愛在宇宙大爆炸前: （九）

之後果個月，我租咗琴行一部琴，自己埋頭鑽研。
我啲手指好僵硬，點解明明同年紀，林若妍既手指咁靈活。
佢果然係第二個世界既人。

係我醉心音樂既時候，九月一日到咗喇。

我地四個依照約定拎住「寶物」去到學校後山，搵咗個唔顯眼既地方挖咗個窿。
蔡婉玲拎咗個曲奇餅盒出黎，叫我地將帶黎既野放入去。
我地不約而同將各自既「寶物」包到密不透風，其實大家都好重視呢個屬於我地四個既時間囊。



唔經唔覺，埋好個罐既時候已經天黑，我地亦都離開咗後山。
而我又返到去琴行，繼續苦戰。

一個月後，我拎住份琴譜去到林若妍屋企樓下，打咗個電話叫佢落樓。

「張浩賢？點解你會係度既？」
「我知道你今日放假，想做一日周杰倫。」我遞咗份琴譜比佢。
林若妍接住份琴譜，耷低頭笑。

識咗佢七年，我第一次上佢屋企。



我同佢並排坐係鋼琴前面，佢將份琴譜排放好之後，就話可以開始。
係合奏既時候，我有好幾次都甩咗手，而佢亦都好體貼咁同我由斷位重新開始。
終於，合奏完畢，佢一如以往咁笑，而我就只想搵窿捐。

林若妍既笑容，明明係我係呢個世界上最珍惜既野。
點解呢一刻，呢個笑容會深深刺痛我。

果晚，佢屋企人叫我留低食飯，我以「阿媽煮咗我飯」為理由推卻咗。
返到屋企見到阿媽真係煮咗我飯，但係我已經冇哂胃口。



大學開學已經有一段時間，不過我仲未適應到大學生活。
冇林若妍既微笑，冇林逸峰既知心、冇蔡婉玲既冷嘲熱諷。
不過我知道，人冇可能停留係任何一個時刻。

即使我好想、好想將時間永遠停留係2004年，我同林若妍睇周杰倫演唱會果個夜晚。

我同林若妍偶爾會通電話，多數都係互相報告近況。

呢晚，我地又傾電話。

「有冇聽周杰倫隻新碟呀？」佢把聲聽落好開心。
「冇呀，仲未有時間去買。」
「你係大學一定好忙喇，你忙可以老實同我講嫁，我地可以下次再傾過。」
「唔係呀。」


「無論事無大小都同對方分享，係你講嫁張浩賢。」
「嗯。」

我冇諗過有一日，我會膚衍林若妍。
唔係因為攰，唔係因為冇話題，而係林若妍既光芒令我無地自容。

我又一次逃避。

第二日，我趁住天地堂之間既時間去咗唱片舖，搵到周杰倫既《我很忙》。
四年前買左《八度空間》之後，我開始收藏周杰倫既唱片。

當晚我一個人係房聽住呢隻《我很忙》。
四年後，周杰倫既咬字清晰咗，但係我既普通話都仲係咁差。
我拎住歌詞簿，仔細咁咀嚼每一首歌。



《彩虹》、《蒲公英的約定》、《我不配》…
去到最後一首《最長的電影》，我既眼淚終於忍唔住。

林若妍，你的聲音那麼近我卻抱不到。沒有理由，我也能自己走。
林若妍，你是友情，還是錯過的愛情。
林若妍，你的美，我不配。

林若妍，讓我把記憶結成冰。

果然，呢個世界上係冇可以說既秘密。
而「張浩賢鍾意林若妍」，永遠都會係一個不能說的秘密。