大哥結左婚之後就好少返屋企,初頭大家都好唔習慣 

尤其係爸爸,食飯時侯無人陪佢飲啤酒,爸爸少左野講 

當然啦,就算爸爸要講野,對象都唔會係我,當然係細佬啦 

每一日食飯阿妹就同媽媽睇電視笑到卡卡聲 

爸爸就同細佬傾計 



我就好似搭檯食飯咁 

自從上次我放榜果日同爸爸有多d野講之外,所有野都同以前一樣,無改變過 

暑假我去左大哥公司到做暑期工 

由於請我既係大哥既關係,可以當我長工唔係暑期工 

所以人工都算幾高,認識左好多藥房既知識 



藥房係一個忙到抽筋既地方,我既工作時間係十一個鐘,返上午九點到八點 

雖然時間好長,又要企,但係我好鐘意個返工時間 

剛好過左我屋企既晚飯時間,我唔洗再搭檯食飯 

出黎工作令到我性格外向左,閒時食飯同同事傾計,聽到好多唔同既經歷 

使我可以麻醉自己 



『原來人地發生過d咁既事,原來我都唔係好慘姐』 

慢慢我唔只係唔想返屋企食飯,我越黎越遲返屋企 

阿妹有時都會打比我問我係邊,我都係答佢加班 

其實我放工之後去左機舖打機,同事話去飲杯野,我都會主動話跟埋去 

我只係唔想自己一個人 

學識左飲酒之後,我先至明白爸爸點解每日都要飲酒 

原來酒係一樣咁撚爽既野 

飲左酒,我可以忘記宜個家既不公平 



飲左酒,我覺得我直頭唔需要所謂既屋企人 

那怕只有一秒,我都會想忘記 

由開頭由人地叫先去一次,半個月已經改變到我晚晚都要去飲,唔落吧既話,就買幾罐啤酒坐係樓下飲 

今晚,我係樓下飲酒既時侯,我見到我阿媽 

『杜家和』我聽到阿媽叫我 

『咩事』 

『你係到做咩呀?』 



『飲酒囉』 

『你幾時學人飲酒架?上返去啦,唔好飲喇』 

『得啦,你上返去先啦』 

『對面屋張太話我知晚晚都見到你係到,你發生咩事呀』 

『關你撚事咩』我從來都唔會對屋企人講粗口,只係飲左酒衝口而出 

『你講多次』阿媽雙眼張到好大,好似唔相信佢自己聽到既野咁

我無應佢,開一罐新既啤酒 

阿媽想打巴我,我一野捉住佢隻手 



『你又想打我呀?發生咩事?點解你地要問我發生咩事?你地個個都知道咩事,點解仲要問我?從來你地都唔過問我既野架啦?你宜家即係落黎扮關心我?』 

『哦哦哦..我知喇,因為張太...我知啦...你驚我失禮你...所以叫我返上去..okok唔緊要..我去第二度飲』 

『家和』阿媽流住眼淚捉住我隻手,但我睇到我阿媽喊,我完全無感覺 

『喊?你咩喊呀?我喊既時侯你地有無理過我呀撚樣!』我已經忘記左佢係我阿媽,只係我一個仇人 

『點解你會變到咁』阿媽望住我搖頭 

『媽,你唔好係到扮痛心,扮關心我啦,好撚嘔心呀』 

『o拍!』其實我見到我阿媽打我,但我無避,亦都無擋 



『嘿...我發覺你真係好好笑,係我細個最需要關心既時侯,你地唔關心我,我成左年啦,我飲酒係唔撚關你事架,唔好同我講咩我係你個仔宜d垃圾說話,咁多年啦,盡在不言中啦林巧琪』我直接叫我阿媽個名 

我阿媽喊到收唔聲,我企係身,用手抹走我阿媽d眼淚 

『媽,對唔住,你要我唔飲酒,咪唔飲酒囉,你要我返屋企咪返屋企囉..不過..我想問你一個問題,宜個問題我只會問多一次』 

『媽,其實點解你地要咁偏心』 

我阿媽呆左望住我出唔到聲 

『阿仔..對唔住..』 

『得架喇,我明,讀埋個中六我就會走,我上返去訓先,仲有,你都係叫返我杜家和,你唔好叫我做仔』
 
已有 0 人追稿