愛在宇宙大爆炸前: （一）

「行開啦張浩賢！」呢句說話我大大話話聽過千幾次。
每次我一路講笑一路搭住佢膊頭，佢都會起哂鋼咁推開我。

諗返以前讀中學，我同佢同班咗五年，每年暑假我都決定開學就同佢表白。
結果拖到中學畢業，然後大學畢業，然後出黎做野…我都仲係好想將我既感受話比佢知。
每次上網睇到佢既近照，我都好想約佢出黎，同佢講一聲「我以前鍾意過你」。

其實咁多年都係。

佢叫林若妍，因為大家個名都有個「妍」/「賢」字，中一我果年人生路不熟，所以第一次聽到佢個名，我就覺得我地好有緣。


佢成日自己一個人，不論小息、午飯、放學都係自己一個人。
我一直都只係留意佢，從來都冇覺得自己對佢既感情係愛。

直至中三果年，我偶然間見到佢微笑。

當年班上出現咗一個同佢比較親近既女同學——蔡婉玲，只要蔡婉玲係佢身邊，佢就會笑。
而我只要見到佢笑，我就覺得就算世界末日都冇所謂啦。
如果有日佢因為我而笑，就算世界冇末日，淨係我死都冇所謂啦！

中四果年，我地因為一樣揀理科而再次成為同班同學。


「林若妍，跟住呢兩年又要你多多指教喇。」我知道佢一定同蔡婉玲一齊坐，不過我都唔執輸坐咗係佢前面。
佢淨係點一點頭，我唯有好冇癮咁轉返身。

「喂，你究竟鍾意佢啲咩野嫁？」坐我隔離係我既老死林逸峰，全宇宙得佢一個知道我暗戀林若妍。
「你識咩吖？」
「係就係幾靚，不過佢呢啲文靜型，同你呢啲好動型大纜都扯唔埋喎！」
「萬有引力，我同佢之間有一股無形既引力互相吸引住，你睇唔到嫁喇。」
「無厘頭。」
「我夠話你訓醒戇鳩鳩咯。」中學雞啲對話係咁上下水平。



果日放學，因為我未買齊書既關係，我拉咗林逸峰陪我去書局。
我地拎住張書單排緊隊既時候，有把聲係後面傳過黎：「喂，你地跟蹤我地啊？」
「你係我後面，究竟係邊個跟邊個呀？」林逸峰講出我心入面果句說話。
一擰轉頭，我慶幸呢句說話係佢講唔係我講。
「一場同學講吓笑都咁認真！」蔡婉玲嬲嬲地，想拉埋林若妍走。
你嬲既話你自己走好啦，做乜要拉埋佢走姐？

當佢地行到書局門口之際，我發現自己原來係一個重色輕友既人。

「林逸峰話覺得好慚愧，想請你地食野兼道歉喎！」
我永遠都忘記唔到果種心寒既感覺，有一個想殺死我既人就企係我左手邊既果種驚憟感。
「食完先原諒你啦！」於是我地四個去咗麥當勞食野。

原來林若妍鍾意食麥樂雞餐，鍾意點甜酸醬，鍾意飲芬達。
踏入同班第四年，我總算知道佢既少少喜好。



「講開又講，我地之前從來都未試過約出黎食野喎！」難得林逸峰不計前嫌，幫我打開話題。
「係囉，其實你地知唔知班上有我地兩個存在嫁？」我打蛇隨棍上。
「梗係知啦，我做科長收功課要點數嫁！」雖然我既問題係問「你地」，但係我淨係想知林若妍點諗，偏偏蔡婉玲又搶住答。
「咁林若妍呢？你知唔知嫁？」林逸峰，我屈你請食野實在大錯特錯，你既寬宏大量令我太慚愧喇。
不過唔好誤會，呢餐都係你請。

林若妍終於將視線由六件麥樂雞移到我同林逸峰身上。
雖然我同佢由中一開始一直同班到依家，但係果一刻我冇信心佢會講得出我地個名。
「林…林峰？」呢個二打六只係坐係佢前面一日，唔記得都好正常。我呢？我呢？？？

終於佢既視線落到我身上。

「你係張浩賢吖嘛，我地三年黎都同班，點會唔記得。而且你個名同我一樣都有個『賢』字。」
哼，所謂萬有引力，就係個「賢」字！


「我有時放學見到你想嗌住你，但係見你聽緊歌冇打擾到你。」都係果句，打蛇隨棍上。
「嗯。」碌棍咁就比佢折斷咗…