將波子機拆散，將可以賣錢既金屬同電線集合，再賣到去李總既公司。
公司開始左一星期，只係有我自己一個人工作，由聯絡到合約既事都要自己負責，每一晚都要做到好夜先可以休息，相對地，返屋企陪阿爸既時間都小左好多。
有幾次以娜打電話比我，我都因為太忙而冇覆番佢，因為從來冇試過自己去打點一門生意，令到我整個生活作息完全亂到控制唔到。
夜晚，十點幾，我留喺屋企準備第二日既提貨文件，突然間門鐘響起。
打開門，係以娜。
以娜：「你真係喺度！」
我：「做乜妳上黎唔打比我？」
以娜：「打到比你先得架，你電話冇開呀。」
我：「咦，冇電喎真係，妳搵我做乜？」
以娜：「可勇聽日就結婚，你拎左你套衫未？」
我：「拎左，喺車度，入黎先啦。」
以娜：「嘩，薛可正，你冇執屋架？喂一地都係垃圾既，有冇搞錯呀你？」
我：「我好忙呀，新公司好多嘢都未整好，第二批貨聽日就黎，仲邊有時間執屋？」
以娜：「你間嘢搞左幾日就咁多嘢要搞既？你一個人點搞公司呀？請人啦你。」
我：「啱啱先賺左第一次錢咋，請人唔使錢呀？」
以娜：「要做乜嘢架？難既我就唔識，普通計下數都可以幫你，我呢三個月都要留喺香港陪阿媽，有時間可以幫下你呀，好冇呀？」
我：「其實我都係啱啱開始，實際工作分配我自己都未諗好。」
以娜：「咁你比你既所有單我，我幫你計好佢。」
我：「咁妳自己計返人工。」
以娜：「得啦，我而家幫你計，唔該你執好自己間屋同埋準備聽日可勇結婚既嘢。」
放低需要以娜幫我計既單，我就去左停車場拎返套禮服，返到屋企行入房，換好禮服，我行出大廳。
我：「喂，點呀，啱唔啱身？」
以娜：「你度身訂造架幫我啱唔啱身，咪阻住我計啦。」
我：「妳果套呢？乜嘢色架？我搵個煲呔襯下妳丫。」
以娜：「你話架，粉紫。」
我：「我邊度黎個粉紫色煲呔呀。」
以娜：「唔知你，你自己搵，唔好嘈我。」
「我入房搵。」
返入房，我搵哂成個衣櫃，發覺，其實我只不過係得一個煲呔，而呢一個煲呔，係以娜第一年送比我既聖誕禮物。
我拎住個煲呔坐喺床，一路發呆，不知不覺間，我訓著左。
一直到天光，我比窗外面既陽光整醒左我，望一望錶，七點鐘。
我行出廳，見到以娜隻手指仲停留喺計數機上面，但個人就已經喺工作枱前訓著左，我行埋去，好細力咁拍一拍佢。
「以娜，返去換衫喇。」
以娜醒一醒：「七點喇？死我冇同媽咪講唔返架。」
我：「妳幾多歲人呀，我而家車你返去啦，妳仲要換衫。」
「行喇行喇。」
我七點十八分將以娜送到返屋企，一等，八點五十八分，先見到以娜著住一套粉紫色既長裙慢條斯理咁落返黎。
我：「喂妳上去生仔呀？」
以娜：「下？我算快架喇，點呀，我今日得唔得呀？」
我：「最靚係妳，行啦。」
以娜：「唔係喎，我個頭咁樣整得唔得？」
我：「全世界最靚係妳，唔使再諗住上返去整，上車。」
途中，以娜望望我，然後搖搖頭：
「又話粉紫色煲呔，呃我。」
我：「妳同我都訓著左，點搵個粉紫色出黎。」
以娜：「呃人。」
去到目的地，我泊好架車，行去禮堂既電梯前面，以娜叫停我，
「但喺度先薛可正。」
「快啦，遲喇，仲要幫手整其他嘢。」
以娜由手袋拎左一個粉紫色既煲呔出黎，幫我換左原先我紅色煲呔。
我：「妳買比我架？」
「當係今年聖誕禮物，唔準除呀，好！而家就襯哂我喇，行得。」
我轉身之際，見到由商場玻璃倒鏡出黎既我同以娜，感覺好開心，好幸福。
然後我有小小控制唔到自己既情況下攬住以娜，好由衷咁向佢講左一句：
「多謝妳。」
薛家，已經唔記得有幾耐冇辦喜事，
今日，大家都高高興興，將所有唔開心既事暫時忘記，一齊替可勇同埋Yoyo呢對新人高興。
阿爸阿媽一早就去到禮堂準備，阿爸因為身體始終唔好，有一段時間都留喺休息室，而阿媽呢個新奶奶，就著住佢果套好靚既旗袍周圍招呼親友。
以娜由到埗到行禮之前都一直陪住Yoyo，由去廁所到補妝，以娜都喺旁邊細心照顧，而我，就好似個自閉兒童咁一直坐埋一邊。
我唔係唔想投入，而係呢個情境太容易令人投入，望住以娜陪Yoyo走黎走去，我喺度諗，我會唔會同以娜都有呢一日？
所有既事偏偏就係眼前咁近，但感覺就好遠。
儀式開始之前，我行入廁所，喺果條好窄既走廊見到可勇啱啱由廁所走出黎。
我：「可勇。」
可勇：「哥。」
我：「大個仔喇，以後做個好爸爸同好老公。」
可勇：「我知架喇。」
我：「阿哥冇禮物比你，禮金最實際，我比左Yoyo架喇。」
可勇：「多謝哥，仲有，幫我多謝以娜姐，佢好照顧Yoyo。」
我：「使乜多謝，一家人。」
可勇：「你同以娜姐喺返埋一齊喇？」
我：「希望啦。」
「喂，可勇，快啲啦，開始架喇，薛可正你咪鬼阻住個細佬啦。」以娜由新娘房走出黎，大吵大鬧咁走埋黎拉走可勇。
我：「好喇，可勇你出去啦，順順利利！」
「行啦行啦可勇，薛可正你都快啲出返黎呀，你大伯黎架唔好唔見人。」
我行入廁所，聽見外面播出婚禮進行既音樂，果一刻突然覺得好感動又好感觸。
同我一齊長大既細佬而家要踏入人生另一個階段，未來，我地仲會唔會好似細個咁，一齊笑一齊喊，一齊去迎接生命入面每一個重要既時刻？
我洗左個面，然後急步咁走返出去，行到出去，啱啱就見到喺大門後面準備出場既Yoyo同可勇，旁邊既以娜好細心咁幫Yoyo扶好佢既裙尾，一隻手就小心翼翼咁扶住Yoyo。
可勇同Yoyo向我揮揮手，Yoyo用口形同我講「好緊張呀」，我伸出一隻姆指為佢地兩個打氣，而可勇，終於都向我再次展露返以前既笑容。
之後大門打開，佢地兩個慢慢步出，正正式式，喺親人既歡呼聲襯托之下，走入一個全新既階段。
由可勇同Yoyo行禮至到簽紙儀式完成，阿媽都係一路坐喺佢地前面不停咁喊，之前都講過，由細到大，阿爸都好討厭阿媽喊，只要阿媽一喊就會比阿爸鬧，但今次阿爸冇鬧阿媽，
因為佢仲喊得勁過阿媽。
我從來冇見過阿爸喊得咁厲害，何況係咁多人面前，雖然我知道佢呢一刻流既係開心既眼淚，但如果你當時親眼見過阿爸一路簽字一路不停喊果個情境，係冇可能唔會動容。
呢個情境，比我既感覺就好似係一個預告，一個阿爸自己已經心裡有數既預告。
簽字儀式完畢，我同可勇一齊扶阿爸落台，阿爸捉住可勇既手，將一個玉佩交比可勇：
「可勇，呢塊玉係你阿爺當年交比你阿媽，而家阿爸交比你，你同Yoyo好好保管佢。」
可勇：「多謝阿爸，但點解斷左得一半既？」
阿爸：「阿媽果時大懵，拎出黎清潔果時跌爛左，你就幫阿爸好好保管落去，記得，一代一代咁傳落去。」
可勇：「爸我知架喇，我扶你入去休息下。」
「好好。」
整個婚禮完結，可勇先送阿爸同阿媽返屋企，而我，就自己一個走左去海傍，一個人漫無目的咁周圍行。
點知以娜喺我後面跟住我，一句說話都冇講，只係一路咁跟住我，直到我打算折返拎車走，我先見到以娜喺我身後唔遠既地方。
我：「妳點解會喺度既？妳唔係幫Yoyo還禮服咩？」
「阿栽去左還，我知道你唔開心，怕你有事所以跟住你。」以娜搖搖頭，
我：「妳又知我唔開心？」
「來叔叔今日…..我都唔知點講。」以娜兩隻眼開始漸紅，我知道佢開始想喊。
我：「妳又話我唔開心，點解會係妳喊架。」
「來叔叔….頭先喺休息室拉住我，不停咁話叫我照顧你，一路….講，佢就一路喊，我都…唔知點算好….」
以娜邊講邊伸出右手，我望一望，佢手上面拎住既，係阿爸比可勇果塊玉既另外一半。
「係阿爸比妳架？」
「係。」以娜好用力咁點頭，
我拎塊玉，面對阿爸無聲既叮嚀，到底我應該點做？以娜之前已經好明確咁話比我知佢而家既諗法，我唔想一而再再而三咁強逼佢，但我估唔到阿爸會將呢塊玉交比以娜。
「以娜，…我…」
以娜：「薛可正，我知你想講乜嘢，上次我已經同你講得好清楚我點諗。」
我：「我唔係咁既意思，我只係想講妳可唔可以喺走之前，多啲見下阿爸？」
以娜：「我會，不過你唔好同來叔叔講任何嘢，就好似而家咁，順其自然，好嘛？」
我：「好，走喇，我車妳返去。」
之後既日子，以娜照舊會幫我打理公司既財政，當我有時短暫上大陸公幹既時候，,以娜就會返屋企幫我陪阿爸阿媽食飯。
日子就係咁一日一日咁過，公司既生意已經穩定，我仲開始有一班幫我拆機既工人團隊，財政上已經唔會有任何困難。
喺可勇同Yoyo結婚之後既兩個月，終於知道Yoyo肚入面既小朋友係仔，一家人都非常之開心，特別係阿爸，每日都會提住幫個小朋友改乜嘢名，而阿媽就有一日打電話比我。」
「可正呀，阿媽有小小嘢同你商量。」
我：「媽妳講。」
阿媽：「Yoyo個肚都好快生，我同阿爸想話用多小小屋企既地方，幫第時個孫整個房，所以…」
我：「妳地想用我間房？」
阿媽：「嗯，你會唔會唔鐘意呀？」
我：「傻啦媽，我差唔多三十歲人喇，我冇住屋企咁耐仲霸住個地方我自己都唔好意思，同埋我而家呢度住得好好，如果業主肯賣，我都想買左而家住呢度，妳地去整間房啦，過幾日我過黎執埋我既嘢走。」
阿媽：「可正呀，阿媽好似趕你走咁。」
我：「媽呀，唔好亂講嘢，我過兩日返黎陪妳地食飯。」
阿媽：「你最好返多啲黎呀。」
我：「點解？」
阿媽：「你阿爸呢排去廁所成日都好耐，問佢乜嘢事佢又唔講，次次去完廁所都話洗廁所，神神化化，我怕佢有唔舒服唔同我地講呀。」
第二晚，我因為阿媽既說話而提早左一日返屋企，返到去，見到阿爸無神無氣咁坐左喺度，我只不過係兩日冇見佢，但感覺佢已經瘦左好多。
「阿爸。」
阿爸：「可正，以娜呢？」
我：「佢陪佢媽咪，點呀爸你？呢兩日有冇唔舒服？」
阿爸：「冇呀，準時食藥，冇大問題丫。」
「可正，你返黎喇？」阿媽由廚房走出黎。
「係呀，未開飯我返房執好我自己既嘢先。」
「好呀，開飯叫你。」
我行返入房，離開左呢個房幾個月，其實已經冇太多物件係屬於我，剩底既，都只係床下底一箱我自己收好既紀念品。
千辛萬苦，我將呢一箱已經放左落床底一段時間既紀念品拎出黎，打開，入面有好多都係我由細到大，朋友或者係女朋友送比我既禮物，仁愛堂劉皇發小學既合照、田家炳中學既校刊，細個喺友愛邨踢賀歲盃既獎牌，仲有以娜送比我既情人咭。
以前當係普通禮物既一張咭，今日，唔知點解我會隆而重之咁打開佢黎睇，稚氣既文筆之下寫既都係一般男男女女既情話，唔知點解今日睇返特別開心。
突然之間，好想打一個電話比以娜。
拎起電話，打比以娜，唔知點解佢好快就收左我線，打多一次，結果都係一樣。
正當我奇怪之際，以娜打返電話比我。
「薛可正，以妮話以信今朝突然透唔到氣，而家又入左醫院，我要同媽咪即刻返英國呀。」