豬籠車內的呂布: 《一》

利申先，本故事全屬虛構，如有雷同實屬不幸。


致一位遇上不幸遭遇嘅老死 - 呂布


「無論世事變改，還是越難越愛 .....」


凌晨時份，嗰首死唔斷氣嘅手機鈴聲忽然響起。






連續幾夜通宵，好難得先抽到少少時間返屋企換件衫瞓一陣，就咁畀個電話嘈醒，望一望，兩點三十六分，仆你過街係一個陌生嘅電話號碼，真係佛都有火，唔屌過你真係對唔住自己。


一撳制，即時將心中嘅怒火宣洩出嚟。


「我燒你數簿呀！你痴撚線㗎！依家幾點啊！咁夜打嚟，邊撚個啊？你老味！」唔好意思，我份人其實好斯文，只係間中有啲失控咁。






「先生，好對唔住，咁夜打擾你，請問你識唔識一個叫呂布嘅人呢？」


「你咩水啊？我得撚罪你定溝咗你老母啊？咁夜打嚟問我識唔識呂布？仆街！劉備、關羽、張飛、趙雲我都識，我玩 '吞食天地' 大㗎，會考中史仲攞 A 添，屌你，我一陣 Whatsapp 畀孫悟空去打鳩你！」


「先生，你冷靜啲先，呢度係天水泥警署打嚟嘅，其實我哋真係想問你識唔識一位叫呂布嘅先生，佢話係你朋友，佢犯咗事想你嚟一嚟警署保釋佢，唔知你識唔識呢？」






「呂布？哦 ～ 呂布，識識識，我識啊，阿蛇。」


「咳咳，識吖嘛，識就快啲嚟保䆁佢，方便嘅話就帶套衫褲畀佢啦。」


「阿蛇，可唔可以話畀我知佢犯咗咩事？」


「嚟到你咪知囉！」


「哦！Yes 蛇。」






正所謂救人要緊，我呢啲義氣仔女，老友有難又點可以唔幫吖，是旦著條牛仔褲加件風褸，就嗱嗱臨衝落樓下搭的去營救呂布。


黑鼆鼆企喺街度等的士，冷風一嘢又一嘢打落塊面度，真係冷到隻咩咁。


「乞嚏！」


雖然唔夠瞓，但依家個人異常精神，一方面擔心呂布唔知發生咩事，另一方面又好掛住屋企嗰張暖笠笠嘅床，真係好撚矛盾。


皇天不負有心人，終於畀我等到架的士，一上車，二話不說






「司機大佬，天水泥警署，快！」