[真人真事]唔知你地既初戀係點架呢 我既初戀係咁: 相親(後)

我決定將幾首歌加說話加歌聲合埋做一個故事，因為電子琴可以模仿到幾十種樂器聲音，所以決定用電子琴去彌補我無乜音樂細胞果部份

我地用淨低果兩個星期去練去夾，可能因為今次有左個方向，所以我地都順利咁完成左，而我地決定講既故事叫"人生"

到畢業典禮果日，我同MIKI都想尊重返個場合，我地無著校服，我地兩個都打算著西裝，果日朝早我無去接埋MIKI，我地各自出發

我一路坐車去既時侯已經好緊張，我係腦入面模擬左好多次個表演，我好驚甩歌詞，驚唔記得對白，驚甩音，我就係用呢種心情去到大會堂

去到大會堂之後我見到MIKI著西裝個樣好靚，佢化左淡妝，曉起右邊頭髮露出閃爍既耳環，果一刻好高貴好有氣質



我同MIKI入左後台之後偷偷地望下觀眾席，我地已經好緊張既情緒又再推高一步，因為我地係聯校畢業典禮，所以會有千幾二千個學生入黎睇，我地除左不停咁深呼吸之外，我真係諗唔到有咩可以做

MC:好!以下既時間交比MIKI同阿PAD

之後個台熄燈，我同MIKI由後台行出去，但係都唔算好黑，跟住我同MIKI坐係台上面已經準備好晒既樂器前面，坐低果刻有兩盞射燈射住我地，可能因為係咁，所以我已經見唔倒D觀眾係咩表情

MIKI:「阿PAD呀，你知唔知今日係畢業典禮呀?」
PAD:「我緊係知道啦，咁你又知唔知畢業典禮係代表咩丫?」
MIKI:「畢業就係代表人生新既一步」
PAD:「人生新一步?咁你記唔記得你人生既第一步丫?」


MIKI:「我記得呀，係我讀幼稚園果陣係.....(MIKI唱天黑黑:我的小時候，吵鬧任性的時候，我的外婆，總會唱歌哄我，夏天的午後，老老的歌安慰我，那首歌，好像這樣唱的，天黑黑，欲落雨，天黑黑，黑黑)
MIKI:「其實幼稚園既時間係過得好快，一唔覺意就已經上到小學喇，你覺唔覺呀?」
PAD:「我覺呀，我仲記得我小學果陣好百厭，我成日都.....(PAD唱SHALL WE TALK:明月光，為何又照地堂，寧願在公園躲藏，不想喝湯，任由目光，留在漫畫一角，為何望母親一眼就如罰留堂)
MIKI:「嘩，你小學都咁樣，咁你覺得自已岩岩升中一果陣點呀?」
PAD:「迷途迷途孤燕，未得歸家這小孤燕」(果陣台下開始有笑聲)
MIKI:「唔係喎，我中一已經識你架喇喎，你果陣係.....(MIKI彈活著VIVA既前秦)
PAD:「下，原來我果陣比人感覺係咁架?咁MIKI你覺得自已升中一果陣係點架?」
MIKI:「迷途迷途孤燕」(台下面笑聲愈黎愈大)
PAD:「咁你迷途迷途左幾年之後就應該到左開始有鐘意既人架喇喎，咁MIKI你家陣有無拍拖呀?」
MIKI:「我家陣無拍拖架咁多位老師，不過如果有得拍拖既話，我諗應該會係.....(MIKI唱我的驕傲:Pride in your eyes，為我閃爍像最初，唯獨你　欣賞我，比我更多，埋頭做　願你可　能為我驕傲更多，無論有誰嫌棄我，投入卻無人可阻)」(果陣好似聽到台下有人唱See me fly)


PAD:「MIKI呀，可能大部份人既中學生涯都係咁渡過，唔知我地有一日變成大人之後，會唔會又覺得中學時代過得好快呢」
MIKI:「可能會架，所以我覺得大家應該珍惜自已既中學生涯」
PAD:「我地應該珍惜既唔止係中學生涯，我怕我地隨住年紀愈黎愈大之後，失去既就唔止係中學生涯，我希望大家都珍惜身邊既家人，朋友，一切你身邊既所有」

之後我就同MIKI合唱一首慢版單車(難離難捨想抱緊些，茫茫人生好像荒野，如孩兒能伏於爸爸的肩膊，誰要下車，難離難捨總有一些，常情，此不可推卸，任世間怨我壞 可知我只得你承受我的狂或野)，其實畢業典禮前幾個月屋企發生過一D事，我唱呢首歌既時侯係有D硬咽

表演完畢，個台既燈開始著返，我打算企係身走去MIKI既時侯一開始聽到有D零星既掌聲，一秒後，台下面傳黎熱烈既掌聲，我望下台下面，好多老師同學生都企係身拍手，老實講我果一刻好感動，D掌聲維持左十幾秒，我覺得個時間好似好長咁，我從來未諗過盡力去做一件事，我更加無諗過會有回報，雖然我唔知道D掌聲係比我定係比MIKI，但係企係台上果十幾秒，係我呢生人最精彩果十幾秒

我果陣好自然行埋去MIKI度拖住佢隻手向觀眾鞠躬，直到個布幕關埋