你陪我過聖誕，我陪你過元旦，好嗎？: 第二章
我打電話比絲打：我已經到左門口啦，請問你係邊到。
絲打：我等左你幾個字啦，以為你係玩嘢，放我飛機，所以去左化妝品嗰層睇嘢。
我：對唔住呀，我知我遲到係我唔啱，我真係好有誠意，唔喺玩嘢架，你係邊我過黎啦。
絲打：咁你係化妝品嗰度嗰入口等我一陣啦。
我：好呀，不見不散。
上咗化妝品嗰層，太多美女出出入入，身邊既男士又大方得體，一雙一對的戀人，女的依偎在男士既臂膀，男士散發雄糾糾的英姿。男人有拍拖既就會咁，我幾時先會有咁既一日呢。喺我雲遊太虛的時候，電話又響起。
我：喂，我到左啦。
絲打：唔，我見到你啦。
我：見到？我未見到喎…
—個女仔黎到我身邊：hi，你係阿簡？
我望住佢，我呆咗…絲打個形象同我想象中既完全唔同。
啡金色既短髮，頭髮掂唔到膊頭，眼都幾大，雙眼皮，查左睫毛液，化左個白面既妝，個咀既唇膏好紅，有件鮮紅色既披肩，吊住兩個白色既毛球，下身一條灰色既短褲，黑色有格仔圖案既絲襪，再加一對長靴。
一個好靚，好識打扮既女仔。
我：hi…hi…我係阿簡。
我見到靚女有點口疾疾，好緊張。
絲打：你做咩呆晒咁呀？
我：我…我有啲緊張。
絲打：唉，有咩好緊張姐，食飯行街之麻。
我：我…哈哈…喺既…嘅…唔…我未知…你點稱呼。
絲打：我叫Emma
我：Emma…我叫阿簡。
Emma：我知呀。係喎，你遲到喎，約左女仔都遲到，點計先？
我：我…對唔住呀…七點開始計，喺既。
Emma：你有冇買禮物比我架？
我：吓，我冇呀。
Emma：咁啦，頭先等你既時候，去化妝品部入面睇啱左個聖誕套裝，化左個妝就而家咁樣，我買左架啦，你比返錢我，當送聖誕禮物比我啦。
我：咁…買咗幾多錢呀。
Emma：$688。
我：哦，好。
呢啲喺咪叫做未見官先打三十大板呢？如果我冇遲到，咁喺咪會慳返呢七舊水。
Emma見我冇出聲，可能睇得出我有啲肉赤。
Emma:我都有買聖誕禮物比你架，嗱，送比你既。
係一個紅色聖誕樹造型既鐵盒，上面有一條金絲帶吊住，盒面寫住” LINDOR”。
我：多謝喎，我都鍾意食朱古力既。
Emma：鍾意就得啦，仲未食得飯，我可唔可以入去化妝品部度睇多陣呀？
我：好…去睇啦。
Emma自己行先，果然係無任何身體接觸呀。我全程就睇住佢睇人哋既化妝品同護膚品，我就覺得自己唔知企邊度好，好似企係度阻住人哋做生意。
八點鐘到左，我同Emma就去樓上既餐廳度食飯。
聖誕節當然要食聖誕大餐，我哋每人最低消費600，兩人即係1200。
二人聖誕餐1280包二杯香檳。我就點左呢個餐，有牛排，有火雞沙律，餐湯，仲有甜品。美美哋食左一餐，食到好飽，呢餐好好味，不過靜左啲，因為Emma無乜嘢講，我就更加無話題啦，所以我全程都係食食食，杯香檳就甜甜哋，幾好飲既，不過幾啖就飲晒。
Emma食得好有儀態，感覺好優雅，
佢並無我既狼吞虎咽，而且我都好有風度咁幫佢切開啲牛排一片片。只係到食甜品既時候佢表現得雀躍小小，將呢個朱古力心太軟完全徵服。
食左一個半鐘左右，我埋單，加一後$1408，簽帳之後，Emma就去洗手間。
我喺洗手間出面等左佢10分鐘左右，佢出黎之後。
Emma：好啦，我都要走啦，你計埋啲錢比我啦。
我：咁快？我哋未行街喎？
Emma：頭先咪行左陣囉，我約左我朋友架，我要走架啦。
我：吓，我仲諗住…咁好啦…
Emma：三個鐘頭，每個鐘三百，即係$900，仲有頭先買既聖誕禮物，$688，即係總共$1588，啱唔啱？
我：啱，你都幾好數口架喎。
我比左千六Emma，無理由要佢找12蚊比我架。Emma收到之後甜甜一笑。
Emma：多謝晒啦，祝你聖誕快樂。
我：聖誕快樂。
Emma：拜拜。
我：拜拜。
Emma電話響起，佢一路講住電話，一個同我揮手道別，而後轉身離去。我雖然今日過左第一次同女性單獨約會過既平安夜，但一啲快樂既感覺都冇，我依然覺得孤單寂寞，我覺得自己依舊係一個毒撚。平安夜，聖誕節，雖然今晚十九幾度，我依然覺得好凍。
我離開左海港城，一個人喺街上漫無目的咁遊蕩。街裡愛人一對對，互送鮮花千杯不醉，你的噩運繼續追…我點解會唱起”愁人節” ，原來呢首歌喺唱比我自己聽架，街上面有好多人唱歌佈佳音，成大班人有男有女，唱到鬼五馬六，彈結他既唔知彈緊乜，唱歌既唱得又唔齊，都唔知喺度做乜，不 過睇到佢哋男男女女咁一齊唱歌佈佳音，我個心都表示好葡萄佢哋。
我覺得今次既約會，係失敗既，奉勸巴打們以後唔好上當。我隨住人流一路行，去到尖沙咀碼頭，一路好多人，係海邊吹風，一路好凍，唔知點解我係咁行，始終唔肯走，可能我想感受吓人哋既歡樂氣氛啦，雖然唔關我事。其實都幾自虐，人哋開心只係反映自己既孤獨。
都行左好耐啦，差唔多十二點啦，都係返歸吧啦。周圍既人開始起哄，喺度倒數，其實聖誕節點解要倒數呢？你話除夕倒數我都明呀，新一年新開始。發射火箭倒數我都明呀，但點解平安夜會倒數呢？真係諗唔通，不過算啦，人數我又數。仲要大大聲咁，我好想發泄一下。
…6,5,4,3,2,1. Merry Christmas.
周圍既人都同身邊既人講Merry Christmas，我都同人講，咁啱我隔離又有個女仔，我就同佢講Merry Christmas，佢聽到之後竟然攬住我喊！嘩，咩事呀？
我比佢攬住，走唔到，佢身邊冇人理佢，原來佢都係一個人，我聽到佢喊得真係好傷心，係度啜泣，好淒涼。我都係講左句Merry Christmas姐，又無非禮佢，唔洗咁傷心呀麻，我本來想等佢喊完先，或者心情平伏啲先既。不過我未試過同女仔有咁近距離既接觸，佢既頭髮又了到我個 鼻好痕，我又唔敢拍佢膊頭安慰佢，所以我成碌木咁企係度唔敢亂郁，睇下佢會唔會自動自覺放開我。
但個鼻真係被佢既頭髮刺激得好痕，我忍唔住打左個乞嚏。個女仔比我呢下嚇一嚇，終於知道自己攬錯人，佢放開我，雙眼通紅咁望住我。
女仔：做咩呀？我啲香水攻親你咩？
我：唔係，你啲頭髮了到我個鼻姐。
女仔：咁就可以係個淑女面前打亂打乞嚏架啦咩？
我：哦，你個樣睇落都唔係好成熟，同埋我同你都唔係好熟。
女仔樂了：低能，做咩搞爛gat。
我：哈哈，喊係無用架，解決唔到問題。
女仔：我無喊呀，吹沙入眼之麻。
我：咁好囉，即係無事。
女仔：仲有呀，女仔喊做咩唔安慰下呀？
我：我唔係咁隨便既人黎架。
女仔：咁即係話我隨便搵個人攬住喊啦。
我：唔係咁既意思，我係話我未認識你，等我識左你之後你想點攬都得。
我唔知道自己發咩神經竟然可以講啲咁輕挑既說話，亦唔知道自己係咪食左熊心豹子膽竟然夠膽講啲咁既野黎撩女仔。係咪凍到傻咗呀？
女仔：我叫嘉嘉，你呢？
我：我叫阿簡，好啦，而家可以繼續啦。
嘉嘉：而家我又無嘢啦喎。
我：喺咁咪好囉。
嘉嘉：你一個人行街呀，你啲朋友呢。
我：我無呀，我無乜朋友架。
嘉嘉：我都係，我都無乜朋友。
我：咁啱，我哋做朋友囉。
嘉嘉：你都幾主動架喎？你成日咁樣撩女仔架？
我：邊係呀，我…其實唔知點解對住你講嘢會大膽咗架，平時我好怕醜架。
嘉嘉：我睇你似係唔知醜多啲喎。
我：我今日同平時唔同咗。
嘉嘉：係咩？你做緊野定讀書呀？
我：我做文員架，做咗二年嘢，你呢？
嘉嘉：我都係做文員架，不過第一份工。不過我做黎可能無得做啦，公司可能會執笠，上個月既糧都未出。
我：唔係掛，成個月都黎緊啦喎。
嘉嘉：係呀，已經第二次啦。
我：咩公司黎架？做咩唔去勞工處告佢呀？
嘉嘉：無用架，佢哋話協助，搞黎搞去都係得個吉。
我：你唔係做電視台吓麻。
嘉嘉：係呀。
我：仆街，亞視黎既？
嘉嘉：唉，咁又唔洗咁大聲，喺間咁既公司做嘢，好魚架。
我：唔緊要，喺咪一月一會執呀？
嘉嘉：唔知呀…搞到好down。
我：唔好怕，我陪你等結果，你陪我過聖誕，我陪你過元旦，同你一齊等消息，好嗎？
嘉嘉：咁快想約我下次去街？我哋今次既約會未完喎？
我：我諗有我陪係你身邊同你一齊過，無論好消息定壞消息，至少同你一齊面對。
嘉嘉：咁好啦，我同你一齊除夕倒數，你陪我一齊過。
無論順景逆景，踏出自己的一步，結果已經唔重要，幸福自己要爭取，結果就一齊面對啦。