我無諗過結局會變成咁,我仲有好多想鬧佢既說話未講 

對手已經變到咁,我都無意思去諗佢既壞處 

我可以係個心入面唔再責怪佢,但我唔會原諒佢 

二零一二年,每個年輕人嘴邊都掛住working holiday,好多人都話要澳洲體驗生活 

雪兒提議一齊過去做一年野,當儲錢結婚 



『喂你睇下,jelly佢地過左去玩得幾開心,黎啦..我地過去玩下啦..』雪兒開佢個朋友個facebook比我睇 

『成年喎,我點請假呀』 

『我都知...』雪兒扁嘴 

『我打去試下問下啦』 

自己知自己事,學歷唔高,有個店長我做都已經偷笑,仲話要請一年假去澳洲,實在難搞 



但係雪兒又好想去,我唯有硬住頭皮打比老闆問下 

『喂?老闆呀?』 

『點呀呀和,公司有事呀?』我老闆係一個開連鎖藥房既生意人,只要有利可圖既生意佢就有興趣 

『唔係,我想問老闆你,我想請一年假去澳洲,請問得唔得呀?』 

『過澳洲?你諗住去玩果d乜春holiday呀?』 



『係呀』 

『梗係唔....呀和,請一年假唔係唔比你請呀,但係你走左,第二個上左位,到時你無得怪我架喎』 

『我都明既..』 

『阿和,你得果廿幾歲就有店長你做,你實大把世界架』 

『我知我知....』 

同老闆講左十幾分鐘廢話,佢無直接同我講唔得,佢換轉一個講法同我講 

我去得既,返黎就咩都無 

我十六歲就係藥房做兼職做到宜家,我都唔想放棄 



『點呀?』 

『唔得呀,老闆話唔比』 

『唔....乜咁架』雪兒好失望 

『係囉,我都無辦法』 

『....一係我自己一個去啦』 

『下,唔好啦..可能都有得傾既』
我搵左大哥商量,我約左佢係一間茶餐廳到碰面 

『嘩,老闆都講到咁,都好難囉』大哥係佢既iphone 4到睇緊究竟咩係working holiday 



『就係想問下你有無辦法』 

『無架喇,你真係要自己考慮下,店長個位好多人爭,你一走肯定比班人搶左你個位,到你返黎,老細仲邊得閒理你,邊個搵到錢就睇邊個架啦』 

『嗯..』 

『你真係好想去?』大哥咬住飲筒望住我 

『嗯』係雪兒想去 

『想去就去啦,大哥幫你拆啦』 

『得唔得架?』我好懷疑,我唔係懷疑大哥幫唔幫到我,係懷疑會唔會影響到佢 

『我話得就得啦,你落實到幾時去既話,我會幫你同老細講架喇』 



『哦,多謝大哥』 

『可以早d返黎就早d返,過到去有咩事記得忍讓下,要睇住雪兒................』 

同大哥見完面之後,就將好消息講比雪兒聽 

我地馬上去搞工作度假者簽証,準備好所有野之後,雪兒亦都返左公司辭職 

我地決定左十一月一號過去,等做埋個十月先 

係過去之前,我地幾兄弟姊妹食左餐飯 

『二哥出國喎,巴閉啦,帶條鬼妹返黎比我呀記啦,食舊白切雞啦,過到去得炸雞你食』細佬夾左舊雞比我 



『帶你條命我同雪兒一齊過去』 

『阿媽知唔知呀?』阿妹問我 

『唔知呀..你鐘意咪話比佢知囉』 

『哦..不知佢宜排都唔得閒理我啦』 

『阿媽點會唔理你呀?』 

『阿爸早幾日入左醫院呀,阿媽日日都留係醫院到』 

『...佢咩事呀』 

『佢係老人院暈低左呀,咪又係糖尿囉』 

我一向都知阿爸有糖尿病,但無見過佢戒口 

『放心啦,我地會睇住佢』大哥說 

『放心,梗係放心啦,我都無擔心佢』

已有 0 人追稿