細細個見到嘅靈異事件勿語: （十）中學 - 圖書館

（十）中學 - 圖書館

中二果年，我每星期有兩晚，落堂後都會去學校圖書館到幫手嘅。
主要係將d書上下架，包下新書，換下d雜誌咁。

有一晚，六點零，圖書館關左門之後，我自己響到將d書上架，
另一個都係新人嘅同學就響出面執下檯櫈，整理下櫃台d報紙咁。
而拎鎖匙果位大哥哥就去左籃球場射Key，話轉頭返黎鎖閘。

清左場之後，就得返我同女同學兩個人。





我就推住架書車，響個書架前面插返d書上去啦。

執下執下。

有d嘢係書架尾果度飄過。

我眼尾瞄到，心諗，累啫，心理作用。

然後繼續執書。





跟住，都係同一位置，係我果排嘅書架尾，再次有個影飄過。
今次有少少唔同，係由左手邊書架飛去右手邊，方向唔同左。

作為圖書館理員，都係要去睇下嘅，或者有人咁大濛未走呢。

我一步一步，行過去書架尾…

左右兩排都係書。





伸個頭出去，左擰擰右擰擰…

無嘢。 「格。」 突然，我清楚聽到背後個格書架傳黎一下清晰嘅「格」一聲，
即係好似你睇完本書放返上書架時所發出嘅聲一樣。

我即刻響自己個格書格前，從d圖書個頂，望過對面。

有個人。

我望過去嘅高度，岩岩係果個人嘅膊頭位置，著住我地校服嘅。

妖，原來係高form嘅同學，差d比佢嚇一跳。

我之後就行過去： 「唔好意思，我地收館喇。」





果位師兄托托眼鏡，同我講： 「我想借報紙。」

我：「唔好意思呀，報紙唔外借架，只可以係到睇架咋。」

我當時心諗，喂，睇你個樣都F4，F5啦，唔係唔知嘛。

佢，眼神好懇切： 「我想借報紙。」

我：「我地收左館架喇，一係你問問出面櫃位啦， 我話唔到事。」

佢：「唔該。」

之後佢就行左出去喇，我就繼續將書車d書上架。

大功告成。





「輝哥仲未返呀？」 推返架吉書車出黎，我同櫃檯執報紙個女同學講。

「未啦，肯定仲打緊波啦。」

「哦。係喎，頭先個男仔卒之有無俾佢搵到報紙？」

「咩男仔？」

「頭先個高form師兄呢，頭髮長長地，戴金絲眼鏡，好高，好瘦嘅呢，
岩岩之嘛，十分鐘前到，佢響入面問我借報紙睇，我叫佢出黎問你嘅。」

「講咩呀…頭先一路都無人喎。」

「呃…」





「咪玩啦，你睇下我地對大門落左一半閘架嘛，有人出入，實知架喎。」

「吓…」

「妖，咩呀？想嚇我呀？咪玩啦，我唔驚架。」

聽到佢咁講，我毛管都豎起曬，頭先位「哥仔」實在太「實在」，我一時間都無諗過…

會係果味野。

我打完場：「唔哈…係囉係囉…搞錯 ...」 跟手，阿館長輝哥返黎喇，問我地搞掂未，搞掂就可以閃人。

我地話ok架喇。





我預得即刻離開現場。

輝哥循例兜左個圈，然後係報紙架附近嘅一張檯上面叫過黎：

「喂，聽朝記得執返乾淨呢度。」

我同執報紙嘅女同學聞聲即刻衝出去檯面一睇，好多好多份舊報紙，攤開曬放左響張檯到。

佢望望我，我望望佢。

無出聲。

我同佢都知道，呢d報紙我地一定無拎過出黎。

最離奇係…我地發現果幾份拎左出黎嘅，都係同一日嘅報紙。

「駛唔駛而家執返好去…？」我地問。

「聽朝開館先啦。走喇，都夜喇。」輝哥答。

之後我地三個就由得d報紙攤曬響檯面，關閘走人。

後尾問返先知，原來…

好多係到做過圖書館理員嘅都見過，朝頭早返黎開館果陣，有幾份報紙攤開左響出面個位到。

而報紙上掀開嘅版位，次次一樣。

五年前嘅三月，本校學生一宗車禍嘅報導，
上面個「哥仔」張相片，就係頭髮長長，戴金絲眼鏡嘅…

好多個朝早，報紙就係咁，攤開出現響圖書館嘅檯面上...

就好似，琴晚，

有人坐響果到，

睇過一樣。

當你問返呢度嘅管理員，差唔多，個個都聽過呢件事。

歡迎，校友相認。