(十四) 中學 - 又係搭lift(升降機)

我真係好驚搭lift,
之前都同巴絲分享過我搭lift一定側身入嘅習慣,

今次再講搭lift。

中學嘅我真係成日掛住玩,唔願返屋企,
有日放左學上同學油麻地屋企打機,
佢地上曬去先,我後join,
自己搭lift上去。



佢住15樓。 升降機嘅樓層係

G,3,5,7,9,11,13,15,17。

我如常咁入lift,噤15字樓。

對門關上,突然,彈返開。

之後有個伯伯走左入黎,企響噤lift個位到,


無嘢啦,佢噤9樓,lift門再次關上。

我埃住lift嘅角落位,果刻望望個阿伯,
仲心諗,駛唔駛咁趕呀呀伯。
不過呢個阿伯幾有型,立曬頭,背脊望佢,
佢件衫黑色帶d紅色花咁,幾搶眼。

叮一聲,9樓lift門打開,
阿伯出lift,然後門關上。



咁架lift就繼續上喇。 

「叮」。 

11樓,lift停左,一打開門,
頭先個阿伯企左響到,行入lift! 
我當堂呆左,唔識反應,
架lift由9樓上到11樓,
我諗都唔駛5秒,阿伯點可能9樓出,
即時11樓入返黎?

而佢,真係入返黎。

我即刻淆喇。

背靠住lift後面有咁貼得咁貼。



阿伯同頭先一樣,都係企返響噤lift個位置,都係噤9樓。

我心諗…

我一陣出lift咪要經過佢?
阿伯一直望住前邊d lift制。我一直望住地下自己對腳。

快d啦快d啦快d啦!

快d到啦,我決定當lift門一開,即刻急步就跑。
雖然係短短幾層,但呢程lift,我好似搭左好耐好耐咁… 

「叮」。 lift門打開。
我講左句「唔該借借」,急步就行。



出lift轉左第三間,「叮噹!叮噹!」我快手噤響門鐘。

呃…

仆得街,叮咩噹,
我個同學嘅門鐘聲都唔係咁嘅聲,
一睇,13樓…

我出左13樓。

我唯有選擇,行多兩層樓梯…

我步步為營咁推開兩條防煙門,
佢呢道d後樓梯好窄,好暗,


闊度大概唔夠一個人張開兩隻手咁闊。

我一步一步行上去。

我個心跳得好快,
我真係好驚,好驚…個腦仲不停洐生d恐怖嘢,
好驚如果個阿伯係樓上行返落黎我點算…
好驚如果呢刻擰轉頭見到佢響後面點算…

快步標上兩層,到達15樓,推門直出。
狂噤門鐘,狂拍鐵閘,入屋,好彩無事。

同學仲勁笑我做乜面青青慌室室咁,
我坐左好耐,飲左好幾杯水,先粗略同佢地講到。



之後屋主講返,先至知,原來11樓,
上星期有個伯伯響單位裡面突然休克暈倒,
被發現嘅時候已經送院不治。
呢排都聽聞有街坊話見到個伯伯響11樓走廊到徘徊,
好似入唔到屋咁,又有人見過佢企響密碼閘出面等。

伯伯可能根本就唔知…自己已經走左。

我地成班同學聽完,即刻狂鬧屋主同學:

「頂!明知呢d時候仲叫我地上黎打機!」 

佢答:「就係明知呢d時候…先至叫你地上黎打機之嘛…你估我唔驚架!」 

唔…都岩嘅…

果晚,我地好早就散band走人。

順帶一提,果時嘅我真係唔知,當日伯伯著住果件…
搶眼黑色帶紅嘅衫,我大個左先至知道,

原來…

叫壽衣。




又係搭lift  參考圖片


已有 0 人追稿