(十一)中學 - 西瓜波

唔知大家記唔記得咩係PE室?

通常都係響操場附近,專門用黎擺放籃球呀、球拍呀、雪糕筒呀等等嘅小房間。
一上體育堂,就要走去入面拎呢樣拎果樣。

我地PE室入面個角落,擺左個西瓜波,唔知邊個買嘅,但一入去就實見到,有時同學都會拎出黎踢下玩下咁。

「玩完一定要擺返入去。」 高form師兄煞有介事咁一再強調。





「扲黎玩唔緊要,玩完記得擺返入去。」

我一次都無拎過呢個西瓜波出黎玩,事關有次,放學係課室門口望落操場,
見到有三個高form嘅圍住黎踢,我係樓上見到,
除左佢地,仲有個五、六歲到嘅細路仔跟住佢地一齊追住個波黎跑。

我就知,呢個西瓜波好邪。

今次,唔係我本人經歷(終於)。係聽師兄講返嘅。





話說,有幾個籃球隊員放學留係學校練波,練完收返d野去PE室果陣,
其中一個叫大針嘅,貪過癮拎左過西瓜波出黎踢,踢到入更衣室,周圍咁踢。

之後唔知發咩神經,玩到highhigh,
一下踩落去個西瓜波到,踩到凹曬,得返成片野咁。

之後大針就話不如一野丟出學校d圍柵外邊,當唔知呀邊個唔覺意炒飛機咁囉。
佢隨手就好似飛飛碟咁一野丟左出校外,乾手淨腳。





走人放飯。

事與願違,事情當然無咁順利完結。

就係果晚,大針自己係屋企個廳到 打saturn,夜媽媽,
佢聽到有細佬仔係佢門口走廊跑黎跑去嘅聲響。

起初佢都無理會,之後愈黎愈嘈,直情聽到「嘭嘭嘭」嘅拍波聲。

「無撚野呀細...」 大針衝去門口,一開門就想屌到飛天。

出邊,一個人都無。

只係得條長長走廊,同壞左閃閃下嘅冷冰冰白色光管。





睇左睇右,無野,然後關門。

「嘭。嘭。嘭。」

一關門,又傳黎出面大力拍波嘅聲,好似打籃球咁,
一拍一拍,期間,大針仲清晰聽到有?仔嘅嘻嘻笑聲。

佢諗住今次實舟到個細佬,

「玩撚夠未呀!」

一開門,寂靜一片。

只有重覆又重覆傳黎自己玩撚夠未呀玩撚夠未呀玩撚夠未呀嘅叫喊回音。





大針開始識驚,即時關門上鎖。

埃係門後嘅佢,隔住條大門,再次聽到後面傳黎嘭嘭嘭一下一下嘅撞擊聲。

佢吞吞口水,慢慢哄埋去防盜眼,向出邊一望。

佢成個崩潰暈低。

當佢從細細嘅防盜眼望出去果陣,佢見到門口有一個人頭,
一個細佬仔嘅人頭,一拍一拍響地下到彈起,掉落,彈起,掉落。

發出「嘭。嘭。嘭。嘭。」一下一下嘅聲音。

就好似拍打籃球咁。





而最恐怖係,個細佬仔人頭,面向住大門,
一彈一彈,對住防盜眼後面嘅大針... 嘻嘻地笑。

事後過左幾日,有人見到面青囗唇白嘅大針拎住個完好無缺嘅西瓜波,
放返入學校個PE室。

自此,都無再參加乜野課外運動。

而呢個西瓜波隔左好耐,仍然一直擺放係果個角落。

「扲黎玩唔緊要,玩完一定要擺返入去。」
西瓜波    參考圖片

已有 0 人追稿