薛可正作品 - 回到過去，星晴擱淺，說好的幸福呢？: 27

27.

我想不到為什麼會出現，我只是在想，她跟大家姐碰面會有什麼結果。不過也不由我來決定，因為在我還未想出方法之前，媽已經看見我。

「阿B…」媽正要大聲開口叫我，卻因為看見我旁邊的大家姐而停下。這時更巧合的事也出現了，我看到二姐同一時間由學校內走出來。

同一時間，三個有可能會爆的炸彈同時在我身邊出現。

「大家姐，妳又會同阿B一齊嘅？」二姐迎面走來的神色有點礙重。



「係呀，啱啱同個有錢婆嘈咗兩句。」大家姐答道，而這個時候媽也快要走到來我身邊。

「係唔係張杰寧個媽咪？」二姐突然問，我和大家姐也同時看著她。不過一秒後我的思緒又回到媽那邊，我在想辦法令這個隨時爆炸的場面不要硬著陸。

突然…

「妳地兩位係……？」想不到是媽先跟她們打招呼。

兩位姐姐都帶點驚訝，但二姐看到媽後，她的反應明顯的轉回平靜。對，二姐曾經在車上見過媽的，只有大家姐應該還沒有見過面。



「妳係…？」大家姐先向媽作出回覆，但二姐連忙伸手把大家姐的說話先壓下，自己再舉步上前：

「佢係青倫媽咪…阿姨妳好，我係青兒。」二姐友善的伸出右手，笑臉迎迎的看著媽。反看大家姐倒是有點轉不過來，剛火力全開的應俯了如素姨，轉個臉來又看見二姐的親善舉動。

「哦……妳好呀，妳係阿B嘅姐姐，係呀我認得喇我認得喇…」媽禮貌的握過手，但沒有再說下去。誰都知道她唯一一次見過二姐的情況是怎麼一回事，再瞎裝下去只有尷尬。

「呢個係我大家姐，佢叫青旋。」二姐向媽介紹大家姐，但大家姐的反應好像有點遲疑。

「阿姨…妳好…我係青倫大家姐，我叫青旋。」大家姐沒有伸出手來，只是點頭問好。



「妳地叫我潔心姨啦，我係青倫嘅媽咪。」媽也和善的介紹自己，但尋常人應該沒有我這種經歷吧，媽和姐姐是陌路人，竟然可以當住你的臉前，來做這樣一個吊詭到極點的自我介紹。

「媽，點解妳會嚟嘅？」我試著把話題打開，免得這氛圍維持太久。

「你嘅訓導主任打電話俾我，話有位家長投訴妳騷擾人地個女喎，到底件事係點呀？」媽沒有怪責我，因為她絕對清楚我地性格。

「嗰位應該係杰寧媽咪…」我無奈的承認。

「衰仔你有冇做過啲咩呀？」媽的意思我當然明白，連忙搖頭說沒有。

「我出嚟時都想同你地講，我喺教員室都聽到，嗰個女人去咗訓導主任個房大吵大鬧，仲話如果我地學校唔解決佢問題，佢就搵校監講。」二姐突然說，我現在終於明白為什麼她剛才出來的時候那個臉色這樣難看。

「咁佢要妳地學校做啲咩？」大家姐問，但二姐有點不好意思。她眼神看看媽，我知道那件事一定關於我，二姐只是不想媽難受。

「講啦二姐。」我推動二姐，因為我知道媽的反應不會太大。她是一個解決問題愛好者，堅信只要把問題解決，所有東西也自然會好。



「佢要我地學校有專人睇住，唔俾細佬走近佢個女呀。佢有錢大家姐妳都應該知，佢每年有捐錢嚟呢間學校，所以同學監好熟，佢嘅說話對我地老師一定有壓力。」二姐坦白的說，媽聽見後也皺了皺眉。

「我都知，上市公司老闆，唔好話學校，火箭都有錢做。」大家姐說完後，跟二姐同時沉默了，她們在等媽的反應，包括我。

「阿B，暫時唔好搵杰寧住，唔好影響到人屋企先。」媽很快的作出決定，以命令的語氣向著我說，這是很小出現的情況。

「潔心姨，咁佢地叫妳嚟係做咩？」二姐問。

「佢地個訓導主任叫我嚟見佢，我而家入去喇。」媽向著學校的大門走去，二家姐這時也一併上前：「我帶妳啦潔心姨，學校好大。」

「唔該哂。」媽向二姐點點頭，便一齊的步進學校。

走不了兩步，媽又突然回頭，向我拋下了一個炸彈：



「一陣妳地係唔係會去探阿B老豆？如果係嘅等埋我，我同妳地一齊去。」