愛在宇宙大爆炸前: （六）

暑假呢兩個月，我都冇見過林若妍。
再見面果日，我地已經係中五既學生。

雖然我地四個都係一齊坐，但係我知道我破壞咗我同林若妍之間既關係。
我唔知點樣修補，一直逃避。

其實我一直都冇面對過問題，我甚至連自己既感情都冇膽講出口。

踏入中五之後，時間比想像中過得更快。
每日都係溫書、溫書同埋溫書，當然只有我一個人係自修室。


如果我可以考上中六，我就可以繼續同林若妍一齊，呢刻既我淨係諗到點樣留係佢身邊。

如果我考唔到…點算？

雖然只係12月，但係中五淨係讀半年，我得返三個月時間挽回呢段關係。

由中三果年始，每年畢業禮學校都會請林若妍上台表演鋼琴。
今年應該都唔會例外。

「你知唔知道林若妍係畢業禮會表演咩歌？」我向蔡婉玲埋手。


「佢講過一次，不過我唔記得咗喇。」
「呢次你真係要幫吓我，我急需知道佢表演既係邊首歌。」
「有排都未到畢業禮，而且我都唔知幫唔幫你好…」蔡婉玲難得認真。
「幫啦！」林逸峰及時出現。
「我幫得幾多次？如果一個人係珍惜另一個人既，一次機會已經夠啦！」蔡婉玲好激動。
我明白，我既優柔寡斷傷害到佢既好朋友，佢嬲我亦都好正常。

「《藍色多瑙河》。」
我望住蔡婉玲，佢已經平靜落黎，反而我好激動。



我跑去教員室搵教音樂既劉老師，叫佢幫我進行特訓。
畢業之前，我要征服你：《藍色多瑙河》！

模擬考試、公開考試浪接浪咁黎，我除咗溫書之外仲要練習小提琴，其實真係好吃力。
好幾次劉老師都勸我放棄，要以學業為重，但係佢唔知我既苦衷。
前途同埋林若妍，係我心目中同樣重要。

世上無難事，只要夾硬黎。

我每晚訓四個鐘頭，死唔去之餘仲係模擬考試攞到一個非常好既成績。
不過我冇比虛擬既榮譽沖昏頭腦，會考先係真正敵人。

書枱上面放滿最後一日上堂影既相，同老師、同學，仲有林若妍。
我記得果日我有主動同佢傾計，內容係周杰倫既《七里香》。
再係咁落去，我地之間既關係又會倒退返去最初果時，淨係得「周杰倫」一個話題。



相入面既佢微微一笑，個笑容有點牽強。
望望相入面既自己，直情係苦笑。

我同自己講，好快就可以修復我同林若妍之間既關係。
終有一日，我地會一齊影一張合照，大家都笑得好燦爛。
而果張合照，叫做「婚紗相」。

可能因為每日都做同樣既事，溫書、練小提琴，日子過得好快。
冇林若妍既日子，都係過得快啲好。

轉眼已經係會考前夕，人人係度溫書，而我既時間表上面仲有一個鐘用黎練小提琴。
係果一個鐘頭，我收到林若妍既短訊。

仍然係果兩個字：加油。



我冇覆到佢，因為我已經決定用行動證明我既決心。