《我要追番我老婆》: 第七章
「Sam﹖你哋...噚日無嘢呀嘛﹖」在茶水間碰到了Rachel，她問我。
「哦﹖無嘢呀！」我春風滿臉笑道。然後跟她耳語﹕「噚日誤打誤撞，我同小惠一齊咗啦！」
Rachel聽後吃了一驚，結結巴巴道﹕「哦...哦係呀......恭喜你呀...你終於等到啦......」
我笑道﹕「都係多得你幫我啫。」
「嗯......」Rachel低下了頭，沒有作聲。
「喂！好心你兩個喺公司就唔好依泣啦！」Tina的聲音從身後傳來。
Rachel連忙搖手道﹕「我...我哋唔係呀......」
Tina笑道﹕「得啦得啦！知道你哋唔係啦，Rachel你噚日講咗好多次啦！」
Rachel俏臉通紅﹕「我...我哋真係唔係呀......」
Tina揮揮手道﹕「得啦得啦！知你哋想搞地下情啦，我哋會扮唔知㗎啦！」然後轉身離開。
「Sam佢哋以為......」Rachel紅著臉看了我一眼又低下了頭。
我的頭大了起來，我也不知道應該怎樣跟他們解釋，但解釋的話又好像我嫌棄Rachel的樣子，該怎麼辦﹖
午飯時，他們還刻意撇下我和Rachel，只留下一個訊息﹕「你哋慢慢撐枱腳啦~」
這班人是日常生活太沉悶了嗎﹖怎麼就這麼喜歡做這些雞仔媒人﹖
********************************************************************************************************************
「呀鋒，我一陣過嚟同你食lunch好唔好呀﹖」
「嗯﹖你唔駛教班呀﹖」
「我今日剩係朝早有堂咋，之後就好得閒啦。」
「哦，好呀。」
我掛上了電話，然後專心上課去。
課堂結束，梳洗過後，再化了一個淡妝，就歡天喜地的到了呀鋒的公司。
我上了呀鋒的公司，跟接待處的小姐道﹕「唔該，我想搵Brian Lo。」還是先跟二哥打個招呼吧，不然給他知道我來了只找呀鋒的話又會怪我。
「請問係邊位搵盧生呀﹖有無make appointment㗎﹖」
我搖搖頭﹕「你話係Irene Lo搵佢啦。」
「哦，小姐請你等等。」
一會兒後，接待處小姐道﹕「盧生請你入去，小姐你跟我嚟呀。」
我跟著她走進辦公室，來到了一間房間前。
咯咯。
「入嚟啦。」二哥的聲音從房中傳出。
接待處小姐打開了門，讓我進去。
我關上房門後，在二哥對面坐下。二哥笑道﹕「好日都唔見你上嚟，睇你都唔係搵我㗎啦！」
我給他識破了目的，尷尬道﹕「咩啫！唔歡迎我呀﹖咁我走囉！」然後作勢站起來。
二哥連忙笑道﹕「唔係唔係.....」然後又道﹕「點呀﹖搵Samuel食lunch﹖」
「係呀，你一唔一齊﹖」當然我只是禮貌上問一問他。
二哥搖手道﹕「唓！你真係想我去咩﹖費事阻住你哋撐枱腳啦。」
果然是我二哥，知道我在想些甚麼。
我笑道﹕「算你識做啦。」
我們又天南地北的聊了其他事情，午飯時間很快就到了。
「夠鐘食飯啦，我唔同你講啦，bye。」我急不及待的站起來。
二哥搖頭嘆道﹕「唉...打完齋唔要和尚......」
得到二哥的指示，我逕自走到呀鋒工作的地方，剛好看到他站起來伸懶腰。
我慢慢走到他近處，他看見了我後顯得有點驚訝。
「咦﹖你咪係Irene﹖」另一個方向有人喊我的名字，我朝聲音的方向看過去，發現是上次BBQ見過的人，那個...應該是跟呀鋒頗熟稔的同事，好像是叫做Alex的。
「Hi，Alex。」我親切的打招呼。
這時候又有人喊我的名字。
「Irene﹖係你呀﹖」
「咦﹖Irene﹖你嚟搵Brian呀﹖」
我又分別向Benny和Carter打了聲招呼。
我微笑道﹕「唔係呀。」然後走到呀鋒身旁道﹕「行得未呀﹖而家食飯時候好多人㗎，再唔行有排等啦。」
呀鋒愣了愣﹕「哦...行啦......」
我跟他肩並肩的正離開辦公室，卻見到Rachel正向這邊走過來。
我大方的跟Rachel打了聲招呼﹕「Hi，Rachel。」
Rachel看見了我顯得有點愕然，呆了呆才道﹕「Hello，Irene。」
我見她欲言又止的看著呀鋒，心裏有點不是味兒，不過我可不能顯得小氣，於是我道﹕「我同Samuel去食lunch呀，你一唔一齊呀﹖」
Rachel連忙搖手道﹕「唔...唔啦，你哋去啦，我...我返過去先啦......」她看了呀鋒一眼後然後轉身急步離開。
我跟呀鋒在等待升降機，我望向他，他樣子好像有點不安，是因為被Rachel看見我和他在一起嗎﹖
公司附近的茶餐廳裏。
「咦﹖Irene，Samuel，乜咁啱呀﹖你哋又係喺度食飯呀﹖」說話的是Benny，他正走近我們的桌子，而他身後正跟著Alex和Carter。
我道﹕「係喎，又會咁啱嘅﹖不如一齊食啦。」
Benny笑了笑的看著我們道﹕「唔啦，費事阻住你兩個啦。」然後坐在不遠處的桌子。
呀鋒看了他的同事一眼，樣子好像有點苦惱。
我忍不住問道﹕「你喺度煩咩啫﹖頭先到而家粒聲都唔出。」
呀鋒終於開口說話﹕「唉哎......你做咩無端端上埋嚟office又唔話我知呀﹖」他的樣子既無奈又擔心。
「做咩呀﹖你唔鐘意咩﹖」我不明白他的反應是代表甚麼意思。
他嘆了一口氣道﹕「唔係......不過......」
「不過咩呀﹖」
「你唔知我啲同事係幾咁八卦㗎啦......」
「八卦﹖咁又點﹖」我還是不明白他在嘆甚麼氣。
這個傢伙難道因為剛才給Rachel看見和我在一起而苦惱嗎﹖
我有點不滿﹕「而家我嚟搵你食飯係咪搞到你好煩呀﹖定係你驚比『你個』Rachel見到我同你一齊呀﹖」
他給我的說話嚇了一跳，連忙搖手道﹕「唔係呀唔係呀......小惠你唔好誤會呀......」
我哼了一聲﹕「咁你煩咩啫﹖」
他苦口苦臉道﹕「咁...咁人人都知你係Brian個妹喎，而家佢哋又見到我同你一齊，咁肯定以為我...以為我為咗上位先同你一齊啦......」
我不以為然﹕「咁我知你唔係咪得囉，你理得人哋點諗啫。」
我向他的同事看過去，發現他們將目光瞄過來這邊，又在低聲談話。
我調侃道﹕「你啲同事都真係幾八喎，係咁望過嚟。」他們大概是討論我和呀鋒到底是甚麼關係吧﹖
呀鋒看了那邊一眼，又皺著眉在苦惱。
我忽發奇想，想作弄一下呀鋒，於是我問呀鋒﹕「我啲雞幾好食喎，你食唔食一舊呀﹖」
他沒有會意我想幹甚麼﹕「哦，好呀。」然後想從我的碟子中夾去一件雞。
我馬上夾了一件雞，送到他的嘴邊﹕「嗱，擘大口。」
呀鋒尷尬道﹕「吓﹖好多人望住喎......」他瞥了他的同事們一眼。
我就是要全世界都看到，我嗔道﹕「快啲擘大口呀！」
他無奈的張大口接過我夾給他的雞塊，我眼角瞄向他的同事們，發現他們的目光都朝這邊瞧過來了，我心裏暗暗好笑。
整頓午飯呀鋒都是一副愁眉苦臉的樣子，看得我不是味兒，就像我來找他是給他帶來煩惱一樣。不過剛作弄了他，心情大好，我就沒有跟他計較了。
轉眼間吃完了午飯，我道﹕「走囉。」
呀鋒了無生氣的點點頭，然後我就走到他的同事們跟前微笑道﹕「我哋走先啦，拜拜，下次一齊食飯啦。」
「拜拜。」他們不懷好意的看著我們。
我和呀鋒默默的慢步到他公司樓下，他還是苦著口臉。
看見他的樣子，我也不忍心讓他為難，於是我道﹕「知啦知啦，下次我唔直接上嚟搵你啦，咁得未﹖」
呀鋒聞言大喜，笑道﹕「我就知你對我最好！」
哼！口甜舌滑！
我親了他一下道﹕「你放工打比我啦。」
他笑著點了一下頭，我就轉身離開了。
********************************************************************************************************************
跟小惠分別後，默默的回到公司坐回自己的座位，我正想著如何跟他們解釋，他們卻正好回來了。
只見Alex瞄了我一眼，沒有說甚麼就回到座位上。Benny和Carter看見我卻不懷好意的對我笑了笑，然後就回到自己的工作崗位。
又到了下午茶的打邊爐時間，Benny走過來拍了我的肩膊一下，笑道﹕「喂，落去呼吸吓啦。」
我們四個聯袂的走到公司樓下。
Benny點了煙吸了一口，然後賊忒忒笑道﹕「你個柒頭呀，咁撚叻仔嘅！幾時溝到Irene㗎﹖」
我不知所措﹕「吓﹖er......」我實在不知道怎樣回答他。
Carter拍了我一下﹕「Hey，bro，你係咪有啲咩殺手鐧呀，教吓我好喎。我哋剩係上個月BBQ嗰日見過佢一面，之後都無見過佢，究竟你點追佢㗎﹖」
Alex噴出一縷煙，笑道﹕「Samuel哥你就威啦，溝掂高層個妹，以後記得射住細路喎。」
我愕然﹕「吓﹖......」
Benny向Alex笑道﹕「你唔駛咁羡慕喎，你一陣返上去咪問吓Brian有無多個妹囉。」轉頭又向我笑道﹕「不過Alex都講得啱，以後記得要睇撚住我哋呀！」
我看著他們的表情，無奈道﹕「如果我話我一早就識Irene，而且我根本唔知Brian會嚟我哋公司，你哋信唔信呀﹖」
Benny笑著大力的拍了拍我的肩膊道﹕「信！信你至奇呀！哈哈......」
我的頭痛起來，我皺著眉捏著兩邊太陽穴想舒緩一下痛楚。
Carter道﹕「其實係點都好啦，反正你都同Irene一齊啦。不過我諗你要諗吓點應付班女啦，咁佢哋個個都知你同Rachel拍緊拖嘛，佢哋又同Rachel咁friend喎，如果比佢哋知道咗你真係唔駛喺度撈啦。」
若果給她們知道了，然後跟我吵起來，又給Brian聽到了甚麼的話......
我嚇了一跳﹕「你哋無講出去呀嘛﹖」
Alex搖了搖頭，繼續自顧自的抽煙。
Carter笑道﹕「我哋又唔係Benny，點會咁口疏爆出去吖。」
我有點擔心的望向Benny，Benny笑駡﹕「仆你個街！邊啲講得邊啲唔講得我都仲識分。」
我呼了一口氣，還好小惠答應了不會在公司出現，那就應該就沒有問題吧。
Carter道﹕「By the way，呀Sam你真係犀利，可以治到Rachel好似綿羊咁乖，頭先連見到你同第二個女人一齊都無出聲，我真係甘拜下風。」說罷還要拱一拱手。他頓了頓又道﹕「你諗住點呀﹖一拖二呀﹖」
我沒好氣道﹕「我一直都話我同Rachel無嘢㗎啦，係你哋唔信咋嘛。」
Benny淫笑道﹕「Rachel嗰晚飲醉咗你送佢返屋企，之後會無下文﹖白痴都唔撚信啦！」
Alex笑道﹕「咪就係，食飯仲要食得咁煙韌，真係諗起都打冷震呀！」
Carter笑道﹕「See? It is hard to believe that.」
天啊！為甚麼沒有人相信我所說的﹖
********************************************************************************************************************
「Rachel，你走未呀﹖」Tina一邊收拾桌上的文件一邊問Rachel。
Rachel看了看手錶，神色有點不自然﹕「吓﹖...我...我未做哂啲嘢呀，你同佢哋走先啦。」
Tina疑惑的看了Rachel一眼道﹕「你有無咁多嘢做呀﹖成日都要OT嘅﹖駛唔駛我幫吓你呀﹖」說罷已經走向Rachel的坐位。
Rachel聽罷嚇了一跳，有點不知所措﹕「唔...唔駛喇，你哋走先啦......」
這個時候Queenie拉住了Tina，笑道﹕「好心你就醒少少啦，Samuel佢哋嗰邊呢排好忙呀嘛，Rachel佢專登留喺度等Samuel㗎。」
Tina恍然大悟，連忙道歉﹕「係喎係喎，我都唔記得咗添，sorrysorry。」
Rachel給識破了心事，臉頰已經紅得如蘋果一般。
Stephanie笑道﹕「我哋快啲走啦，你睇吓佢塊面紅哂啦，哈。」
三女這時候嘻嘻哈哈的攜手離開，只剩下Rachel一人尷尷尬尬的呆站著。
電梯大堂裏，Brian正好跟剛離開的三女相遇。
「Hello，放工啦﹖」Brian友善的向她們打招呼。
Stephanie打趣道﹕「係呀，我哋去食飯呀，一唔一齊呀﹖」
Tina打了Stephanie一下，笑道﹕「Brian肯定係返屋企食住家飯啦，呵。」
Brian微笑道﹕「或者下次啦，等呀Samuel佢哋嗰邊無咁忙咪一齊食飯囉。」他頓了一頓，又道﹕「係呢，頭先行過好似聽到你哋講咩Rachel佢專登留喺度等Samuel......」
Tina馬上接口﹕「哦，佢哋兩個......」
Queenie連忙用手肘撞一撞Tina，Tina會意，馬上改口笑道﹕「你自己去問吓佢哋啦，哈。」
「叮」一聲，這時候升降機剛好來到地面那一層，Brian微笑著向三女道別﹕「咁聽日見啦，拜拜。」
三女道別過後，馬上吱吱喳喳的離開了。
Brian按了按停車場那一層的按鈕，讓升降機門重新關上，然後若有所思的看著升降機的電子顯示屏。
********************************************************************************************************************
「喂，小惠﹖」
「呀鋒，你放工未呀﹖」
「未呀，要OT呀。」
「哦...係吖......」
「嗯，你自己食飯啦，唔好等我啦。」
「嗯...咁好啦，你做完嘢打比我啦。」
「知道啦，一陣打比你啦。拜拜。」
跟小惠通話過後，我又重新埋頭於堆積如山的文件裏。
這陣子又開始進入了peak season，每天沒有到九時、十時也不能下班。雖然很掛念小惠，但也沒有法子，只好週末的時候陪伴她多一點吧。
我伸了一個懶腰，然後走到茶水間沖一杯咖啡，卻正好碰見了Rachel。
「咦﹖八點囉喎，你仲未走嘅﹖」
Rachel有點靦腆﹕「係...係呀......我未做哂啲嘢呀......」
我喝了一口咖啡，道﹕「乜你咁忙㗎咩﹖又唔見Tina佢哋要OT嘅﹖」
Rachel尷尬道﹕「我...手腳慢呀嘛......」
我笑道﹕「Tina佢哋咁衰嘅﹖咁都唔幫吓你手。」
Rachel連忙搖手﹕「唔...唔關佢哋事㗎，係我做嘢做得慢啫......」她頓了頓，道﹕「係呢，Benny佢哋呢，都未走呀﹖」
我搖搖頭﹕「未呀，不過佢哋三個啱啱去咗食飯。」
「咁你唔同佢哋去食飯嘅﹖」
我笑道﹕「你知我㗎啦，一做嘢就唔想停，我諗住快手快腳做埋啲嘢嘛。不過我叫咗佢哋幫我買飯盒啦。」
Rachel看了我一眼，然後低下頭道﹕「不如...我哋而家出去食呀﹖」
我聞言想了想，只剩下她自己一個人吃飯也怪可憐的，而且只是跟她吃頓飯而已，小惠應該不會怪我吧。
「哦，好呀，咁我話聲佢哋知唔駛買飯盒比我先。」
我們到了公司附近的一間餐廳坐下。
「係呢，Sam，今日我見小惠上嚟搵你，你唔驚咩﹖」
我其實也有點煩惱，不過忙於工作又忘了這件事，我聽Rachel提起馬上道﹕「我都唔知佢會上嚟搵我。我都驚其他同事以為我係為咗上位......」
Rachel截住了我﹕「我唔係話呢件事呀，我係話你唔驚比佢聽到其他同事講我同你......」
對了，這也是一件麻煩事，不過幸好今天只是給Benny他們碰見了。
於是我道﹕「應該無事嘅。好彩今日剩係比Benny佢哋見到啫，佢哋都話唔會周圍講。我同小惠講咗叫佢下次唔好直接上公司搵我㗎啦。應該就唔會比Tina佢哋見到嘅。」
Rachel看了我一眼道﹕「我都有同Tina佢哋解釋，佢哋又係都唔信......」
我不以為然﹕「佢哋要講咪由得佢哋講囉，我哋自己知道唔係就得啦。」她們不相信也沒辦法，反正小惠也不會再逕自走上來，也不怕給她聽到。
對了，我可把Brian給忘記了，我連忙道﹕「Rachel你記得叫佢哋喺公司都唔好周圍唱喎，費事比Brian聽到，影響到工作啦。」
Rachel「哦」一聲之後又繼續吃飯。
晚飯後，我們一起回公司繼續工作，到了晚上九時多，Benny他們也回家了，只剩下我一個人。
我到茶水間沖咖啡時，看到公司的另一邊還未關燈。
還有人在嗎﹖那邊正是Rachel她們的部門，難道她還在﹖
於是我走過去看了看，原來真的是Rachel。
「咦你仲未走呀﹖仲有好多嘢做咩﹖」
Rachel好像給我的聲音嚇了一跳，她結結巴巴道﹕「其...其實都差唔多㗎啦......你呢﹖你...走得未呀﹖」
我看了看手錶，回答道﹕「我諗十點左右我都走啦。」
「哦係呀......其實我都係咁上下走，不如你走嗰陣叫埋我吖，我...我驚一個人熄燈呀......」Rachel很尷尬的樣子。
我心裏暗笑，這麼大的一個人還怕黑嗎﹖
我當然沒有取笑她，於是微笑道﹕「好呀，我一陣過嚟搵你啦。」
轉眼已經來到十點，我收拾好東西後去找Rachel，她也正好在收拾東西。
她看見了我馬上道﹕「我行得㗎啦。」
我將燈關掉後，又鎖上了大門，然後與Rachel聯袂離開。
離開公司後，好不容易截了一部的士讓Rachel先離開。
這時候Rachel道﹕「不...不如一齊搭啦，反正我住青衣，你住荃灣，都順路吖，咁你咪唔駛再等囉......」
我想了一想，雖然說加班後的車馬費可以報銷，但反正順路又真的不用等另一部的士。
於是我欣然道﹕「好呀。」然後就與Rachel同坐一部的士回家。
接下來的一個月，每個星期總有三四天和Rachel一起晚飯，一起回家的情況，直至peak season過去了，我終於回復了正常的生活。