[家庭]係我屋企入面,我只係一個配角,一個可有可無既人: 大哥的請求

第二日返學,我將我屋企既野用左六堂時間向雪兒解釋清楚 

家庭溫暖滿瀉既雪兒聽到我既經歷之後,問左我好多問題 

當然一定有宜句啦 

『點解佢地咁偏心既?』 

『好問題,我用左十幾年時間都諗唔通,我知道既話一定會話你知』 





『sorry呀我無心架』 

『傻啦,咁多年我都係咁過,你一個問題算得係咩』 

今日放學既時候,見到大哥同細佬企左係到 

『大哥』 

『哦..佢就係雪兒呀』 





『係呀,er..宜個你見過啦,我細佬家宇,宜個我大哥家民』我向雪兒介紹 

『家民哥哥』 

『係呢,你地點解係到既』 

『無,收到風我個細佬夠膽死挑戰個老豆,咁威梗係要賀下佢啦』我大哥就係一個咁有趣既人 

『下?唔洗返工咩我地』 





『我同你請左假啦,係呢雪兒賞個面一齊去玩啦』 

『好呀』雪兒一口答應,睇黎佢對我屋企既野都幾有興趣 

我唔抗拒雪兒想了解我,我更加想將自己既所有野都比佢知道 

咁多年除左大哥之外,就只有雪兒會關心我 

大哥首先帶左我地去唱K,酒吧我去得多,其實今次係我第一次唱K 

我相信好多第一次去唱K既人都係坐足全程,你懂的 

我都唔例外,反而雪兒就做左咪霸,由頭帶到落尾 

唱完K大哥就帶左我地去食我最鐘意食既泰國野 





全晚我地幾兄弟有講有笑,雪兒亦都好識相咁好少出聲,比多D機會我地兄弟傾計 

食完之後,雪兒去左洗手間,細佬就行左去睇模型 

得返我同阿哥企係條街到,大家都無講野 

好似大家都等緊對方開口先咁 

『你又知我琴晚同阿爸嘈過黎既?』明知故問,但我實在唔知講咩好 

『無,今朝一早你細妹打比我,話你同阿爸嘈得好緊要,又要搬又話盛咁..』 

『係呀,無錯』 





『做咩要搬呢?』 

『其實屋企既情形,你都好清楚架啦..』 

『我知,但係有無必要搬先』 

『有』 

『家和你聽我講』大哥捉住我隻手 

『你仲細,唔好搬好無』 

『哥呀...』 

『我離開左屋企,你就係最大果個,我仲要靠你同我睇住班細佬妹架』 





『如果日子真係過得好辛苦呢?』 

『我怕你一個人係出面流離浪蕩呀你明唔明呀』 

『我已經決定左』 

大哥望住我對眼,我亦都用我既眼神話比佢聽我已經諗清楚 











『家和,當大哥求你好無呀?』


我好了解大哥,大哥唔係一個自私既人 

為左屋企,唔讀書去做野比呀爸打佢都會去 

自己有頭家每個都月都拎六千蚊比阿媽 

從來無聽過阿哥會喊辛苦,喊難過 

作為大哥,佢相當稱職 

我相當尊重佢 

我其實一早都知道,我真係搬既時侯,大哥實會叫我唔好 

但我無諗過大哥會用個求字 

我輸左比佢地,我應承左大哥會留係屋企 

但係大家都好清楚,個家既裂痕唔係一時三刻可以修補到 

何況我根本唔想修補 

有時兜口兜面撞到正,大家都好似睇唔到大家咁 

就好似一對已經離左婚既夫婦,因為層樓賣唔出焗住仲要一齊住咁 

『我咁做,都係因為大哥』 

嗯,無錯,我又再為左人地過d唔想過既生活 

阿妹同細佬都好想我同父母修補關係 

奈何大家都唔願意咁做 

可能說話講太白了,比唔到空間大家再扮落去 

有時將心底話講得太多,同時亦都將雙方迫入死角 

大家都無彎轉 

我依舊每日七點出門口,夜晚一點先返屋企 

同父母零交流,只會同細佬妹講野 

我覺得屋企負能量比以前仲重左 

大哥叫我留低其實唔係一件好事 

大家都好辛苦,但對大哥既承諾我又唔能夠唔遵守 

唯有睇下邊個頂唔順先 






簡直係酷刑