愛在宇宙大爆炸前: （八）

自從林若妍建議我去做研究之後，每次上實驗堂我都比以前更踴躍。
我都唔知自己係貪玩定係想係林若妍面前搏表現，我確實非常享受實驗堂。

咁既日子過咗兩年，我地又面對另一個公開試。
係就係難過會考，不過幾艱難既事都好，只要跨過去，回頭望都係小事一椿。
而我，講咗咁耐都冇約到林若妍一齊溫書。

中七既暑假來到，可能係我地最後一個暑假。
呢日，我收到林若妍既來電。



「喂，張浩賢？周杰倫有戲上畫，不如放榜果日我地去睇吖？」
「你肯定放榜之後我地仲有心情去睇戲？」
「考得好唔好，都要獎勵一直以黎咁努力既自己嫁？」好似係歪理，又好似係真理咁。
「你約我，我一定去嫁。」

於是，我比其他人更加期待既放榜日到喇。

林逸峰英文唔合格，但係其它科目考得唔錯所以選擇重考。
蔡婉玲成績唔錯，應該入到佢想入既中文系。
林若妍因為一直報讀演藝學院，所以即使佢考得好好，佢都冇顯得特別開心。


而我既分數，應該足夠入物理系，因為收生要求根本唔算高。

「不如我地係下年開學日去學校後山埋一個時間囊，約定七年之後一齊返黎開咗佢吖？」由以前開始，蔡婉玲就有好多提議。
「咁應該擺啲咩入去呀？」林若妍好認真咁探討呢個問題。
「乜都得，對你黎講有價值既野就可以擺入去。」
「嗯，我諗到喇。」
「咁我地係對卷日一齊帶住自己既寶物去後山埋時間囊嫁喇！」

我同林逸峰全程都冇出聲，其實只係得蔡婉玲好期待埋時間囊呢件事。



四人活動解散之後，我同林若妍就去學校附近既電影院。
中學階段既活動範圍總係係學校附近。

「係呢，套電影叫咩名呀？」我問。
「《不能說的秘密》。」
「好巴閉咩？陣間我去到都知嫁啦。」
「唔係呀，真係叫《不能說的秘密》呀！」林若妍哭笑不得。
「有咩秘密係可以說嫁？講黎聽吓。」我搭住佢膊頭。
「行開啦你！」佢推開咗我。

預咗嫁喇。

係電影播放途中，林若妍睇到入哂神，而我淨係覺得女主角好有氣質，同埋周杰倫彈琴真係好叻。
套戲尾聲，路小雨用塗改液係張枱度寫字果一幕，我見到林若妍既眼淚滴咗落佢手背上面。
當我想伸手攬住佢果刻，我個腦閃過咗電影入面周杰倫同人鬥琴果一幕。



林若妍身處既世界，係充滿美好、有樂譜係佢身邊飄揚既烏托邦。
有資格將佢一擁入懷既，應該係一個才華洋溢既再世莫扎特。

一首《藍色多瑙河》都練足半年既我，根本冇資格做林若妍既知音人。

電影完咗，我同林若妍去咗一間茶餐廳食晚飯。

「好唔好睇呀？」佢問。
「唔錯呀，你肯定好鍾意呢種題材喇。」
「嗯。」

侍應放低咗兩碗麵。

「如果可以同周杰倫一齊彈果首歌就好喇。」



林若妍既夢想，真係太遠大無邊喇。

定應該話係不著邊際？

如果係輸比周杰倫，我都抵輸既。

咦？點解我會有咁既諗法？我唔係應該勇往直前，同林若妍白頭到老嫁咩？
張婚紗相都未影，點解我竟然會無端端認輸？
仲要係輸比周杰倫？當年係紅館我係型過佢嫁喎？唔係咩？

真係唔係。

果晚，我訓唔著。
開住電腦，見到《不能說的秘密》成為熱門話題。


有人甚至將戲入面出現過既歌編成樂譜，擺上網同人分享。

樂譜？周杰倫？不能說的秘密？

果晚，我下載咗一首名為《四手聯彈》既樂譜。