《我老婆教我追女仔》: 第十七章
某個星期六，我和Fiona看完戲後在咖啡店裏吃著下午茶。
「係呢，你暑假有咩做呀?」Fiona吃了一口蛋糕問我。
我苦笑道﹕「我搵到暑期工呀，我下個星期一要開始返工啦......」
Fiona有點失望﹕「係呀......」然後續道﹕「有個鋼琴家嚟咗香港表演，我仲諗住問你有無興趣一齊去睇......」
鋼琴?不要吧?我怕我睡到打鼾令你出醜啊！
我裝作失望道﹕「如果係夜晚嘅話就唔得啦，我返中午十二點到夜晚九點。」
Fiona瞄了我一眼﹕「咁無辦法啦，我搵第二個同我去睇啦。」
找誰?不會是Gary吧?
不過以我的身份卻不能過問甚麼，於是我道﹕「你可以搵Mandy陪你呀。」
Fiona鼓著腮﹕「次次搵佢都唔得閒，都唔知佢搞乜鬼?」
不會是跟Roy約會吧?
我道﹕「咁咪搵嘉寶囉，家姐叫到無理由唔陪你嘅。」
Fiona嘆了口氣﹕「佢呀?佢對呢啲無乜興趣。」頓了頓又道﹕「你知唔知小惠對呢啲有無興趣呀?」
我搖搖頭﹕「我都唔知呀，你問吓佢囉。」找小惠去當然比Gary好得多，但你找得到她再說吧。
「係喎，Gary問我係咪去英國玩喎，呀Sam你去唔去呀?」Fiona一臉期待的問我。
我肯定的道﹕「去！點解唔去呀?」我這麼辛苦去補習找暑期工就是為了和Fiona去英國，我絕對不能讓他倆獨自去旅行！
Fiona滿心歡喜道﹕「係?咁我confirm佢囉喎，我哋諗住八月頭去。」
「ok，無問題。」我自信滿滿的道。
「媽咪，我諗住八月頭同朋友去旅行呀。」我在吃晚飯時跟媽說。
「去邊度旅行呀?」
「英國。」
媽看了我一眼道﹕「英國?你發咗達呀?」
「我諗住用我暑期工啲錢去呀。」
媽頓了一頓，道﹕「鋒，你唔係唔知你老豆做地盤散工，收入唔穩定㗎啦，佢今個月又開少咗工啦，不如你留返啲錢下年交學費啦。」
我也明白家裏是甚麼狀況，但這是難得可以和Fiona去旅行的機會，而且還要杜絕Gary跟Fiona獨處的機會，我決不能白白的看著他們暢遊英國。
於是我道﹕「媽咪，但係我.....」
我還沒說完，媽已經關了對話窗框﹕「仔，你第時出嚟做嘢搵到錢，你去邊度呀媽都唔會理你，但你而家搵埋搵埋都唔夠你自己駛啦，你諗吓下年又要交學費，你又要去住宿舍，邊有咁多錢呀?話就話可以問政府借啫，但借咗又係要還，呀媽都係唔想你一畢業就孭到成身債咋。你而家借少啲，第時咪可以還少啲囉。」
這些道理我當然明白，但是Fiona......唉......若我老實交代是因為追女仔要去英國的話，就更加沒戲唱了。看來這個英國之旅要泡湯了，還要眼白白看著Gary和Fiona......
我洩了氣，默默的吃完了飯就回房了。
正當我想著怎樣跟Fiona解釋時，她剛好發訊息給我。
「Sam，我搵到人陪我去睇鋼琴show啦?」
我臉色一沉，心想不會是Gary吧?
「哦係呀，咁咪好囉！係咪你個妹肯同你去呀?」
「唔係呀！佢都無興趣。係小惠肯陪我睇呀！」
小惠?她回來了嗎?不是說開學見嗎?還是已經回來了卻沒有找我?
「係呀?你幾時搵佢㗎?」
「啱啱囉，我哋下個星期四去睇呀」
剛剛?
我馬上whatsapp小惠。
「小惠，你返咗嚟呀?」
過了好一會兒，才收到她的回覆﹕「嗯」
我呼了一口氣，還好她還肯回覆我。
要不要約她吃個飯呢?嗯......還是順其自然吧。現在還是去英國旅行這件事更重要，先問問她的意見吧！
「之前咪同你講過Fiona會喺暑假去英國嘅，咁嗰個Gary都會去嘛。咁本來我都打算去嘅，但係因為有啲問題，我而家去唔到，點算呀?」
「咩問題呀?」
「錢......呀媽想我留返啲錢交學費......」
「嗯...其實呢方面我可以幫你嘅」
「你借比我呀?我有排先還到比你喎」
「唔係借，唔駛你還」
甚麼?有借無還?世上還有這樣的事嗎?
雖然很吸引，但花小惠的錢總覺得有點兒那個。而且花自己老婆的錢去追求另一個女人，這樣的事我也做不出來。
「唔好喇......我唔想因為咁樣用你啲錢」
過了好一會兒，才收到她的回覆﹕「咁你個Fiona就要同第二個男人去旅行囉喎」
我心痛一痛，回覆道﹕「咁都無辦法㗎...不過佢哋又唔會同房，應該無嘢嘅」我當然是自己騙自己，就算他倆真的沒有事發生，這段時間也足夠讓我抓狂了！
過了好一會兒，還沒有收到小惠回覆，於是我開始想想怎樣跟Fiona解釋。
還是實話實說吧，Fiona應該不會怪我的。
於是我拿起電話打給Fiona。
嘟...嘟嘟......嘟...
「喂？呀Sam？咁啱嘅，我正想打比你喎。」
「哦？咩事呀？」
Fiona笑道﹕「你搵我先嘅，你講先啦。」
我有點緊張﹕「係...係咁嘅，我想話...我諗我唔可以同你去英國旅行啦......」
「吓？點解呀？」Fiona十分驚訝。
「屋企有啲情況，我啲錢要留返下年交學費，所以去唔到啦......」
「噢...係呀......咁...咁無辦法啦......」Fiona的語氣十分失望。
我說出了我非常不想說的話﹕「你...你同Gary...去英國玩得開心啲啦......」
這時候Fiona說了一個讓我十分驚詫的消息﹕「我正想話你知，唔係剩係我同Gary去......」甚麼？還有誰？
只聽得Fiona續道﹕「頭先小惠打比我，佢話佢都想去，所以我預埋佢啦。」
小惠？她是因為知道我去不了，又知道我不想Fiona和Gary兩個人去旅行，所以故意要跟著去嗎？
我轉悲為喜，愉快道﹕「哦好呀！有小惠陪住你，坐車搭船都唔會悶啦，佢咁多嘢講！」
Fiona笑道﹕「係呀。」然後又有點失落﹕「可惜你唔去啦......」
因為小惠會和他們一起去，我已經完全放心下來，所以我愉快道﹕「唔緊要啦，下次我一定同你去。」
Fiona道﹕「嗯，咁好啦。」
掛上了電話，我馬上想多謝小惠，於是我馬上發了個訊息給她。
「小惠，多謝你呀！」
「嗯？你知道啦？」
「啱啱Fiona話咗比我知......我都唔知講咩好，總之多謝你啦！」
「小事啫，況且我都想去吓旅行」
「點都要多謝你，一係咁呀，你邊個夜晚得閒呀？我請你食放題呀！」不知為何，我有點掛念小惠，想見見她，是因為太久沒見嗎？
這次等了很久，才收到她的回覆﹕「真係唔駛啦，係我自己想去旅行啫」
還是不想見我嗎？
我心裏有點失落。
「一係咁啦，你去到英國見到有嘢鐘意就買咗佢，返到嚟我比返錢你，當係我送比你啦，好唔好？」
「嗯，好啦」
之後整個六、七月我都忙於上班，當然間中會跟Fiona約會，聽她趣味央然的計劃著行程。
轉眼來到了八月，今天是他們出發的日子。
「你哋玩得開心啲啦！」今天我要上班，所以沒去機場送他們。於是我乘他們上機前發訊息給Fiona。
「byebye~我哋上機啦~」
「byebye~記得買手信喎XD」
「知道啦?」
我呼了一口氣，有小惠跟著，Gary應該沒有可乘之機吧！
********************************************************************************************************************
「點都要多謝你，一係咁呀，你邊個夜晚得閒呀？我請你食放題呀！」看著呀鋒傳來的訊息，我猶豫起來。
我逗著小白﹕「小白呀，好唔好同呀鋒見面呀?我哋成個月無見，我好掛住佢呀......」
小白「喵」一聲跳了過去跟金仔扭打，這是甚麼意思?
要跟他見面嗎？已經過了差不多一個月，他應該忘了那件事吧？嗯......還是再等一下吧，我還沒有心理準備見他。
「真係唔駛啦，係我自己想去旅行啫」
「一係咁啦，你去到英國見到有嘢鐘意就買咗佢，返到嚟我比返錢你，當係我送比你啦，好唔好？」
「嗯，好啦」
我放下電話，呼了一口氣。
希望呀鋒快點忘了那件事吧......
轉眼來到出發的日子，已經三個月沒見過呀鋒，沒聽過他的聲音了，我卻越來越想他。
間中從Fiona口中得知他的近況，看來他跟Fiona的關係越來越好，我是應該開心吧？但我的心像被千萬塊石頭壓著一樣......
「小惠，上機啦~」Fiona愉快道。
「嗯！好呀！」我笑道，有點強顏歡笑。
我想起這次旅行的目的，是幫呀鋒阻撓Gary接近Fiona，於是我打起精神。
我見Gary搶在我前頭坐在Fiona旁邊，於是馬上嗔道﹕「我要坐中間，我要同Fiona坐。」
Gary無奈的看了看Fiona，非常紳士的將坐位讓給我。我老實不客氣的坐下，馬上跟Fiona喁喁細語。我眼角瞄到Gary一臉忿忿不平的模樣，心裏暗暗好笑。
整個航程除了吃飯睡覺，我一直纏著Fiona聊東聊西，令到Gary一直沒機會跟Fiona單獨相對。
嘿！Gary一定恨死我了吧！
「呀！攰死啦！」我將行李丟在房間一角，就在房中唯一的雙人床上大字形躺下來。
Fiona見狀笑道﹕「哈！小惠你平時都係咁㗎?」
我看著Fiona，笑道﹕「你都試下攤喺張床度呀！好free好舒服㗎！」
Fiona疑惑的看了看我，然後慢慢的脫下鞋子，學我一樣伸長手腳躺在床上。
我笑道﹕「係咪好舒服呀?喺屋企邊有咁大張床比你大字形攤喺度喎。」
Fiona笑道﹕「係喎，搞到我而家好眼瞓添......」說罷閉上了眼。
咕...嚕......咕嚕......我肚子餓得響了起來。
Fiona哈哈大笑﹕「瞓覺之前我哋去食左晚飯先啦。」
我馬上站起來，拉起Fiona﹕「快啲去啦！我好肚餓呀！」
正當我們準備出門時，敲門聲響起了。
我打開門，只見Gary帥氣的站在門外。無可否認，他外表的確比呀鋒好看。
「我哋去食飯未呀?我知道有間餐廳啲牛扒好好食喎，個環境又有情調。」
Fiona答道﹕「我無所......」
Fiona還沒說完，我就搶著道﹕「牛肉好毒呀！唔好唔好。我帶你哋去個地方呀，嗰度可以睇到個好靚嘅夜景㗎！」然後我已經挽著Fiona的手臂離開。
我們先去了快餐店隨便買了一些輕食，然後我就帶他們到了市政廳，一處可以看到倫敦塔橋的地方坐下。
「我哋今晚就係食呢啲呀?」Gary看了看手上的外賣袋，有點不滿道。
我淡淡然道﹕「喺香港有咩好嘢食唔到呀?難得嚟到倫敦緊係要食呢度個靚景啦！」我轉過頭向Fiona道﹕「呵！Fiona。」
Fiona好像沒有在意我們說些甚麼，只是凝望著不遠處的倫敦塔橋。
她拉著我的手道﹕「小惠，你睇吓，條橋好靚呀！」
我也不禁被眼前的美景吸引著，夜幕下的倫敦塔橋果然特別迷人。
Fiona突然驚叫﹕「嘩嘩！條橋喺中間打開咗呀！」
「嘩！係喎係喎！」我馬上拿起相機，把握機會拍了好幾張照片。
我轉過身去，將相機塞到Gary手中，道﹕「快啲過黎幫我哋影相吖！」
「Fiona，我哋影相囉！」
Fiona殷然笑道﹕「好呀。」
我們以塔橋做背景，拍了很多張不同姿勢的合照。
好一會兒，Gary尷尷尬尬道﹕「小惠，你可唔可以幫我同Fiona影張合照呀?」
我決絕的道﹕「唔可以！」
看著Gary錯愕的表情，我「咭」的一聲笑了出來，狡黠道﹕「講吓笑咋！攞個相機嚟啦。」
Gary尷尬的笑了笑，然後將他的相機遞給我。
我見Gary的手搭著Fiona的肩膊，於是我道﹕「Gary你隻手唔好搭住Fiona，咁樣會遮住後面個景呀。」
Gary既尷尬又失望的將手慢慢放下，然後無奈的看著鏡頭。
我暗自得意的笑道﹕「係喇，咁就影到哂個景喇，準備啦。」我見Gary還是無奈的看著我，於是放下相機道﹕「Gary你笑吓得唔得呀?而家同Fiona影相好委屈你咩?」
Fiona聞言看了看Gary，Gary連忙搖頭道﹕「唔...唔係呀......」然後馬上擠出僵硬的笑容。
我忍著笑道﹕「準備啦，一、二、三」
咔喳~
「影完啦，比返你。」我將相機拋回給Gary。
Gary接過相機看了看，有點不好意思道﹕「小...小惠呀，呢張有啲朦呀...可唔可以影多張呀?......」
我裝模作樣的看了看，然後抱歉道﹕「咦係喎！唔好意思吖，再影過再影過。」然後又接過相機。
咔喳~咔喳~咔喳~
又拍了好幾張，當然沒有一張是好的，不是對焦不準，就是曝光不足。
Gary臉色很難看﹕「小...小惠呀......無...無張清喎......」
我裝出一臉無辜﹕「無辦法啦，以我咁高超嘅攝影技術，係咁上下啦，咪咁高要求啦。」轉個頭向Fiona道﹕「我地行去條橋度囉~」然後拉走了Fiona。
第二朝一早，我們吃過早餐後，先到白金漢宮參觀御林軍交接儀式，然後又到大笨鐘拍照留念。吃過午飯，我們到了Camden Town閒逛。
「Fiona，呢度好多嘢賣呀！」我拉著Fiona走進那些店舖。
「係喎！」Fiona走進一間賣二手衣物的店舖跓足觀看。
「小惠你睇吓！呢件外套靚唔靚呀?」她拿起了一件男裝開胸外套。
我看了看，這件外套設計簡單，甚具英倫風，是買給呀鋒嗎?
我試探道﹕「幾好吖！但係呢件男裝嚟喎。」
Fiona臉紅道﹕「我...我諗住買比呀Sam做手信，小惠你知唔知佢著咩size呀?」
果然是買給呀鋒的。
我搖搖頭﹕「我唔知呀。」
Fiona正不知怎樣做，剛好看見走近的Gary，喜道﹕「Gary你過一過嚟吖！」
Gary聞言馬上走過來﹕「嗯?」
Fiona笑著將手上的外套遞給他﹕「你試吓呢件衫啱唔啱著吖。」
Gary受寵若驚﹕「好...好呀！」然後馬上將外套穿上，然後靦腆的問道﹕「好唔好睇呀?」
Fiona笑著點點頭﹕「好睇呀！」
Gary臉紅紅的脫下外套交回給Fiona，Fiona馬上就付款買下。
我看見Gary的神情，他大概以為Fiona是買給他吧。不知道他回香港見到呀鋒穿上時是甚麼感受。
我挽著Fiona的手走進一間賣古董飾物的店舖，突然之間Fiona叫著我的名字。
Fiona指著一枚手錶﹕「小惠小惠！你睇吓！」
她拿起這枚手錶遞給我，道﹕「呢隻錶個款同你戴緊嗰隻好似喎！」
「係喎。」這枚手錶設計簡約古樸，心想送給某人剛好。
我將它并在我的手錶旁邊，發現它倆看起來像是一對情侶錶......
想到了「情侶錶」，我不禁的臉上一紅。我連忙摔開念頭，然後拿錢準備付款。
Fiona看著我，道﹕「小惠你買呢隻錶呀?男裝嚟喎。」
我忙道﹕「咁...咁呢隻錶襯我呀嘛，男裝我都可以戴㗎！」
Fiona點點頭，沒有再說甚麼。
之後我們在一間咖啡店吃了一會下午茶，又繼續閒逛。
我走到一間賣飾物的店舖，被一枚很特別的鍍金指環吸引了目光。這枚指環上有兩隻小鳥，兩隻小鳥中間有一個鳥巢，鳥巢裏看來應該鑲有一顆很小的寶石的，但現在卻空空如也。這時候老闆見我對這枚指環很有興趣的樣子，走過來跟我說了指環背後的故事﹕「有一個女孩愛上了一個男孩，她花盡心思想要接近男孩，終於成為了他的朋友。但與此同時，男孩卻愛上另一個女孩。因為這個女孩太愛這個男孩了，希望男孩可以得到幸福，於是主動幫他想辦法去追求那個女孩。而這隻象徵幸福的指環，就是女孩交給男孩，讓他去送給他所愛的女孩的。」
我問老闆﹕「然後呢?那個女孩之後怎麼了?」
老闆搖搖頭道﹕「沒有然後了，沒有人知道那個女孩去了哪裏，也不知道為何這隻介指缺了鳥巢裏的珍珠。」
原來鳥巢裏的是珍珠。
我看著小小的指環，想起呀鋒說要送我一樣東西，就這個好了。於是我付了錢，讓老闆寫了收據給我，就拿著載著指環的小盒子離開了。
回到酒店房間，Fiona走過來坐在床邊，優雅的伸了一個懶腰道﹕「行咗成日，攰死人啦......」
看著Fiona這個美人慵懶的姿態，連我這個女的也被她深深吸引著，怪不得呀鋒這麼喜歡她了。
我忍不住道﹕「Fiona呀，點解你可以咁靚㗎?」
Fiona噗哧一笑﹕「小惠你講咩呀?你咪仲靚過我。」
我臉一紅，難為情道﹕「邊係啫?你靚啲！不知有幾多人鐘意你。」
Fiona俏臉一紅﹕「邊...邊係喎......我邊有人鐘意啫......」
我古惑的道﹕「遠嘅唔講呀，我估嗰個Gary對你都有意思啦！」
Fiona滿臉通紅﹕「邊...邊係喎！我當佢係朋友咋......」
我聳聳肩﹕「你當佢係朋友啫，但人哋唔係呀嘛！」我頓了頓，又道﹕「如果唔係對你有意思，又點會成日約你一齊睇啲展覧聽Concert，仲要同你去旅行啫?又唔見佢約我?」
我瞄了她一眼，又道﹕「不過如果你對人哋無意思，就最好同人講清楚啦，費事拖住人嘛。」
Fiona難為情道﹕「點...點講啫？人哋又無話鐘意我......」
「係就係，不過平時可以避忌吓囉。」我想了想道﹕「譬如頭先晏晝咁吖，你叫Gary幫手試外套，太容易令人誤會啦！Gary個樣都不知幾開心，我諗佢係以為你想送比佢囉。」
Fiona有點驚訝﹕「吓?唔會啩?」然後默默低下頭，不知道在想甚麼。
我倆良久沒有再說話。
我懶洋洋地躺著，睡意快要來訪之際，Fiona突然問我﹕「小惠呀，你...你其實係咪鐘意呀Sam呀？」
我給她嚇得差點跳起來，連忙坐起，結結巴巴的道﹕「唔...唔係呀......我...我唔係鐘意佢呀！」
Fiona目光灼灼的凝視著我，道﹕「小惠你咁緊張，即係係啦！」
我受不了她的目光，不斷迴避著﹕「都話唔係囉！我點會鐘意佢喎！」
Fiona搖搖頭﹕「你唔駛呃我啦，你平時望呀Sam嘅眼神已經出賣咗你......」
甚麼？我平時是怎樣看他的？如果Fiona也看得出來的話，那麼呀鋒他......
想到這裏，我的臉在發燒。
Fiona續道﹕「而且我有一晚見到你同呀Sam練舞......」
Fiona還看到那天晚上的事？那麼她也看到......
我面紅耳赤，雙手亂搖道﹕「Fiona，你...你誤會啦，嗰...嗰日係意外嚟㗎......」
Fiona沒有在這個話題糾纏下去，她又問﹕「你今日買嗰隻錶...係咪送比呀Sam㗎?」
我不知所措﹕「我...我......」
Fiona沒有繼續逼迫我，只是低著頭喃喃自語﹕「小惠，其實我......」
她突然抬起頭看著我，滿臉通紅道﹕「其實我都鐘意呀Sam！」
我給她嚇得張大了口，反應不過來。雖然說我早看出了Fiona已經喜歡上呀鋒，但沒想到她會這麼直接跟我說出來。
Fiona語氣堅定又重覆一遍﹕「我鐘意呀Sam！」然後又嘆了一口氣道﹕「所以我先至咁在意小惠你係咪都鐘意佢，因為你係我好朋友，我唔想因為咁，而令到我無咗一個好朋友......」
我有點感動，沒想到她看出我喜歡呀鋒後，仍然當我是好朋友。我擁抱著她柔聲道﹕「放心啦Fiona，我唔會同你爭㗎。」
Fiona離開我的懷抱，愕然的看著我﹕「但係...你唔係鐘意呀Sam咩?」
我苦笑著，心想﹕『但佢鐘意嗰個係你呀。』於是我搖搖頭道﹕「我就嚟要走啦，所以鐘唔鐘意都無咩關係喇......」
Fiona訝道﹕「你要去邊呀?」
我隨便編了個理由﹕「屋企人要我返去美國讀書......」
Fiona沉默了片刻，道﹕「咁你唔諗住喺走之前同呀Sam講清楚咩?可能佢都......」
Fiona你是太善良了吧?怎麼會鼓勵情敵向自己喜歡的人表白?
我搖搖頭道﹕「唔會啦，我知道佢唔鐘意我......」我頓了頓，黯然道﹕「費事講咗出嚟，之後連表兄妹都做唔到......」
Fiona低下頭，語帶哭音道﹕「小惠...我覺得自己好衰，我好似......喺你度搶走呀Sam咁......」
我給她弄得哭笑不得，輕輕摟著她的胳膊，安慰她道﹕「傻啦，呢啲嘢邊有得搶㗎，如果佢係鐘意我嘅，你點都搶唔走㗎，係咪?」
Fiona淚眼汪汪的看著我，哽咽道﹕「無論以後......點樣都好，小惠你......都係我好朋友！」
我被她感動得熱淚盈眶，說不出話來，只能緊緊的擁抱她。
待情緒稍稍冷靜下來，我抹掉掛在眼眶的淚水，在Fiona耳邊輕輕道﹕「你同表哥一定會係好幸福嘅一對......我會祝福你哋㗎！」
Fiona滿臉緋紅的推開我﹕「我...我哋都未係......」
我微笑道﹕「你咁好，表哥點會唔鐘意你呀?」
Fiona紅透耳根道﹕「我...我唔同你講啦......我去沖涼...」說罷逃進了浴室。
我看著浴室的方向，心想大概只有Fiona這麼完美的女孩，才能令呀鋒得到幸福吧！看來回到香港後，要盡快找個時機讓呀鋒跟Fiona表白才行，免得夜長夢多。
但想到快要離開呀鋒，心又緊緊抽搐起來。但如果呀鋒能夠幸福快樂，這些痛苦，又算得了甚麼?
接下來的幾天，我們走遍了倫敦各大小博物館和美術館。有Gary這個人肉導賞器在，確實讓我增進了不少知識。若果Fiona不是喜歡了呀鋒的話，Gary確是一個很好的選擇。不過經我那晚跟她一說之後，Fiona明顯的刻意跟Gary保持著距離。看著Gary滿臉失落的樣子，我不禁替他感到可憐。
今天晚上就要回香港了，我們打算將最後一天都花在大英博物館裏，也是Fiona最期待的地方。
「小惠！快啲起身啦！我哋今日要去大英博物館呀！」Fiona興奮的聲音在我耳邊響起。
我睡眼惺忪的張開眼，慢慢的坐起來，感到頭暈暈的，整個房間好像在天旋地轉。
我手捂著頭，想要站起來。但腳下浮浮的又跌坐在床上。
Fiona見狀馬上走過來問﹕「小惠你無嘢呀嘛?」
我聲音有點虛弱﹕「我...有啲頭暈......」
Fiona摸了摸我的額頭道﹕「好㷫喎，可能係發燒呀！」
我再次躺在床上，然後聽到窸窸窣窣的聲音。
沒多久，Fiona扶起我道﹕「好彩我有帶藥嚟，小惠你快啲食咗啲退燒藥先啦。」然後將藥和水遞給我。
我吃過藥後，再次躺在床上。Fiona道﹕「今日都係唔好出去啦，你留喺度休息啦。」
我點點道﹕「嗯，你同Gary兩個去啦，我自己喺度瞓覺得喇。」
Fiona道﹕「唔得！萬一你有咩事點算呀?我留喺度照顧你啦！」
我微笑道﹕「唔駛啦?你哋去博物館啦，我喺度瞓吓覺好快就冇事㗎喇。」
Fiona急道﹕「但...但係......」
我撐著坐起來﹕「唔駛但係啦，今晚我哋要返香港啦，你而家唔去睇就無得睇啦。」
Fiona還在猶豫，我只好伸手推一推她：「去啦，你再留喺度我瞓唔著㗎喇。」
Fiona無奈的站起來道﹕「咁...咁你好好咁休息吓啦......」然後一臉擔心的離開。
我重新躺在床上，沒多久藥力發作，我就迷迷糊糊的睡著了。
突然感到額頭傳來一陣冰涼，我半張開眼，發現Fiona正擔憂的看著我。
「嗯?返嚟啦?幾點呀?我哋夠鐘去機場未呀?」我掙扎著想坐起來。
Fiona見我想坐起來，連忙拿走我額上的冰袋，道﹕「你瞓返低啦，唔駛起身呀！而家十一點咋！」說罷將我按回在床上。
我又重新躺著，訝道﹕「咦?點解你喺度嘅?你唔係同Gary去左博物館咩?」
Fiona道﹕「我哋係去睇咗一陣，但我諗吓諗吓都係返嚟睇住你。」
我央求道﹕「真係唔駛理我㗎，你哋去啦。」
Fiona搖搖頭﹕「唔啦，去到又擔心你，都無心機睇，不如留喺度陪你啦。」然後又道﹕「你肚唔肚餓呀?我叫咗room service，我去問吓整好未先。」說罷拿起房間的電話打給櫃台找服務生。
我心裏感激著Fiona，沒想到她會放棄一直想參觀的大英博物館，選擇留在這裏照顧我。
吃過午飯後，我又沉沉睡去。
醒來時已經到了晚上，我坐起來，精神好了不少。
Fiona見我醒來，放下手上的書本問道﹕「小惠，你見點呀?」
我笑道﹕「好返好多啦，我好肚餓呀，出去食飯囉。」
Fiona微笑道﹕「嗯，好呀。」
吃過晚飯，回到酒店收拾行李後，我們便乘車到機場。
在離境大堂，我跟Gary說﹕「Sorry呀，累到你都去唔到博物館。」
Gary聳聳肩道﹕「傻啦，你病咗嘛，你都唔想㗎。反正我又唔係同你地一齊返去，我喺度留多日，聽日去睇完先去法國都得㗎。」
Fiona道﹕「差唔多啦，我哋入閘啦。」
Gary依依不捨的看著Fiona﹕「哦...咁你哋小心啲啦......」
Fiona微笑道﹕「拜拜，開學見啦。」
我們跟Gary揮手道別，手挽手的離開倫敦。
********************************************************************************************************************
Fiona和小惠應該昨天已經回來了吧，待會要打個電話找找她們嗎?
「哎呀！」我不小心碰到貨架，手上的價錢牌都丟到地上了。
東哥笑駡﹕「喂！死仔！做嘢就專心啲啦，成日喺度發夢！」
我現在在九龍灣一間連鎖電器店做暑期工，東哥是店裏的經理，為人很平易近人。
我尷尬道﹕「哦...知道......」我連忙撿起滿地的價錢牌。
Carol笑道﹕「睇佢個樣肯定係諗緊女仔啦！」Carol是一個身形胖胖的已婚女人，年紀只比我大幾年。
我紅都面哂﹕「唔...唔係呀......」
東哥笑道﹕「女人係要諗，不過唔係而家，唔該放咗工先。」
我難為情應道﹕「哦......」
東哥身旁的呀柏突然輕聲道﹕「喂！東哥，靚女呀！」呀柏是電腦sales，年紀也只比我大幾年。
我因為正蹲著撿價錢牌，視線都被貨架擋著了。
只聽得東哥道﹕「小姐你好呀！想睇啲咩產品呀?我哋可以介紹返喎！」語氣異常地殷勤。
「唔...唔該，我...我想問Samuel喺唔喺度呀?」一把甜美的聲音傳來。
嗯?聲音好像很熟稔。
東哥喊道﹕「Samuel，搵你呀！」
我站起來一看，只見Fiona悄生生的站在不遠處。
「Fi...Fiona?你...你點會喺度嘅?」雖然我有跟她說過在這裏工作，但沒想到她會來探望我。
Fiona靦腆道﹕「我...我諗住嚟搵你食飯囉。你到食飯時間未呀?」
我搔著頭道﹕「未呀，仲有成個鐘喎......」
東哥的聲音突然響起﹕「有靚女專登嚟搵你都仲要人等?去食飯啦你！唔好食咁耐呀，食多半個鐘好啦！」
我喜道﹕「哦...係...係！」然後放下手上的東西，與Fiona並肩離開店舖。
在附近的餐廳裏，我跟Fiona對坐著。
「送比你㗎！」Fiona將手上的紙袋遞給我
我喜道﹕「手信嚟㗎?咩嚟㗎?」
Fiona微笑道﹕「你攞出嚟睇吓咪知囉。」
我從紙袋拿出了一件衣服，原來是一件外套。
「你試吓啱唔啱著?」
我穿上身，發現尺吋剛剛好，喜道﹕「size啱啱好喎。」
「啱就好，不過而家夏天就著唔到嚕......」Fiona樣子有點可惜。
我笑道﹕「好快到秋天啫，而且出入冷氣地方都可以著㗎。」
Fiona喜道﹕「咁又係。係喎，我比啲相你睇吖！我哋去咗好多地方呀！」
然後Fiona 開始跟我分享他們遊倫敦的經歷和趣事。
回到店舖，Carol馬上走過來問我﹕「女朋友仔呀?做咩唔見你哋拖手嘅?」
我尷尬道﹕「吓?......er......」我也不知道要如何回答。
呀柏問道﹕「喂！喺邊度識㗎?好靚喎！」
「大...大學同學......」
呀柏羡慕道﹕「原來大學咁多靚女㗎?早知我就比啲心機讀書啦！」
東哥笑駡﹕「超！算把啦你！就憑你?」
這一天又在笑笑鬧鬧中渡過。
翌日，我又如常地在整理貨架。
呀柏又突然輕聲道﹕「喂！東哥，又有靚女呀！」
Fiona嗎?應該不是吧，若果是Fiona應該會馬上叫我啊。
又聽得東哥道﹕「小姐你好呀！想睇啲咩產品呀?我哋可以介紹返喎！」語氣又是異常地殷勤。
「唔該，請問Samuel喺唔喺度呀?」又是一把甜美的聲音傳來。
嗯?怎麼聲音也好像很熟稔。
東哥聲音好像有點驚訝﹕「吓?又係搵Samuel?」然後喊道﹕「Samuel！又係搵你呀！」
我轉個頭一看，只見小惠有點不自然的站在不遠處。
我訝道﹕「小惠?你點解會嚟搵我嘅?」大概是Fiona告訴她我在這裏工作吧。
說起來沒有見小惠已經三個多月了。
小惠本來好像有些尷尬，但轉眼又變回平常那個樣子﹕「係咪搵你食飯都唔得吖?駛唔駛打比你秘書book時間呀?」
我忙不迭的搖手道﹕「唔駛唔駛......」小惠變回以前那個樣子實在太好了，我還怕她以後不會再和我說話。
小惠不耐煩道﹕「咁你食得飯未呀?」
我望向東哥，他馬上說﹕「食啦食啦！同噚日一樣食多半個鐘好啦，食完好快啲返嚟！」
我喜道﹕「知道！」然後與小惠並肩離開。
小惠邊行邊問我﹕「噚日?」
我解釋道﹕「噚日Fiona嚟搵我食飯。」
「哦。」小惠恍然大悟，然後又沉默起來。
我們在餐廳裏坐下，還是沒有說話，氣氛好像有點尷尬，於是我拿兩隻小傢伙打開話匣子﹕「係呢，金仔同小白點呀?」
小惠道﹕「佢兩個好乖呀！而家已經咁大隻啦。」說罷用手比了比呎吋。
「咁大隻啦?話時話我都成三個月無見佢哋啦。」雖然第一次看到牠們時發生了不偷快事件，但說起來還真有點掛念這兩隻小傢伙。
「你開學咪見到佢哋囉。」
我轉了轉話題﹕「係呢，Fiona話你最後嗰日病咗喎，而家好返啲未呀?」
小惠點了點頭﹕「嗯，而家無乜嘢啦。」然後從手袋拿了一個古老的木盒子給我﹕「嗱，手信呀。」
我打開盒子一看，原來是一枚手錶。
我疑惑道﹕「咦?呢隻錶......點解好似熟口熟面咁嘅......?」我拿起手錶左看右看，總覺得好像在那裏見過。
小惠俏臉一紅﹕「係...係咩?應該唔會㗎，呢隻係喺古董舖買個喎。」
「係呀......」我又看了兩眼，然後沒有想太多，就將我戴著的手錶換上這一枚。
小惠見我馬上戴上它，喜道﹕「好襯你呀！」
我看了看，微笑道﹕「係喎。」究竟我在哪裏見過這枚手錶呢?
小惠又將一張紙遞給我﹕「盛惠你港幣五百元正。」
我打開一看，發現是一張收據，失笑道﹕「乜手信都要收錢㗎?」
小惠沒好氣道﹕「唔係隻錶呀。你唔記得你話要送嘢比我叫我自己去買咩?」
我搔搔頭笑道﹕「係喎，我都唔記得咗添......咁你買咗咩呀?」
小惠將左手伸過來讓我看，我這才發現她左手中指上戴著一隻很特別的金指環。
我奇道﹕「中間嗰個係咪個雀巢呀?點解好似無咗啲嘢咁嘅?」
小惠道﹕「老闆話原本鑲咗粒珍珠喎......」然後就將指環的故事告訴我。
我不置可否道﹕「反正啲古董店老板一定袋咗幾廿個故仔呃你啲無知少女買嘢㗎啦......」
小惠白了我一眼﹕「哼！信不信由你！反正我信了！」
我拿著她的手看著指環道﹕「呢隻介指用咩做㗎?五舊水唔會係真金呀?」
小惠馬上將手縮回去道﹕「鍍金嚟咋，你就想五百蚊可以買到純金。」
我馬上道﹕「咁即係裏面係發泡膠都得啦?！咁五舊水好貴喎！」
小惠看著指環道﹕「我唔理，總之張單寫咁多就係咁多，我收順咗啦，都無收啲零頭。」
我無言，心裏暗嘆這兩天等於白幹活了......
我突然想起一個問題﹕「係呢，你下年都住Hall個呵?」
小惠點了點頭﹕「係呀，我問過Kitty啦，諗住都係申請同佢同房。」
我心裏有點忐忑﹕「咁呀...咁你係咪都係會同樂言調房呀?......」
小惠道﹕「其實你唔想我調都無所謂，費是比Fiona知道咗令佢有咩誤會啦。」
我忙道﹕「其實Fiona知道咗好耐啦，我都同佢解釋過，所以唔會有問題㗎。」續道﹕「而且我都好掛住金仔同小白......」
我覺得自己好像在找藉口跟小惠住在一起一樣。
小惠淡淡然道﹕「哦，咁調囉。」她頓了頓，又道﹕「我諗你都差唔多係時候同Fiona表白喇。」
我心中打了一個突，沒想到她突然提起這件事，我道﹕「係...係時候咩?」
小惠點點頭﹕「嗯，我覺得你而家表白應該都會成功喇。」
我有點猶豫﹕「真係?會唔會太快呀?」不知道為何，對於表白我現在心裏好像有點抗拒，究竟是甚麼原因呢?
小惠道﹕「啱㗎啦，我覺得Fiona應該都已經鐘意你。」
聽到小惠這樣說，我是有一點開心，但同時心底又泛起另一種感覺，至於是甚麼感覺，我也說不清楚。
「咁呀...咁都要搵一個好啲嘅時機㗎，唔係就咁打電話去同佢講啩?」
小惠白了我一眼﹕「緊係唔係啦，等我諗個浪漫啲嘅情景比你啦，包保一take ok。」
「哦。」我隨便應道敷衍了事。
我到底在想甚麼，我不是一直想跟Fiona表白的嗎?那麼我在猶豫甚麼?