(二十五)影到嘢

早兩日睇生果動,睇到消防員奮不顧身勇救跳樓女生個單新聞,
在此先衷心比like我地偉大嘅消防員先,果下堅係有型。

睇住條片,除左差d見到個女仔跌落樓嘅動魄驚心外,
亦不禁鄧渣機拍片位花生友心裡一寒。

萬一,我話萬一,個女仔快左一秒,消防員黎唔切捉實佢隻手,咁拍片位仁兄...
就全程錄底左佢由活生生到飛墮平台再繼而爆頭嘅血肉模糊影像,


全程紀錄曬係自己日日放係身邊嘅手機裡面。

你估,你會得閒無事做噤返出黎睇嗎?

到時,可能係你唔睇唔得…

聽過一位靈探朋友講,(靈探,即係靈異探險,目的係去撞下睇下撞唔撞到有野...
強烈利申,我離奇家遮係極唔主張架,都講左N次啦,好地地相安無事,你又走去搞九人,好易出事架。
正如你踩人場,佛都有火啦。)



果位靈探當晚組隊去到屏山達德小學探靈,其間用個手機拍下周圍d環境咁,
唔知係開心定失望,果晚乜都見唔到乜都無出現,
好多人話而家太多人去,去到濫曬。
不過果晚就有段小插曲,就係果個靈探貪得意,其間入到一個班房入面,拍拍下片,
突然指住一個女同行後面,扮曬驚到震咁,話佢後後後面有有有野...
果下個女仔梗係嚇到癲啦,果位靈探就得意揚揚咁笑人咁細膽點做靈探吖。

佢真係好on9,我不得不大聲再講多次。

好啦,果晚返到屋企。訓訓下,佢俾d聲嘈醒左。



「喂!唔好望!你你你…後後後…面好似有個無頭嘅黑影吖…」 原來,佢俾自己把聲嘈醒左。

佢坐起身一睇,係自己個電話無啦啦開著左播緊呢條片。

佢心諗可能係自己反訓hi到d制,出返去主頁,再訓過。

無幾耐,佢又聽到好嘈…

「喂!唔好望!你你你…後後後…面好似有個無頭嘅黑影吖…」
「喂!唔好望!你你你…後後後…面好似有個無頭嘅黑影吖…」
「喂!唔好望!你你你…後後後…面好似有個無頭嘅黑影吖…」

佢彈起身一睇,部電話又播緊呢條片,
仲要係岩岩播到佢講呢句果個位到,好似卡住咁不停響呢個位重覆又重覆…



佢拎起手,淆一淆,望落條片到,好彩無咩特別異樣,都係現場拍出黎嘅環境,
佢手起刀落,噤delete,打算擦左去一了百了。

結果…?

無論佢delete左又好熄左機又好,果晚,佢部電話都係不斷咁彈返呢條片出黎,成晚重播重播重播…

好似要提醒佢知:

「喂!唔好望!你你你…後後後…面好似有個無頭嘅黑影吖…」

靈探哥終於知道領左野喇。

第二朝,佢即刻跑落紙紮鋪尋求協助,聽師父講,


帶曬元寶蠟燭香返去現場,誠心拜祭道歉,先至叫做平息。

為求安心,佢仲即日到先達廣場賣埋部電話,免得夜長夢多,件事終究告一段落。

條片係咪真係delete到,無再突然彈出黎?

咁就要問問…

下一個二手買家喇。

如果你近日都諗住落先達買部二手黑色iphone 5S嘅,
小心留意一下個相薄位…


影到嘢  參考圖片




 
已有 0 人追稿