突然有個癲佬出現係屋企門口話要斬死我地其中一個: (三)

回想剛才，千鈞一髮，我不禁捏一把汗。
 
外面一直傳來的只是撞門聲，相信阿樂也成功及時堵住了房門，那狂漢在外面暫時應該一籌莫展。
 
驚魂甫定後得到的卻是個壞消息。
 
「我都搵唔到我部電話。」基佬一臉無奈地道。
 
「唔係呱！咁邪？你有冇搵清楚？」
 




「我間房有幾大？一眼睇哂，我明明記得琴晚用完放左係電腦檯上面。」
 
奇怪，實在太奇怪……怎有可能如此巧合地我們三人的電話會同時失蹤？而且又剛好遇上狂漢「尋仇」？
 
「我知你諗緊乜，有人故意裝我地！」基佬說中了我心中所想。
 
「件事實在巧合得太過分，我唔排除呢個可能性，但我諗唔明係咩人要咁做，公司冇可能有得罪人，難道……」一時間，我也一頭霧水。
 
「拿！我就普通人一個，身家清白，你都知我性格，平時都唔會點得罪人，一定唔會係衝著我而黎。」基佬馬上「利益申報」，息除了我對他的疑慮。
 




「唉！唔通係阿樂？但我唔信呢個衰仔會搞到大鑊到人地拎刀上黎斬佢。」
 
「但而家人地擺明黎尋仇，擸哂刀又爆哂粗咁，一定係發生過啲咩事先會辣到人咁慶。等一等，你見過條友咩樣，係咪我地識得既人？」
 
「一啲印象都冇，我肯定唔識呢個人，但唔知你或者阿樂識唔識啫！」
 
「不如你形容佢個樣黎睇下。」
 
「條友老我地少少，應該三十出頭，冇戴眼鏡，塊面方方地，鼻樑高，鼻翼窄，髮型係七三分界，其他我唔記得喇……」我盡力在剛剛的驚鴻一瞥中尋找有用的描述。
 




「你都幾好野，望左一眼就記得咁多，你唔做電腦都可以去查案。」
 
「咪咁多廢話，你識唔識呢個人？」
 
基佬露出一副沉思的模樣，道：「我沒特別聯想到甚麼人……但係你仲記唔記得個癲佬岩岩講過乜？」
 
雖然剛才情況危急，但我也清楚聽到那一句重要線索——
 
「敢搞我條女！我一定要斬死你條仆街！」
 
「佢係為左佢條女而上黎尋仇！」我疾呼。
 
基佬愣了一愣，道：「冇錯……咁一定係阿樂搞出黎，條友仔咁鍾意玩女人，而家真係玩出禍！」
 
雖然表面證供附合推測，但沒證沒據也不能一口咬定始作蛹者是阿樂，也許事情是一場誤會。即使是事實，難道我們要他開門跟外面那個已經被怒火蒙蔽了的狂漢私了嗎？沒可能！




 
「唔好妄下判斷住。更何況而家最重要既係點處理呢個困局，家陣條友雖然入唔到黎，但我地一樣出唔到去，又打唔到電話報警或者叫人地黎幫手，根本就係困獸鬥！」我很清楚屋內的環境，所有窗戶都有安裝到窗花，想爬窗逃走也沒門。
 
「你都岩，條友一日守住係出面我地都出唔到去。佢係出面有水有食物，我地就乜都冇，打唔到消耗戰。」
 
「只怕你係間房痾屎痾尿，未渴死餓死已經臭死左先！」
 
「頂！我地仲要有兩個人，死都死快啲！」
 
「屌你！咪講啲咁唔老黎既野。大家都係身處於文明社會既文明人，我地試下用對話解決問題先，話唔埋真係純粹一場誤會，咪乜事都冇囉！」
 
於是，我懷著萬事以和為貴的心，嘗試與門外的狂漢對話。
 
「出面位大哥，我地係唔係有啲咩誤會？」
 




「你老母就有誤會！今日我唔劈死條粉腸我唔姓陶！」