26.

「有冇咁啱?點算呀?」我六神無主,兩股強大的氣場正慢慢向我逼近。

「喂,葉青倫,見到你就啱喇。」如素姨指著我說。

「阿姨。」我恭敬的上前,還未搞清楚如素姨的來意。

「我同你地訓導主任已經投訴咗,你以後就唔好再行近我杰寧,我唔該你俾心機讀書,咁細個人就算要搞男女關係都唔好走嚟搞杰寧。」如素姨如機關槍一般的說話,令我肯定了她今天出現的原因。



「媽咪呀,唔好咁講嘢啦。」杰寧在旁說道,她的雙眼一直的看著我,我知道她想要我忍耐。

「阿姨,我對杰寧係認真…我…」我提起勇氣,嘗試向如素姨解釋。

「幾多歲人呀認真?讀完書識搵錢搞掂自己先講啦認真。」如素姨又是幾句狂風掃落葉,我只有語塞。

「喂,妳咁大聲做咩呀?我細佬有咩事得罪妳?」我背後這時傳來另一把聲音,對!我忘了大家姐正向我走來。

「妳就係佢家姐呀喇下?妳個細佬嗰日錫我個女呀,妳再嘈我就告佢非禮。」如素姨不甘示弱,大家姐也氣定神閒:「錫咪錫囉,係唔係非禮妳問自己個女,兩個都咁大個拍拖都好正常,使唔使手指指咁鬧人呀?」



「妳唔好搞錯,我個女仲大好前途。妳細佬係咩人我唔知,我亦都唔想知,我只係叫佢唔好再搞我個女。」如素姨有點激動,動作開始有點大。

「我叫唔郁我細佬做啲咩喎,不如妳叫妳個女唔好俾我細佬見囉。」大家姐攤攤手,一副無賴的樣子。

「大家姐,唔好嘈啦,算啦算啦。」我心裡有點間爽,但在杰寧面前總要做點戲。

「我地姓葉嘅可以俾人蝦架咩?兩個人感情事,就算你地仲未成年我都會尊重你地,唔係持老賣老咁一味捧打鴛鴦。」大家姐指桑罵愧,在旁的如素姨更加生氣。
「杰寧,走。」如素姨轉身離開,杰寧也趕忙跟上。但突然之間,如素姨又再一次轉身,指著我說:「我同你講多一次,再俾我見到你搵杰寧,我一定搵律師告到你地家無寧日。」

這時我看看大家姐的反應,她態度明確地有點不同。我不知道這跟我們上次的爭執有沒有關係,最重要是大家姐在我最苦惱的時候,跑出來維護我。



「大家姐,我地走啦…」

「走啦,去搵青兒先。」

大家姐跟著我往學校方向走,這時我才有時間答謝她:

「唔該哂大家姐。」

「使咩多謝,不過我有小小事問你。」

「係?」

「呢個女仔你拍咗幾耐拖?」



「做咩呀家姐?」

「你唔知佢媽咪係邊個?」大家姐突然問我

「我唔知道呀…妳識佢?」

「佢叫周如素,上市公司天貿國際嘅主席,妳個女朋友屋企應該好有錢。佢最尾嗰句話會告我地,唔係講笑架,所以你都係唔好搵你女朋友住。」

「上市公司…」我對這沒有什麼槪念,但很有錢就應該是很有辦法,要發幾封律師信並不是難事。

「青兒仲有二十分鐘先走得,我地等等佢啦。」大家姐跟我站在學校的門口等著,期間佢一直在抽煙,好像煩惱滿多的樣子。

「大家姐,點解妳會識如素姨?」我禁不住問。

「你上次坐我車都唔知我係做記者?呢啲咁嘅名人我見佢仲多過見你二家姐。」大家姐幽默的說,其實不算是個很難相處的人。



我跟大家姐一直有說有笑,氣氛一直也不錯。

忽然,我看見,媽正從遠處向我走來…
已有 0 人追稿