愛在宇宙大爆炸前: （十五．最終章）

呢一晚，我著起西裝，昂然步入會場。
我同一班舊同學、來賓等等寒喧咗幾句之後，就開始尋找先黎一步既林若妍。

林若妍我就未搵到，林逸峰就走咗埋黎。

「喂，你今晚…心情如何呀？」林逸峰望住大會屏幕播放既片段。
「好平靜。」

係呢個時候，耳邊傳黎一首熟悉既旋律：《藍色多瑙河》。
林若妍係不知不覺間坐咗係鋼琴旁邊，十隻手指好優雅咁敲落黑白鍵上面。


著起婚紗既佢好靚，佢既側面仍然係咁清秀脫俗。

我既腦海中浮現出15歲既佢，著住校服坐係我後面睇書果個樣。
有一剎那，我覺得台上果個林若妍係假既。

「最後同林若妍結婚既人，竟然唔係我。」係當年既競爭對手羅偉倫。
「唔係掛，你竟然以為自己有機會？」唔知點解，依家見返佢淨係得一種令人懷念既感覺。
「其實果時我都感覺到自己輸硬嫁喇，不過如果我唔將自己既感情講出黎，我會後悔一世。」
我望住佢，果一刻我好想同佢握個手，或者黎個擁抱。
「如果係輸比你，我會心服口服。」羅偉倫講完呢句之後，就去咗搵其他舊同學傾計。



《藍色多瑙河》步入尾聲，今晚會係特別既一夜。
全場既目光都望住台上既林若妍，佢企起身向台下鞠躬，全場掌聲如雷。

距離開席仲有少少時間，親朋戚友開始上台搵新娘子影相。
我稍微拉直少少件西裝外套，束返緊條呔，走上台企係新娘子隔離。
新娘子挽住我，我望過去，見到既仍然係15歲既林若妍。

「佢地同我講咗果個時間囊既事。」林若妍望住台下既林逸峰同蔡婉玲。
「係咩？」


「蔡婉玲話好羡慕我地，原來我地真係羡煞旁人。」睇黎佢有記住封信既內容。
而我，已經冇心情再講笑。

「2004年既張浩賢同林若妍，係兩情相悅。」林若妍呢句說話，令我有啲想喊。

「仲記唔記得果時你係班房播比我聽果首歌？」我問。
「《回到過去》。」
「咁你仲記唔記得2004年周杰倫演唱會最後一首歌？」我又問。
「《軌跡》吖嘛。」

「兩位望望呢邊，笑。」攝影師舉起相機。
我同林若妍同時望向鏡頭，笑得好燦爛。

完