愛在宇宙大爆炸前: （五）

兩個禮拜既考試眨吓眼就過去，溫咗咁耐書，就係為咗呢兩個禮拜，考完果刻個人有啲空虛。
不過唔緊要，仲有會考，呢次我一定會同林若妍兩個人一齊溫書。
對唔住喇林逸峰，為咗製造只有我同林若妍既溫書會，我要將你奉獻比蔡婉玲喇！

考完試之後，蔡婉玲拉住林若妍黎到我同林逸峰面前。
「最後呢科物理，你地考成點呀？」蔡婉玲問。
「一切順利。」林逸峰自信滿滿。
「我都大致順利，不過長題目好多陷阱，好彩我做過類似既題目。」我答。
「吓？有咩陷阱呀？」林逸峰既自信一下子消失哂。
「啲單位呀，用詞呀，下次睇題目小心啲啦。」我拍一拍林逸峰既膊頭。


我眼尾既餘光見到林若妍好溫柔咁對住我笑，我知道，我同佢係呢三個月以黎都等緊呢一刻。

蔡婉玲提議去慶祝一下，於是我地四個去咗學校附近既商場行街。
我地四個已經有三個月冇聚埋一齊，但係呢日既聚會完全冇生疏既感覺，反而變得更加緊密。
果日我地玩到好夜先返屋企，好似將三個月積埋既壓力一次過釋放出黎咁。

終於，對卷日黎到。

對卷日基本上好似平時上堂咁，上足六堂，聽老師講返自己錯咗啲乜。
而我對自己講過，只要我科科都攞到70分以上，我就約同林若妍一齊溫書。



兩個人！

中文81分，英文72分，數學93分，化學76分，生物78分。
唔係我自誇，我數學同物理不嬲都好好，基本上呢兩科唔駛點溫都攞到好成績，何況今次我有溫書？
而最後呢份物理卷，考試前林若妍仲幫我打埋氣，唔攞100分我都對唔住自己！

物理96分。

對唔住，張浩賢。



「嘩，你咁勁既？閉門溫書果然有用喎！」林逸峰拎住份65分既試卷。
「有興趣你都可以一齊…」好彩及時煞掣，唔係我同林若妍兩個人溫書既計劃就毀係自己手上。

校鐘嚮起，代表中四結束，我地過埋個暑假就係中五既學生喇。
我地四個照舊出咗去玩，而且玩得比以前更開心。
散場既時候，我若無其事咁同林若妍一齊行，直至離開林逸峰同蔡婉玲既視線。

「好耐冇送過你返屋企喇。」我打開話題。
「都好耐冇人送過我喇。」原來佢冇比羅偉倫送佢返屋企。
「呢幾個月都冇搵你，你冇嬲我吖嘛？」
「如果考試之前你都仲搵我，我就真係嬲你喇。」林若妍笑喇，好似好耐冇見過佢笑咁。
「係呢，我可唔可以問你一個問題呀？」
林若妍點一點頭，望住我，佢等緊我開口。



「你將來有咩打算呀？」唔知係唔係錯覺，我覺得佢有啲失望。

「目前我會考上預科，畢業之後會去讀音樂，我想做鋼琴家。」談及夢想既林若妍實在太耀眼。
「讀音樂？去維也納？」有一刻，我以為自己會永遠失去佢。
我唔可以失去佢。

「你呢？你打算做咩呀？」林若妍反問我。
「小提琴家。」
「你識拉小提琴嫁？點解你之前唔同我講既？」佢好驚訝，碌大對眼望住我。
「如果你諗住一世彈鋼琴，我就一世係你隔離拉小提琴啦。」
「你真係識拉小提琴？」佢好認真。
「唔識。」

林若妍行前幾步，擰轉頭同我講：「我從來都唔識分你幾時係講真、幾時講笑。」



「仲差少少就到，我自己返去得喇。」佢冇比機會我講野，就咁消失係我視線範圍。

如果有一日我會失去佢，個原因一定係出係我身上。