愛在宇宙大爆炸前: （二）

第二日，我終於趕完暑期作業，全身癱瘓咁伏在係枱面。
趁住上堂鐘未響，我打算眠一眠，陣間精神奕奕咁…撩林若妍傾計。
當我開始進入深層睡眠既時候，有一把歌聲傳入我既耳仔：

想回到過去　試著讓故事繼續　至少不再讓你離我而去
分散時間的注意　這次會抱得更緊
這樣挽留不知還來不來得及　想回到過去…

我好舒服咁訓著咗，直至鐘聲響起。
我伸一伸懶腰，發現有人幫我戴咗個白色耳塞，裡面一直播住周杰倫既歌。


好彩老師未入課室，我即刻掹走個耳塞將部MP3機隨手放入櫃桶。
呢個時候，有人係後面拍我膊頭。

我回頭一望，見到林若妍對我伸手。

「部機係你既？」可能係因為啱啱訓醒既關係，我個腦仲係鈍鈍地。
「我諗住同你分享我平時聽既歌，但係見你訓著咗冇打擾到你。」咦？佢係唔係抄緊我？
我係櫃桶拎返部機出黎，然後交返比佢。
交收一刻，我掂到佢隻手。我感覺到自己塊面已經紅哂，於是即刻擰返轉身。
「唔通佢都想同你更進一步？」林逸峰對我打眼色。


不要再說了！我塊面應該已經紅到好似紅蘋果、紅棗，直情好似紅十字會咁！

「我係一個君子黎既，掂到佢隻手姐，又唔會有BB。」我不斷催眠自己，希望自己冷靜落黎。
但係一諗到佢係用咩心情幫我戴耳塞聽歌，我既心跳又變得急促。

到我平靜落黎，落堂鐘都已經響起。
「不如今日我地四個再出去行吓吖？」點解蔡婉玲咁主動約我地？唔通係林若妍拜託佢既？唔通…
係我諗緊十萬個為什麼之際，林逸峰已經幫我拎埋書包，準備出發。

我地去咗冒險樂園，林逸峰係銀包度拎咗張會員証出黎，好似小朋友咁衝去換金幣。


蔡婉玲好自然咁跟住林逸峰去排隊，淨低我同林若妍。

「不如去揀吓有咩禮物想要？有個目標咁玩會開心啲。」我提議。
「其實我唔鍾意玩呢啲遊戲…」林若妍一臉為難，真係我見猶憐。
唔知點解，果刻我覺得自己應該拖住佢隻手，於是我拖住佢離開咗冒險樂園、離開令佢為難既地方。
因為怕比蔡婉玲發現，我跑到好遠好遠先敢停低。

我同林若妍跑到上氣唔接下氣，但係我地都冇放開過對方隻手。
呢一刻，我見到佢笑。

對唔住，我細路仔唔識世界，唔好世界末日，我仲未想死住。
當我見到佢為我笑果一刻，我先發現自己比想像中更加鍾意佢。

「我愛你呀林若妍！！！」我係心中吶喊。



突然，我意識到自己應該放開佢隻手。

「咁我地去邊呀？」佢問。
我冇答佢，借頭借路又拖住佢隻手急步行。
唔知點解佢又唔鬆開手，由得我拖住佢。

我帶佢去到唱片舖，「今朝我聽到首歌好好聽，不過我普通話唔好，唔知係邊首歌…」
佢聽到我講野之後，係林林種種既唱片入面搵到周杰倫既專櫃。
之後佢好自然咁鬆開我隻手，好專注咁係度搵。

而我就係度苦惱緊，我應該用咩藉口再拖住佢隻手呢？冇理由拖住佢跑足全日掛？

「雖然我唔知你聽到邊首歌覺得好聽，不過我今日係比呢隻碟你聽。呢隻碟其實已經係一年前既作品，不過佢啲歌幾時都咁好聽。」佢遞咗一隻碟比我，係周杰倫既《八度空間》。
我望住隻碟，諗都冇諗就拎咗去櫃枱比錢。
如果捱一個禮拜麵包可以拉近我同林若妍既距離，我肯。


就算比阿媽發現誤會我男人老狗追男明星，我都冇所謂。
我鍾意林若妍，林若妍鍾意周杰倫，所以我鍾意埋你又點話吖周杰倫！

「你估吓我今日覺得好聽果首係邊首歌吖？」連手都拖埋，對我黎講搵話題已經易如反掌。
「唔知呢。」
「點解你會鍾意周杰倫既？」
「我聽完《范特西》之後就鍾意咗佢喇。」
「范特西。」
「吓？」
「算啦。」

又話聽完「范特西」就會鍾意既…

我見天黑，而且我好想知林若妍住係邊，於是決定送佢返屋企。
一路上，又係講周杰倫。



「如果你想了解多啲，我可以借佢隻《范特西》比你聽。入面有一首歌叫《愛在西元前》，真係好好聽。歌詞寫果種矢志不渝既愛情好令人嚮往，真正既愛情係歷久不衰。」我發夢都冇諗過，林若妍竟然滔滔不絕咁講野，仲要係同我講。
果一刻，我真係好佩服周杰倫既才華。

「乜原來你都會嚮往愛情嫁咩？」哼，都話咗打蛇隨棍上嫁啦。
聽到我呢句，林若妍冇再講野。
唔通我既攻勢太猛烈，比佢發現咗？

直至去到佢屋企樓下，佢終於出聲：「你等我一陣吖。」
我見到佢急急腳走入大廈，過咗一陣又急急腳走返出黎。
佢遞咗一隻碟比我，上面寫住「范特西」。

「好多謝你今日陪咗我成日，除咗蔡婉玲之外得你肯同我傾計，好開心係同班第四年同你成為朋友。」佢耷低頭，好似怕望到我咁。
我接住隻碟，擰轉身。
「其實你係唔係好驚我望住你呀？我可以唔望你嫁，我淨係想你可以自自然然咁同我傾吓計，咁就夠嫁喇。」我既語氣好平靜，但係其實我個心就黎跳出黎。


「張浩賢，你真係好好人。」林若妍講完呢句說話之後就行返入大廈。

果晚，我不斷聽《愛在西元前》，務求係一夜之間記住呢隻歌。
我一直以為呢首歌會係我同林若妍之間最大既牽絆。
當時既我冇發現，呢隻碟最值得我回味既，係第五首歌：《開不了口》。