突然有個癲佬出現係屋企門口話要斬死我地其中一個: (四)

狂漢用刀猛砍房門，發出比肉販砍肉更響亮的「噹噹」聲。
 
「你冷靜啲先，我地都想搞清楚件事，我地真係冇做過啲咩？大佬你做乜事要斬人搞到咁大？」
 
「我唔想再聽你講廢話，你搞到條女我就要斬死你！」
 
「等一等，我地真係冇人有搞過你條女，你會唔會搵錯地方？」
 
「冇可能！你有條契弟既地址，就係呢度，肯定冇錯！」
 




「或者你講條友個名黎聽下？」
 
「講你老母！我唔知咁多，但我肯定條友住呢度，快啲同我滾出黎！」
 
我嘗試向狂漢索取任何有用資訊，以了解清楚整件事，但他正怒火中燒，不可能會好好合作。
 
「佢姓陶，你識唔識一個咁既人？」我問基佬。
 
「唔識。要唔要問問阿樂？」
 




「都好，而且佢係果邊咁耐都冇出過聲，都唔知佢點。只係我地同佢講野一定要慎重，因為個癲佬都會聽到。」
 
「阿樂，你識唔識外面位姓陶既先生？」我大聲說。
 
過了五秒，阿樂答道：「唔識。」
 
「聽見你冇事就好，我地都唔識佢，你有冇啲咩諗法？」
 
狂漢聞言，激動地道：「你老母就唔識！你地唔駛夾埋係度扯貓尾！竟然搞我條女，禽獸！」
 




「大佬，我地真係冇，你要點講先信……」我無奈地說。
 
「屌你啦！我有相係手，有證有據，仲有得假咩！」
 
基佬說：「有圖有真相，咁你一係形容下條友個樣，未必真係我地其中一個啊！」
 
「就算係你地都會話唔係！咪當我好呃！」
 
基佬對我小聲說：「條友又蠢唔哂。」
 
「掉番轉黎諗，條友有相，如果我地行得正企得正，其實可以出去當面對質，件事就乜都清楚哂，不過我都知個癲佬而且咁既精神狀態，可能見人就斬。」
 
「命仔黎，我都覺得搏唔過，除非我地有方法唔出去而又比到個樣佢睇。」
 
「不如係門罅攝張相出去比佢對比下？」




 
「條友會唔信我地係相中人，徙氣，佢一定要見到我地真人先信。」
 
「你都岩。唉！估唔到只係隔左道門，所有野就變得咁複雜。」
 
基佬淡然道：「人與人之間既互信就係咁薄弱，所謂知人口面不知心，就算係識左好耐既人企係面前都未必信得講過，更何況係陌生人，仲要隔左道門。」
 
基佬的說話一言驚醒夢中人，現在的處境較剛才安全，腦袋終於可以靈活思考，我為何這才想到整件事很有可能是熟人所為的陰謀。
 
即便是來尋仇的狂漢也是其次，整件事的關鍵在於我們三人同時離奇丟失手機，我可以假定手機是在屋內失蹤的，那麼偷掉我們手機的人一定有我們住所鑰匙，更有可能……
 
是阿樂或基佬其中一人！
 
我不想懷疑兄弟，但確實事有蹊蹺，他們是否其中一人或是兩人同時與狂漢串謀？究竟他們有甚麼目的？抑或偷手機的是另有其人？可有幕後黑手？
 




我腦海冒出一堆假設，一堆我絕對不想成真的假設，我無法想像會被兄弟出賣、背叛，甚至想置自己於死地。
 
不過，正如基佬所說，人心隔肚皮，又有誰自信能看清一個人。