結局比人屌我就預左架啦,始終好難討好所有人,不過可以既話都想你地睇埋結局既解拆,如果睇完都係唔鍾意既,咁就請你再期待第二個版本既結局,我唔介意寫多個Ending既,始終上網寫得小說,服務既都係讀者,唔係自己。
 
好多人話,點解子瑜要死?其實小說後半段都有好多佢要尋死既線索。佢誤以為Miss個仔唔係自己果d可以唔洗講,因為大家都明,亦都寫得好明顯。不過我見無人提出一點,就係其實子瑜當時面對緊既困局,如果記性好既讀者會記得,子瑜係一個無家庭溫暖,亦都無咩朋友既人,甚至可以話佢只係寄情係學問,睇下屋企既裝修就可見一二,但係一個對學問咁追求既人,最後考唔上大學,點解?佢無能力?唔係,係學制既問題,至少子瑜心目中會認為學制既問題。小說一開頭講過,子瑜已經係repeat左一年,如果今次考唔上,再repeat既時候,就又浪費多一年,對佢黎講,自然係一件好痛苦既事。佢呢種屈結無法抒發,本來仲以為有Miss係自己身邊,點知又發現心裡面愛既人有左第二個男人既骨肉,所有野堆埋,咩人都會爆煲。
 
咁點解佢唔一早去死,要等到音樂會上面先呢?或者呢D就係佢性格,追求一種浪漫,一種完美,邊度開始,邊度結束,睇返子瑜係台上講既野,其實已經係有去意,細心睇下就知其實佢係想尋死,所以我唔會話覺得寫得好突然。
 
咁佢點解要揀係學校死,唔可以有種淒美D,子瑜D既死法?首先我地搞清楚子瑜要尋死既原因,主要來自兩點,第一係對自己際遇既不滿,對未來既無力,呢D都係源自學校,源自學制,所以係學校跳樓自然就係一種對世俗控訴。另一個原因自然係同Miss無結果既感情,佢會將問題歸咎去因為一間學校,因為大家係師生,所以令到自己同Miss無得係埋一齊,子瑜對學校呢樣野自然係厭惡。
子瑜既死本身係一個好大既諷刺,佢心入面好想逃出世俗既枷鎖,唔想行一條人地行過既路,但係無奈所有野都逼佢接受,佢唔想接受唔想妥協,最後就唯有尋一條死路,呢一條死路係殘酷,係反映緊個世道好污糟,所以係一種鮮血橫流既死法,絕對無咩美感可言,因為講緊既係用血黎控訴,入面除左憤怒就乜都無。
 
最後亦都係我覺得最重要既野,就係故事背後既密碼。呢個密碼由子瑜個名開始,「瑜」即係「玉」既意思,故事中亦都有刻意咁寫返出黎。其實成個故事都貫穿住一本書,就係紅樓夢,先唔好理我係咪強姦左本書或者高攀佢,我係希望紀錄緊一段中學時代既回憶,希望可以將佢融入故事,用一本書去貫穿晒所有野。


紅樓夢有千千萬萬種解法,但係我只取佢最表面愛情既一層,如果唔係只會寫得更加難明。故事前半部,有一場係教員室大家論書,子瑜鍾意黛玉,Miss鍾意寶玉,林Sir鍾意寶釵,其實亦都係暗暗喻出各人既命運。紅樓夢一百二十回本,黛玉就因為寶玉同寶釵成婚而死,其實子瑜唔係正正都係因為咁咩?子瑜最後比Miss既係一本八十回本,其實前段佢同Miss夜晚傾計,有講過八十回本既紅樓夢係一種缺憾美,所以佢留低小說既意思亦都係想表達呢種意思,摺起果頁既詩,自然就係代表黛玉既枉凝眉。
 
跟住先講林Sir,林Sir代表既係寶釵,寶釵係代表緊一種封建價值,我係小說入面將佢化成現代中既對現實妥協。但係單單妥協好似顯得林Sir唔夠血肉,所以我將佢設定為一個同性戀,林Sir心入面雖然係同性戀,但係礙於世界既法規,佢內心好掙扎,所以佢以一種好嚴厲既形式去表現。佢對學生要求會好高,其實係自身既投射,因為佢覺得自己做唔到,所以將好多要求加係人地身上。去到故事既最後,我地見到林Sir係強逼信教,搵個女人,去令自己忘卻同性戀呢一個事實,亦都可以睇到佢係一個向現實低頭,走向妥協既人。
 
而Miss既定位就比較特別,佢唔係一個完全既賈寶玉,或者佢係一個後四十回既賈寶玉。Miss講過自己唔鍾意紅樓,亦怕嬌情,明顯唔係一個浪漫主義者,
但係年輕既時候,佢有冇對未來對自由既憧憬,睇返又好似有。其實Miss心裡面係渴望顛覆傳統,因為佢對自己每日重覆既工作都唔係滿意,而佢同子瑜既性愛,就係呢一種不滿既表達。但係佢另一方面亦都逼於妥協,就好似後四十回既寶玉,心入面愛黛玉,娶唔到,鍾意寫詩,偏偏要學經書,甚至因為賈府衰落,後尾要去考科舉,所有野都係事與願違,逼住因為現實逐步妥協。
 
結局選係聖誕前有一個小小既用意,尾段有寫過,一個新生命既誕生,正正代表未來既展開,而子瑜偏偏係個停留係過去既人。結局尾段係一生一死,仔女生,
但係子瑜死,或者算係一種繼承。子瑜一對仔女叫做懷瑾同佩瑜,名字上面係同父親有連繫,但係諗深一層,懷瑾好佩瑜好,都係有塊玉隨身既意思,而紅樓中玉不離身既自然係賈寶玉,Miss為BB手製既衫仔上面既仙草,正正就係黛玉既象徵,所以Miss刺繡出既係思念,穿起仔女身上既係父親對孩子既守護。
 


我諗任何一個寫故事既人都唔鍾意為自己既故事解畫,不過有時真係好無奈,好多野你唔寫晒出黎人地真係唔會完全明白,所以其實我都唔會話好介意,妥協係一個好重要既人生命題。文章寫得太文無人睇無人明白同樣係無意思。見到有讀者話因為我既小說去拎起本紅樓夢黎睇我真係好開心,小說入面都批評過好多次新一代唔睇古典,如果因為我呢篇係你地心目中爛尾既小說而可以令人從新對古典小說感興趣,即使係一兩個人,我都會好感動。我寫既小說唔係咩好野,我自己都承認,今日睇完,打完J,兩年後唔會有人記得,就算記得都係記得聖姑既故事點樣爛尾,所以我覺得寫小說係有一種責任,點都要留小小空間比讀者,要令讀者有得著,我唔敢話自己有本事係去教讀者咩,不過講緊既可能係一個啟發,可能一兩句令到你地去拎起一本書,或者睇多一首詩,古典作品先係真正可以流傳萬年既野,我只係希望係自己小說入面盡呢小小綿力,令未睇過既嘗試去睇,睇過既會再睇多次。我記我初寫小說,身邊既朋友問我,佢話你又唔係寫得好,寫黎做咩。我答佢,我話係架,晒時間睇我既小說真係拎起D更加有質素既文學作品黎睇好過。但係其實百貨應百客,年輕人唔喜歡,就算出言相逼,都無可能叫到佢地睇完洋洋幾十萬字明清小說,倒不如潛移默化,用故事去令佢地睇故事。我唔係睇唔起通俗作品,反而我覺得寫通俗作品比文藝作品係更加難,
「太文則迂,不文則俗」我一路嘗試既其實就係係兩者之間拎一個平衡,
呢個平衡正正就係最難既做到既地方,金庸之後真係後無來者。
 
寫好一篇網絡小說好難,比我想像中要難好多,
開頭一定要夠吸引搶眼,如果唔係人地睇完第一行已經唔會再睇落去,網上面每日連載咁多故事,讀者亦都無必要花一頭半個月睇你既作品。係架,你地班讀者真係咁殘酷架。
好啦,再講,寫到去結局。寫Happy Ending人地會鬧你係TVB,寫得平平淡淡穩打穩紮呢又會比人話無驚喜,寫個Sad Ending又未必人人接受到。好老實講,而家呢個版本既結局,事先係從來無諗過,係到夜晚,返到屋企,坐定定知道要埋尾而突然之間出現,有時我會覺得寫小說就好似鬼上身咁,所有野你無得預計咁多,到真係拎起支筆,自自然然所有野就會出黎,呢個亦係寫小說最好玩既地方。
 
本來子瑜應該唔洗死,不過唔知點解一準備落手寫,就覺得佢非死不可,原先應該只係生離無死別既,不過都會係Sad Ending。眼見而家群情洶湧,唔出返個Happy Ending補數都唔得啦,咁你地就期待下先啦,如果對我仲有期望既話。