[真人真事]唔知你地既初戀係點架呢 我既初戀係咁: 相識(後)
上返岸之後我唔記得邊個人話踩單車，而我記得自已最後一次踩單車果陣應該讀緊幼稚園果陣，姐係後面仲有2個輔助轆果D，跟據以前聽過好多人話過細個果陣唔識踩，大個左之後唔知點解會識踩既邏輯，我自已都呃埋自已係識踩單車
我地一路行去租單車果陣見到D人唔止見到D正常單車，仲有D殘廢車，姐係前面得一個人踩，後面有兩條蛋散可以坐係到唔洗郁果種 。
去到租車都無野，我地6個人一樣都租正常單車，好，一齊起步，第一二三四個都已經出發，剩返企左係度果第五同第六，姐係我同MIKI，我踩左兩步之後已經記得返我唔識踩單車呢個事實，而且証實話"細個唔識大個識"果D全部都係講大話
跟住我就望一望隔離既MIKI，唔知點解佢果陣已經係地下度，佢起返身果陣我無問佢有無事，我地兩個互相大笑，好有默契咁同租車老細講我地想換返殘廢車，跟住班友好似知點解我地要踩殘廢車咁，無問過我地點解之餘仲要提議鬥快
我望下自已咩身世，我係渣住架殘廢車，而且車後面仲載多過人，我知大家都覺得我無可能贏，因為我都係咁諗，我覺得唯一贏到果0.0001%就係我搵到架殘廢車上面有"狂派"或者"博派"既標誌
充滿體育精神既我唔會明知輸梗就HEA踩，我出盡力咁去踩，自從幼稚園後都未踩過單車既我一路踩一路就覺得迎面有風吹埋黎真係好爽，感覺自已好似騎住隻馬係草原奔放緊，我覺得自己愈踩愈快，直到見到一間餐廳
其實間餐廳無乜特別，同大排檔差唔多咁張D膠檯膠凳放晒係出面，係我經過間餐廳果陣唔知點解聽到後面好多膠凳既聲，我望一望後面，見到MIKI坐係度好勤力好快手咁將就快撞到自己既膠登移開，我果一刻瘀到我好想喊，我唔記得左後面係闊過前面，姐係我過到唔代表佢過到，而且係我灰到盡果陣班友已經離我好遠...