我最錯，在鬼節遊船河: 第十節

我和子嫣登上了一架的士：「司機！麻煩你深水埗福榮街！」
 
「收到！」司機接到指示，的士徐徐開啟。
 
「鈴……鈴…….」突然間，電話鈴聲響起。
 
來電者是老豆。
 
「喂！衰仔！仲唔返屋企？」老豆問。只是晚上十時，對於一個成年人還要是男生來說，這個時候回家未免太早了吧。
 




「我要再夜啲先返，今晚大學同學聚會呀！」為免讓他憂心，我撒了個謊說。
 
「大學同學聚會？我咪同你講過，今日鬼節，好多遊魂野鬼出沒架，你快啲返屋企啦！」老豆的話帶點不快。
 
「我知架啦，我唔會太夜返，你放心啦！」
 
「仲有呀，聽日記住出黎鋪頭幫手呀，咁多藥材，老豆我分唔晒入櫃架！」
 
「你放心啦，聽日我會落鋪頭幫手架啦！」
 




與阿爸多說數句後，我便掛了線。
 
「估唔到你同你爸爸感情幾好喎，好多人都嫌阿爸阿媽煩，講兩句就收線。」子嫣說。
 
「我老豆係中醫黎架，佢打黎叫我聽日出鋪頭幫佢執貨。其實我出世無耐，我阿媽就死左，我同我爸相依為命，所以我地感情好好。有時候我地仲會一齊行山踢波，我又怕佢自己一個人悶，所以佢有時候打電話黎我都盡量同佢講多幾句。」
 
不知怎的，上了的士後，混身感到不自在，感覺像被人監視著。我望向的士的倒後鏡，只見的士司機正好透過倒後鏡望著我們，與他的雙眼對上後，只見他毫不顧忌的望著我和子嫣。
 
感覺上，子嫣雪白的大腿正被一個極度咸濕猥褻的男人偷看著。
 




出於男性保護女性的勇氣，我毫不客氣的問：「司機，你望咩呀？」
 
司機沒有理會我的質問，還是一直的用倒後鏡偷看著我們，接著，他開動了車內的音樂，並播放著佛音。
 
我和子嫣互相對望了一眼。
 
佛音？為何的士司機要播放佛音？
 
不知怎的，此刻聽到佛音的我，心情毫不感覺到平靜，反更添恐懼。
 
他不斷的從倒後鏡望著我們，是因為他發現了些什麼嗎？
 
我按捺不住問：「司機，做咩突然之間響度播佛音？」
 
「哦…….呢首歌叫大悲咒，聽左個人思緒都會安穩啲。」司機從倒後鏡望了我們一眼之後，沉默了一會續說：「年青人，你都係小心啲好，你黑氣纏身，可以既話搵個道士幫下你啦！」




 
從司機說話的語氣，可以感覺到他的認真和凝重，我亦知道這個世界上有很多人有「陰陽眼」或有第六靈感可以感覺到靈體的存在。可是，為何他要說「搵個道士幫我」？如果卓盈真的被鬼上身，或遇上鬼魂之事，按道理應與我不相干。
 
我沒有無緣無故失蹤，除了發現紅衣女鬼的相片外，我根本沒有發生過任何奇怪之事。
 
慢著。
 
「嘻嘻！我終於搵到你嗱！」
 
腦海裡再一次閃過了這句讓我差點發瘋的說話，「終於搵到我」是什麼意思？的士司機在倒後鏡又發現了什麼？