(十二)突發 - 執到寶

突發,早排有單天降橫財,解款車跌錢嘅新聞,
雖然講緊我嘅中學生活,但都想先講講執到寶。

有日,坐響公司,有個客仔衝入黎鋪頭。

「唔好意思,之前搵你睇過xx大廈10樓H嘅…可唔可以幫我…擺番入去…」
然後,佢拎左一個細細地嘅翡翠雕像出黎,推左響我抬面。




驟眼睇,係幾靚,好似幾名貴咁。

原來,某日我同呢個客仔去睇過果個單位,
佢響睇樓期間,見到房裡面有個雕像放左響角落。
見到好靚好吸引,又諗一日有咁多人出出入入睇樓,
點會知道係自己,就順手牽左過羊。


照佢講,怪事就發生喇。

佢拎左返屋企之後,就放左響電視機櫃。


佢個仔,岩岩識行嘅歲數,
果排成日都自己爬去果個位同舊雕像依依俄俄咁,有時仲企響果到係咁笑。


起初佢老豆,即係個客,都以為係舊翡翠靚,吸引bb仔望多幾眼咁。

但係情況就愈黎愈嚴重。

佢個B開始每晚都無覺好訓,

訓訓下又突然自己走返去電視機櫃附近,
平日玩玩具又突然集中曬響果個範圍玩咁。


試過抱住佢一離開果個範圍,
係咁喊,喊到氣來氣喘,
喊到嘔出黎,一接近返雕像果個位,
就好返無事。

佢老豆老母都知呢濟領野,
跟手掉左個翡翠雕像出垃圾房。 
心安理得...以為。

跟住果晚,佢果仔成晚坐左響大門口,
無喊無出聲咁望住條大門,神情空洞呆滯咁。
佢老豆一打開對門,
舊雕像完完整整企返響門口。

之後佢第二朝就拎左黎我公司…



抬面喇…

妖…

咁我就姑且同佢上返去10H喇。

黎到門口,我如常敲敲大門,
扭扭鎖匙孔,一開門,
有個細佬哥跑出黎,
我同客本能咁避一避開。
細佬哥就係我同個客腰中間跑過左。 

我地回頭一望,條走廊空空如也,
乜都見唔到。


但係單位去到lift口只有一條路,
由屋企跑出黎,
到我地即時擰轉身望,
係無理由會突然唔見左個細佬。

但我地竟然一齊見到。

咁我就叫個客放返個雕像去原位先啦。

老實講,雖然奇怪,但呢次我又真係唔係好驚。
可能知道,喂,就算有野,都唔係衝着我而黎,
係都係搵我隔離果位啫。

之後,為求安心,佢搵左師傅上去睇睇,
我無反對,反正對我黎講,唔驚動業主就OK。



師傅一睇,發現原來單位之前個租客有養鬼仔習慣,
果舊咁靚嘅雕像係奉獻比「佢」嘅。
之後搬走,未有帶走乾淨,
個細佬哥就一直響個單位裡面。

等待着下一個有心人…

所以話,細細個阿媽都有教,
有d野真係唔可以亂執。 

不過,又咁講,成百萬當前,
如果案件重來一次,你會唔會執呢?

仲有,我好想知邊個可以證實差佬同押款員無落格?


我總覺得,矛頭唔應該一面倒問責於市民嘅。

有人話有錢駛得鬼推磨,咁你地覺得呢?
已有 0 人追稿