經過我一晚考慮,我決定左 

唔理就係唔理 

我係唔會探阿爸同阿媽 

我唔想辜負當日決心離開屋企既自己 

雪兒無問過我有無探阿爸,就似從來無聽過宜個消息咁 



我同佢依舊為左我地將來既家庭努力 

一個屬於我杜家和既家庭 

就算幾兄弟姊妹見面,食飯都無再提起過老豆 

可能見同我講完都無表示就唔再講啦 

細佬成為左我地杜家唯一一個大學生 



上左大學之後,次次出黎食飯都見佢唔同女朋友 

岩既,年輕人係應該玩多d,況且我細佬有本錢 

細妹又有左bb,我同雪兒都經常去睇佢 

細妹由煎隻蛋都唔識,到打理到間屋井井有條 

細妹真係好叻 



爆缸華同人打工咁多年,儲落左唔少人脈,加上功夫夠,做野有交帶,已經走左出黎做判頭,自己判工程做 
見到細妹生活越黎越好,大家都好開心 

原來唔需要父母,我地幾兄弟姊妹都可以生活得好好 

只要大家個心係記掛住大家,無論大家係邊都係一家人 

我已經好多年無再見過父母,連實際係幾多年我都唔記得左喇 

我再無多餘既時間去諗佢地 

我要儲錢,我要買樓,我要結婚 

直到細佬既畢業典禮,我再次見到我既父母 



如果你唔同我講,我直頭唔認得果個人係我阿爸 

佢坐係輪椅上面,阿媽係後面推住佢 

爸爸滿頭白髮,坐係輸椅到咩反應都無,係條頸到綁左一條口水肩 

『嗯,呀呀..呀』佢已經連句子都講唔到,無人明佢想點 

佢由頭到尾都望住地下,可能就連佢係黎做咩都唔知 

我無諗過佢已經變到咁嚴重 

媽媽亦都蒼老左好多 

佢望住我,我望住佢 



我知道佢有野想同我講 

但我唔想聽,我唔想聽完佢講既野,會影響到我心入面既諗法 

甚至只同細佬影左一張相就走,全家幅都無影 

我怕細佬唔開心,無同佢講聲,就靜靜咁走左 

我返左公司坐係到,我滿腦子都係爸爸個樣 

我係到諗,究竟佢仲記得幾多,佢仲記唔記得對我做過既野 

我唔想到頭黎只有我記得宜份痛苦 





爸爸,你好自私
已有 0 人追稿