你陪我過聖誕，我陪你過元旦，好嗎？: 第三章 (完)
我攞出紅色聖誕樹既朱古力，請左佢食一粒，佢笑得好開心，喺呢個咁慘既時刻，佢一粒，我一粒，朱古力好甜，我覺得佢笑得仲甜，佢開懷地笑，我都笑了。
原來同女仔去街係咁奇妙，嘉嘉同我第二日既行程，係行工展會，雖然無講話同佢係拍拖，我亦未有膽去表白，但我價當晚送到佢屋企既地鐵站後，好自然咁問佢。
我：明天有咩節目？
嘉嘉：節目係咪應該你安排比我呢？
我：我…都唔知有乜節目呀，你會想去邊？
嘉嘉：同我行工展會呀？
我：工展會？你會行工展會？
嘉嘉：係呀？唔得咩？有規定後生女唔去得既咩？
我：無，我以為你會喜歡行街睇戲。
嘉嘉：我想同媽咪行，不過下星期先行，如果你無嘢做就同我去左先，等我睇定有乜好嘢買。到時同媽咪行有攻略。
我：都好，我未去過。
嘉嘉：最多我請你入場，入場飛買一送一架。
我：哈哈，咁多謝喎。
嘉嘉：明天食完飯打比你啦。
我：好呀，咁我送你出去啦。
嘉嘉：唔洗送啦，我自己行得架啦，返到去send whatsapp比你啦。
我：咁拜拜啦。
嘉嘉：拜拜。
其實嘉嘉個樣唔喺話好靚，身材又唔係話好好，不過我對佢好有好感，我覺得同佢好有緣，佢比我感覺好順服，佢喺一個我可以正望又有嘢同佢可以講既人。太靚既 女仔唔知點解見到就好緊張，好大壓迫感，原來同佢一齊行既時候，會成日想望住佢，而且兩個人平排行都唔覺得奇怪，可能我真係太毒，呢啲嘢講出黎真係會比人 笑死。
同佢約左係銅鑼灣地鐵站等，今次我無遲到，因為我成晚到無乜點瞓過，我開心到瞓唔著，我約到女仔過聖誕節啦。
佢都無遲到，一個守時既女仔，佢今日既打扮係一件紅色風褸同藍色牛褲。
工展會人來人往，我同佢並肩而行，睇下呢樣，又睇下嗰樣，原來佢唔單止鍾意睇奇怪嘢，同我阿媽一樣，佢都鍾意睇煲架。
同嘉嘉一路行，佢嘅電話響起。
我：你電話響啦，做咩唔聽？
嘉嘉望一望個來電號碼就收咗線：推銷電話黎。
我無出聲，大時大節會有人推銷咩？咁樣算唔算對我講咗大話？但我無踢爆佢，無必要。
行左一個下午，其本上每一檔都睇過，有得試食試飲都試均晒，除咗一檔食榴蓮之外，我唔食嘅，但佢就試埋我嗰份。
無買野就走，但我覺得同佢行街都幾舒服，至少唔會買好多嘢要我攞。
我：你返屋企食飯？
嘉嘉：係呀?無錢去街食。
我：我...我可以請你食飯。
嘉嘉：但係我唔得啦，一喺明晚你請？
我：好呀，食咩聖誕大餐？
嘉嘉：你有乜好介紹？
我：我好少出街架，不如你話事啦。
嘉嘉：咁呀？去邊度好呢？
我：同埋我想約你睇戲，我想睇哈比人。
嘉嘉：哈比人...好啦，你想睇我就陪你睇。
我：你唔想睇呢套咩？不過近排無乜戲好睇喎。
嘉嘉：就睇呢套囉，你想睇，不過我都唔記得之前個故事講乜。
我：其實我BT 左之前兩集，你洗唔洗溫返？
嘉嘉：喺邊度睇？
我：我屋企囉。
嘉嘉：上你度？你屋企無人咩？
我：我阿媽會係屋企，不過我哋係房佢唔會入黎。
嘉嘉：...咁快上你屋企？會唔會快咗啲呀？
我：快？快咩？
嘉嘉考慮咗陣：都係唔好啦，一喺你抄落手指度，我返去睇。
我：哦，咁我明天比你，約後日睇？
嘉嘉：星期日睇，都好既，咁星期日睇完戲先食飯啦。
我：哦，咁都好嘅。
嘉嘉：咁你買飛，係咪請我睇架，我無錢架啦。
我：我請，我請。
之後我地約左係時代廣場睇，星期日三點四。
雖然我哋未進展到男女朋友既關係，但喺作為男仔間唔中請女仔食飯睇戲都好正常，唔係話咩養到變港女，呢個世界有一種人好乞我憎，就喺乜嘢都斤斤計 較，又一毛不拔既人。我可以肯定如果我喺咁既話，就唔會有機會脫毒，亦唔會有機會追到女仔。人與人之間既相處，唔係砌機咁，乜都好講性價比嘅。
哎呀，死火啦，頭先叫嘉嘉上我屋企到睇第一二集，佢會唔會誤會咗我嘅意思架？佢可能會覺得我叫佢入我房我會有不軌企圖喎。慘啦，我要點解釋返呢？
我whatsapp 佢:唔好意思，頭先我叫你去我度睇頭兩集，無乜特別意思架，你唔好誤會。
我等咗好耐，佢都無復我，明明雙藍剔咗啦，點解仲唔回復既？唔通真係嬲咗我？
第二日，我朝早再睇whatsapp 佢都喺無回復，所以我whatsapp問：做緊乜？
又係唔回復我，等咗好耐啦。點解呀，唔會失咗蹤呀麻，我頂唔住架...我仲未陪你過元旦架。
因為等嘉嘉既回復，我無晒精神咁坐喺度等，我唔夠膽打比佢，我怕佢唔聽我電話，雖然我未正式喺佢邊個，但我既心完全不自覺咁諗住佢，關心佢，等待佢。
佢會去咗邊呢？會唔會嬲咗我，或者怕左我呢？我係咪太過唐突呢？照計佢對我印象唔會太差架？咁點解佢唔回復我呢？佢會唔會有意外呢？我就咁一路等佢回應，一路胡思亂想。
一直到咗晚上八點，十幾小時既煎熬，對於一個毒撚黎講實在太漫長。我按whatsapp 都係無回應。所以問：你是否安全？請回復我吧。
隔咗一陣，總於有回應：我和男朋友在一起，遲啲再答你。
男朋友？男朋友？男朋友...
原來嘉嘉有男朋友？咁我呢，我點？原來未曾開始，我就註定要失敗。
咩叫未曾相愛已無情？原來呢種心情真喺好難頂，好難頂。
我心情好沉重，企喺戲院出面，仲有半個鐘先入場，我本來唔諗住睇，不過買咗飛都唔好浪費，一個人睇戲又唔喺未試過，睇啦，一陣個袋仲有位擺，唔洗放地下。
我電話響起，一睇，嘉嘉打比我？
我：喂。
嘉嘉：我到左商場樓下啦，你喺邊呀？
我：商場？咩商場？
嘉嘉：咪時代廣場囉，你唔係話比我聽你買咗第二間既飛呀？
我：你又黎咗時代廣場？
嘉嘉：喺呀，咁你買咗戲飛呀嘛，有咩事？
我：無事，...
嘉嘉：你而家喺邊？
我：我係戲院門口。
嘉嘉：咁我直接上黎會合你啦。
嘉嘉點解會黎？我之前係有同佢傾咗睇邊間同幾點開場，仲影咗啲飛比佢睇...唔喺喎，佢又好似無講過話唔睇戲嗰...咁即係睇啦。
但喺佢有男朋友，點解仲要同我睇戲，唔通佢想收我做兵?
我唔做兵呀，做咗兵，我就返唔到轉頭，我唔要服兵役呀。我一路諗緊呢個問題，轉頭就見到嘉嘉企喺我面前，點解，佢著到咁靚，佢同邊個去街呀？
嘉嘉：傻佬，做乜眼甘甘咁望住人呀？我著得唔好睇咩？
我：...唔喺...好睇...好睇。
嘉嘉：點好睇法？形容黎聽下。
我：形容？點形容呀？
嘉嘉：你覺得點咪形容吓囉。
我：咁你想要聽真話定假話？
嘉嘉：緊喺真話啦，不過可以接受用跨張手法既。
我：OK 我試吓... 咳唔…唔
我：噢，小姐，請問你喺咪天使落凡塵，妳一身雪白既外套，就好似天上既白雲，冬天既雪一樣皎潔，短裙之下既42呎長腿，好似絲綢一樣幼滑，令我心情七上八 落，如果我可以化身成為地氈，我願意被妳雙足踏喺我既心上，我願意比你踏碎我既心，我希望化做一隻蝴蝶長期係你身邊飛舞，就好似係鮮花之中飛舞一樣。你既 一雙眼睛比星光更美，我望住你雙眼就會覺得幸福同溫暖，你既雙唇，火熱既唇色，我只求你既一吻黎溫暖我既心窩。噢，美麗既小姐，請你接受我既邀請，陪我度 過每個快樂既時刻，因為有你既存在，我既心就唔會感覺到孤單同寂寞。我願意將我既喜悅同你分享，守護係你身邊有如騎士一樣。噢，我美麗既公主，你既美麗令 我醉倒，你既善良令我傾心，你既溫柔令我溫暖，就請你容許我陪伴係你既身邊，我哋一齊入場睇哈比人啦。
嘉嘉好似好感動咁，無出聲，但眼中淚水汪汪：點解你講既嘢我一啲都聽唔明既？
嘉嘉咬唇地笑：…你…
我：我…
嘉嘉：你講咁多嘢，我一次過消化唔到喎。
我：我可以簡單啲總結下既，不過唔知你想唔想聽。
嘉嘉既面越黎越紅，好似飲醉左酒咁：就黎要入場架啦，要講快啲講。
我：我未試過講啲咁既嘢，所以有啲緊張咁...。
我個心而家真係七上八落，緊張到就黎心臟病咁，同女仔表白，仲要喺完全無心理準備既情況之下，究竟我會唔會成功呢？究竟嘉嘉會唔會接受呢？
嘉嘉偷偷望住我，又怕醜咁避開。
我鼓起最後一絲既勇氣：我想你做我女朋友，我哋拍拖啦。
嘉嘉：好啦傻佬，我好凍呀，過黎攬住我，比啲溫暖我啦。
嘉嘉主動攬埋黎，我又攬住佢，嗚呀，我得咗啦，我終於成功啦！
就咁我哋手拖手入場睇戲，其實全場我都無乜留意套戲既內容，我全程大部份時間都係望住嘉嘉，佢都知道我無專心睇戲，所以成日都係我耳邊：唔好成日望我啦，而家黎睇戲呀。
我：哦，我想望多你兩眼。
我哋中間既扶手棟起咗，我咁大過仔都未試過，而且一路拖住嘉嘉既手睇戲，我真係覺得好好呀，佢有時又會將個頭埃落我膊頭到，幸福既感覺呀，毒撚既日子，我哋後會無期啦。拜拜。
散場後，嘉嘉挽著我既手臂：做咩成場喺度笑吟吟咁呀，係咪係度諗衰嘢？
我：無呀，我開心咪笑囉，我有個好既女朋友啦。
嘉嘉：都唔知係咪架，你又知我好？
我：我知架，我知。
嘉嘉：傻佬。
我都唔知點解，快樂不知時日過。我同嘉嘉，一路行街，無睇其他野，只有望住對方，食飯又唔知好唔好食，不過同嘉嘉一齊食就開心，之後我哋漫無目的 咁行街，銅鑼灣好多都喺一對對既戀人，我而家都喺，太好啦，原來我同個社會上既人，做既嘢都喺一樣，我唔再喺自己一個人，我唔再孤單。
電話響起，係嘉嘉既電話。
我個心突然一緊，係邊個？
嘉嘉今次無收佢線，而喺直接聽電話，我聽到對方係男人聲。
嘉嘉：喂，點呀？
…
嘉嘉：吓，出一半？
…
嘉嘉：咁好啦，明天再講。
…
嘉嘉笑笑的望住我：我而家？我同我男朋友一齊囉。
…
嘉嘉笑笑：好啦明天見啦，拜拜。
…
嘉嘉對我講：我公司同事同我講，下個禮拜會出住一半糧先喎。
我：一半糧？
嘉嘉：喺呀，袋住先呀。
我：你公司真喺亞洲良心喎。
嘉嘉：埃，所以明天又要返公司同哋同事傾吓啦。
我：點解你哋仲唔走。
嘉嘉：其實公司既工作環境喺唔錯既，喺啲老細低能啲囉，如果唔係唔出糧，真喺可能繼續做架。
我：佢唔出糧，你哋都做，好古怪。
嘉嘉：我同啲同事好多都係大學讀傳播，畢業之後就做呢度，好多人都會想走架啦，等到一月二，如果仲無糧出，就會好多人一齊走。
我：咁你諗住點？
嘉嘉：我都係等埋一月頭啦，睇下點，你會陪我架嘛。
我：係呀，我會陪你，以後都會。
嘉嘉：算你啦。
我：係喎，昨日你whatsapp度話你同你男朋友一齊？咩男朋友呀？
嘉嘉：喺咩，我同我個朋友去左醫院度等佢老婆生仔，係醫院度所以唔方便復你囉，我打左男朋友咩？我都無睇清楚，你唔好誤會呀。
我：哦，咁可能真係誤會咗。
嘉嘉：你要信我架，我得你一個男朋友。
我：當然啦，我都係得你一個女朋友，我第一次拍拖乍。
嘉嘉：喺咩？
嘉嘉錫咗我塊面一啖。我個人當場急起上黎，我女友錫我呀。
我又好想錫返佢，但佢拉住我既手跑過馬路：架巴士黎緊啦，你送我返屋企。
我：好呀。
嘉嘉愉快地笑，佢既笑容，真喺我既天使。
轉眼就到我哋約定既元旦，在AIA加年華，我拖著女朋友嘉嘉既手，大家一齊歡送2014年，迎接新一年既來臨，係倒數既時候，我哋互相望住對方，
10,…,7,… ,5,4睇住嘉嘉甜甜既笑容，我一陣除咗要第一個同佢講happy new year之外，仲要送上我既初吻，3，2，1。
我同嘉嘉互相講一句，Happy New Year之後，我哋不約而同咁親吻對方，嘉嘉既咀好柔軟，錫得好舒服。維港既煙花燦爛閃爍，我攬住嘉嘉，感受住我哋兩人既戀愛交流。
我哋兩個人甜甜蜜蜜，希望所有睇到呢個故事既人都一樣甜甜蜜蜜。
祝大家新年快樂。
<完>