《我要追番我老婆》: 第八章
又一個Happy Friday。
Alex向我們道﹕「喂！去飲嘢﹖」
Benny搭著他的肩膊﹕「行啦，仲撚駛問﹖」
Carter用手掃著電話道﹕「等我call埋Queenie佢哋先......」
頃刻，他抬頭道﹕「行得，佢叫我哋樓下等。」然後他將目光瞄向我。
我道﹕「你哋行先啦，我仲有少少嘢要做埋佢，轉頭到。」
Alex點點頭，然後就跟Benny和Carter聯袂離開。
這時候電話響起來，我看了看，原來是Rachel whatsapp我了。
「你同佢哋走咗啦﹖」
「未呀，我有仲有少少嘢要做埋佢，我叫佢哋去先。你呢﹖」
「我都係呀，一係你一陣去嗰陣過嚟搵我啦。」
「哦，好呀。」
將剩餘的手尾處理後，我走到Rachel的部門，她也正是一個人在等待我。
「行得未﹖」我問。
「ok。」
沒多久，我們已經到了平時Happy hour的酒吧。
「wow！佢兩個終於出現啦！」他們看到我倆出現馬上大呼小叫。
我也懶得理會他們，反正他們只要看到我跟Rachel單獨在一起就會這個樣子。比小學雞還要小學雞。
Queenie看見我們，馬上笑道﹕「唔駛講咁多，遲到每人自對一杯先。」
我馬上道﹕「okok，即刻飲。」說罷我馬上拿起一杯啤酒乾了它。
Rachel也拿起了一杯啤酒。
Tina見狀馬上制止了她，埋怨我道﹕「喂！你唔係要你女朋友飲呀﹖」
Rachel聞言雙頰緋紅，馬上搖手道﹕「Tina我都話過我哋唔係咯......」
我心想跟他們說那麼多幹嗎﹖我們解釋了這麼久也不見得他們有相信過。
我馬上道﹕「得得得，唔好嘈。」我搶過Rachel手上的杯子﹕「今次我幫你飲啦。」然後咕嚕咕嚕一口喝乾。
喝了一肚子啤酒，沒一會我已經滿臉通紅，頭昏腦脹。
Rachel擔心道﹕「你無嘢呀嘛﹖」
Benny賊笑道﹕「飲嗰兩杯酒會有咩嘢呀﹖佢醉咗你送佢返去咪得囉。」
我聞言馬上喝了一杯冰水，頭腦稍為清醒一些。
可不要真的喝醉了讓Rachel送我回家，若那晚的事件重演的話我怕醉了的我真的會做錯事。
於是我乘著去洗手間的空檔，whatsapp給小惠告知我和同事在那裏喝酒，若真的醉了她也可以撿我回家。
我們一直聊天喝酒，不知不覺又數杯下肚，而我的胃終於承受不了，要跑到廁所裏吐得七葷八素。
Rachel一臉擔憂﹕「Sam你無嘢嘛﹖」
我抹抹嘴道﹕「嘔哂出嚟舒服好多啦。」其實我還是頭暈眼花，站都有點站不穩了。
Rachel見狀扶著我，慢慢回到座位上。
Carter﹕「Hey, are you ok, Sam﹖」
我勉強點點頭，但我覺得頭重重的，不自覺的將頭枕在Rachel的肩膊上。
這時候有兩個陌生的女子和Stephanie在談話。
Stephanie介紹道﹕「呢兩個係我舊同事，呢個係................」
叫甚麼名字﹖酒醉之後好像連耳朵都變得不靈光了。
我聽得Stephanie在介紹我和Rachel，我勉強抬起頭打了聲招呼。
糟了！眼中的東西都在左搖右擺，難道真的要小惠撿我回家嗎﹖
只聽得Tina道﹕「呀Sam個樣好似就嚟唔得囉喎，不如Rachel你送佢返去先啦。」
我聽到Rachel應了一聲我就被扶起了。
我搭著應該是Rachel的肩膊，慢慢的離開酒吧。
突然一陣冷風吹來，我醒了一醒。回過神來，Rachel正扶著我站在酒吧門外。
「唉哎！」Rachel驚呼起來。
我瞧她看過去，卻是一個西裝友撞到了Rachel，那人正不懷好意的看著她。
我連忙拉著她離遠一點，幸好那男人好像因為看見我在身旁，也沒敢再做甚麼。
稍為遠離之後，我放開拉著Rachel的手，皺著眉捏著痛得要命的頭。
「Sam......」Rachel伸手扶著我的手臂。
「我送你返去啦......」Rachel接著道。
「唔...唔駛啦，我自己返去得啦。」酒醒了點之後，我連忙拒絕Rachel的好意，若果那晚的事情重演的話，我怕以我這個狀態會控制不住自己。
我拉著Rachel離酒吧遠一點，再截了的士讓Rachel上車。
Rachel上車前擔心道﹕「你...你真係ok﹖」
我點點頭，心想你快走吧，你再不走我就要倒在你懷裏了。
Rachel幽幽的看著我﹕「嗯...咁你返到屋企話聲我知啦。」
我又點點頭，然後關上了車門讓司機開車。
Rachel走了之後，我鬆了一口氣。精神一放鬆，肉體馬上倒下。我頭暈眼花的坐在路邊，閉上眼休息。
過了一會，我感到褲袋裏有東西在震動。
甚麼東西﹖騷擾我睡覺！
我拿出來一看，原來是電話在響。
我看也沒有看來電的是誰，就接聽了電話﹕「喂......」嗯...我好像有點大舌頭，話也說不清楚了。
「呀鋒﹖你同同事飲完嘢未呀﹖」聲音聽起來很熟稔，是誰呢﹖
「...你...你係邊個呀......」看來不只大舌頭，聲音聽來還有點沙啞。
「死豬頭！你係咪真係飲醉咗呀﹖」電話裏的聲音在咆哮。
我醉了嗎﹖我看了看四周搖搖晃晃的街景，笑道﹕「係啩......」
「死人頭！你唔好周圍走呀！我嚟接你呀！」噢！我終於認出這把聲音是誰了，是小惠。
「喂...小惠......」噢...她好像已經掛上了電話。
呼......談了一會電話已經覺得很累了......先睡一會吧......
不知道過了多久，我感到臉頰給人拍打著。
我伸手撥開那隻手，道﹕「唔好搞住哂啦......」
又過了一會，我感到臉頰傳來一陣冰涼，我頓時醒過來。
我睜開眼，看見小惠正氣鼓鼓的看著我，而我的臉上正貼著一支冰凍的樽裝水。
我順手接過樽裝水，打開了並喝了一口，道﹕「咦﹖點解你會喺度嘅﹖」
小惠拉扯著我一邊耳朵，嗔怒道﹕「如果唔係我打比你你就唔駛理我啦﹖係咪呀﹖」
「痛！痛......」我給她拉扯得順勢站起來。
我伸手拿開她扯著我耳朵的手，尷尬笑道﹕「唔...唔係......哈哈......」
她改為用手捏著我的臉頰道﹕「仲喺度笑！你飲醉咗嘢都講唔清楚！」
「哈...哈哈...哈哈哈......」除了傻笑我也不知道說甚麼好了。
她鬆開了手，只是氣鼓鼓的瞪著我。
我喝了一口冰水後，加上小惠加諸我身上的痛楚，令我酒氣消了大半，腦袋開始清醒過來。
我歉意道﹕「咁我哋而家係咪走啦﹖」
小惠哼了一聲﹕「係我自己走呀，你繼續同你班同事飲酒啦！」說罷轉身離開。
我當然知道她只是撒嬌，也顧不得Benny他們就身處在附近的酒吧，馬上拉著小惠，撒賴道﹕「小惠我好醉呀...你送我返屋企啦......一係送我返你屋企都得㗎。」然後將身子挨著她。
她伸手想推開我，嗔道﹕「走開呀！死醉貓！」
我乾脆摟著她，整個人伏在她身上，正想繼續撒賴，肚子卻咕嚕咕嚕的響起來。
小惠也聽到我的肚子在叫，失笑道﹕「做咩呀﹖無食飯呀﹖」
我撫著肚子，笑道﹕「頭先湯嗰陣嘔哂出嚟啦，而家好肚餓。」
「不如去九龍城食糖水囉。」小惠興致勃勃的。
我微笑道﹕「好呀，你肯定又要食榴槤乜乜乜啦！」
小惠笑道﹕「係呀，我仲隨身帶咗把生果刀添呀！」
我們馬上截了一輛的士，不一會已經到了九龍城。
我們隨便走進一間甜品店，點好甜品後，小惠道﹕「我有個friend呢，下個禮拜六結婚，佢叫我去觀禮呀。」
我沒有在意，隨便應道﹕「哦，咩friend嚟㗎﹖好熟㗎﹖」
小惠吃著她的榴槤班戟﹕「以前中學同學，都幾friend㗎，一直都有keep contact。」
我吃著我的芒果西米撈﹕「哦，咁你咪去囉，唔駛問我㗎。」
小惠吃了一口我的西米撈道﹕「佢要我帶埋男朋友去呀......」然後定睛看著我。
我打趣道﹕「你個friend靚唔靚先﹖唔靚我唔去㗎。」
我的耳朵馬上被她扭著﹕「人哋靚唔靚關你咩事呀﹖而且人哋都結婚啦！」
痛楚之餘我不忘調侃一下﹕「人妻仲正喎！可以夫目前......唉哎！痛！痛！」小惠在我還未說完，已經雙手齊出，一起使勁的扭著我的雙耳。
她佯怒道﹕「可以咩話﹖」
我臉容扭曲﹕「可...可以幫你去接花球......」
小惠哼一聲，終於放開了手。
我撫著受傷的雙耳道﹕「你個friend又會咁早結婚嘅﹖計落佢先廿幾咋喎，有咗餡呀﹖」
「唔知呀，不過佢話啲長老都想快啲抱孫喎，所以咪早啲結婚囉。」
我賊忒忒的道﹕「其實我呀爸呀媽都好想快啲抱孫，不如我哋......」然後用手肘碰一碰她。
小惠雙頰緋紅，嗔道﹕「鬼嫁比你呀！」
我笑道﹕「你唔嫁比我仲可以嫁比邊個﹖」
小惠哼了一聲﹕「我爹地成日都介紹男仔比我，我大把貨可以揀呀。」
「哦﹖係咩﹖咁一定係你眼角高啦，所以最後先揀到我呢，係咪﹖」我自信滿滿的道。
小惠沒好氣的看著我，揶揄道﹕「無辦法啦，鬼叫我鐘意啲核突嘢咩！爹地介紹親嘅都係年輕有為，高大靚仔，完全唔係我杯茶囉。」
我笑道﹕「估唔到你都同我一樣鐘意核突嘢喎！我哋真係夾呀！」
小惠笑駡﹕「死人頭！你先係核突嘢呀！」
我壞笑道﹕「不過其實我想講呢，我唔係要娶你。我想話不如我哋skip咗結婚，直接跳落去生仔嗰part囉......」
「呀！！！」我的手臂正被小惠使勁的扭著。
這個多星期我感到Rachel好像有意無意的找我，是我的錯覺嗎﹖而且那班八婆八公又經常刻意的撮合我們，經常在午飯時遺下我倆。若這樣下去，我真的怕有天會出事。還是跟小惠商量一下，然後找個合適的時機帶她出來跟他們說清楚嗎﹖
「唔出聲嘅﹖諗緊咩呀﹖」小惠問我。
「無，諗緊點樣分開企可以幫你搶到個花球咋嘛！」還是想清楚怎樣做才跟小惠說吧，免得她衝動起來星期一就跑上公司來。
小惠俏臉一紅﹕「邊個話要搶花球喎-......」
我調侃她道﹕「嗯﹖乜你唔想要花球咩﹖咁一陣如果我搶到嘅話唯有睇下有無靚女就送比佢囉。」
她馬上鼓起腮，杏眼圓瞪﹕「喂！你話送比邊個話﹖」
我捏了捏她紅撲撲的臉蛋，笑道﹕「得你係靚女咋嘛，唔送比你仲可以送比邊個喎。」
小惠哼一聲轉個頭去，嘴角卻一直向上翹。
我們打情駡俏之際，轉眼已經到了尖沙咀的婚姻註冊處。
小惠從遠處已經看到她那個結婚的朋友，她馬上興沖沖的跑過去恭喜她。
小惠走到她朋友跟前後，只說了幾句話就向著我招手。
我馬上跑了過去。
小惠道﹕「Bonny我同你介紹呀，呢個係我男朋友，佢叫Samuel呀。」
Bonny本來笑臉盈盈的跟小惠交談著，聽到小惠介紹看了我一眼後，表情卻僵硬起來﹕「你叫做Sam...Samuel﹖你...你好呀......」
我見Bonny的反應有點奇怪，留心的看了她一眼，卻沒有聯想到甚麼，於是我保持禮貌微笑道﹕「Bonny你好呀，你叫我Sam得啦。」
Bonny點一點頭又定睛的看著我，看得我都覺得有點尷尬，於是我道﹕「我去嗰邊買杯嘢飲，你哋傾住先啦。」然後馬上逃離現場。
********************************************************************************************************************「小惠呀，佢真係你男朋友呀﹖」Bonny在呀鋒離開了後問我。
我感到有點奇怪，剛才不是介紹了嗎﹖我還是點頭道﹕「係呀，做咩呀﹖」
Bonny一副欲言又止的表情，卻又搖搖頭道﹕「無...無嘢啦......」接著又興致勃勃道﹕「晴晴同呀Wing都嚟咗呀，我哋去搵佢哋一齊影相囉。」
我微笑著點點頭。
看著中學的好友轉眼已經結婚，內心深受感動。我偷偷瞄了呀鋒一眼，何時才輪到我們呢﹖
呀鋒的眼睛一直望向新人那邊，嘴巴卻賊忒忒笑道﹕「做咩偷望我呀﹖見到人哋結婚你又恨嫁呀﹖」
我窘得面紅耳赤，馬上背向他道﹕「咩...咩呀，望下你都唔得呀﹖」
他笑道﹕「得！緊係得啦！我都知你前世未見過靚仔㗎啦！」
這個自大臭屁的傢伙，語氣真令人討厭。我反駁道﹕「我係前世未見過豬......」
「唉哎！」我還沒說完，卻聽到他驚叫了一聲。
我馬上轉個頭去，卻見他用手捂著後腦，而我腳邊卻有一個花球。
呀鋒見狀撿起了花球，然後笑著遞給了我﹕「嗱。」
我有點不知所措，唯有害羞的接著。
只聽到旁邊的人已經起哄起來，而那個攝影師也走過來道﹕「你哋係情侶呀嘛﹖係就去同新郎新娘影張相啦。」
我羞得滿臉通紅，只懂得躲在呀鋒身後，呀鋒卻大方的答應了，然後牽著我走到Bonny和她丈夫旁邊。
我和呀鋒拿著花球，和Bonny兩夫妻拍了幾張合照後，正想離開時，Bonny卻憂心忡忡的看著我。
Bonny今天怎麼了﹖整天怪怪的。於是我走過去小聲問她﹕「你今日做咩呀﹖成日都好似怪怪哋咁嘅﹖」
Bonny看了呀鋒一眼，又搖搖頭道﹕「無......嗯......」然後又好像下定決心似的﹕「小惠呀，你過兩日得唔得閒呀﹖不如一齊去食tea吖。」
我楞了楞，道﹕「你唔駛去honeymoon咩﹖」
「我下個禮拜先去。」
「哦...好呀。」雖然平日我們也會相約逛街，但現在這個場合好像不太適合邀約吧﹖
我滿腹狐疑的離開，Bonny轉眼又滿臉堆笑的跟親友拍照。
參加完Bonny的婚禮，我和呀鋒手牽手的離開。
「你個樣做咩咁唔捨得呀﹖係唔捨得你個friend呀﹖定係唔捨得個婚姻註冊處呀﹖」呀鋒大概是發現我依依不捨的樣子，故意調侃我的。
我紅著臉嗔道﹕「我係唔捨得個新郎哥呀！」
呀鋒笑道﹕「真係唔捨得人哋個老公﹖咁我哋返去同Bonny講聲交換一陣囉，反正Bonny都幾靚，我唔介......呀！」
我沒讓他說完，就大力扭了他手臂一下。這個臭傢伙，明知我是鬧著玩還要說這些來氣我，他就不會逗我開心嗎﹖
我將他的耳朵拉下來，在他的耳邊咆哮﹕「陳洛鋒！我比個機會你講多次！」
呀鋒狀甚痛苦的道﹕「我...我係話就算Bonny幾靚都好，我都唔會換你出去呀，我點捨得比第二個男人掂你呀！邊個用左手掂你，我就斬咗佢隻左手，用右手掂你就斬佢隻右手，用隻眼望你我就插盲佢......」
我聽著他的情話，心裏甜絲絲的，但嘴巴卻不肯承認，於是我只是「哼」了一聲，然後鬆開了扭著他耳朵的手。
呀鋒一邊撫著發紅的耳朵，一邊道﹕「我後晚約咗樂言佢哋喎，你真係唔去﹖仲諗住可以拖住你去見返佢哋添。」
我搖搖頭道﹕「唔啦，我應承咗媽咪返屋企食飯呀，下次先啦。」頓了一頓我嗔道﹕「一日都係你囉，又唔早啲同我講！」老實說我也有點掛念他們，畢竟我已經記起了一些和他們在大學生活的片段。
呀鋒連忙道﹕「係啦係啦，下次我一早打電話比你秘書預約啦。」
我給他逗得笑起來﹕「我邊度有個秘書呀﹖」
他笑著指著自己﹕「我咪係個俏秘書囉。」然後他向著我賊笑道﹕「而你呢，就係我嘅淫賤波士。」
我笑駡他﹕「你先係淫賤波士呀！」
他聞言笑著用食指逗著我的下巴﹕「咁你就係我嘅俏秘書啦。」然後低頭在我的唇上親了一下。
這個可惡的色鬼，就只會佔我便宜！