豬籠車內的呂布: 《二》

的士全速响元朗公路飛馳，既然距離目的地仲有幾分鐘車程，我就略略咁介意一下我嘅老死 - 呂布。


俗語有云：「人中呂布，馬中赤兔」，戰神呂布嘅事跡我唔多講，大家有興趣可以睇下由何潤東所扮嗰套「三國」，或者由陳某先生所畫「火鳳燎原」。可惜此呂布不同彼呂布，我認識嘅係天水圍呂布，豬肉佬一名，三十零歲，中等身材，稀疏不一嘅鬚根滿面，滄桑中帶點不平凡，雖然未至於人中之龍，但係咁後生嘅豬肉佬，响天水圍街市入面，簡直鶴立雞群，異常突出，因此吸引唔少人妻幫襯，唔知佢講真定講笑，佢成日同我講


「東，有啲嘢食過真係番唔到轉頭，你明的！」


唔知我蠢定咩，其實我真係唔明。






話咁快，已經見天水圍西鐵站，轉多個彎就到警署。


我份人有樣唔好，好鬼保守，可能我中國人性格啦，老豆細細個灌輸我「生不入官門，死不入地獄。」，所以我由細到大都未入過警署（屌你，好多人都冇入過啦！），自從睇報紙見到警署發生過非禮、強姦之後，我就更加抗拒，百貨百客，口味嘅嘢好撚難講，我咁青靚白淨，一個唔覺意有入冇出咪仆街！但係 ..... 幫人又唔諗得咁多。


右腳一踏入報案室已經覺得有啲唔自在，講唔出，但好唔舒服嗰隻，望一望前面，有個阿蛇坐咗响度，好專心咁做緊嘢，我一個箭步跳到佢前面，好有禮貌咁同佢講






「阿蛇，我啱啱收到電話叫我嚟保釋個朋友。」


「叫咩名啊？」


「呂布。」






個阿蛇皺一皺眉，抬頭望一望我，雙眼好似問候緊我咁，feel到唔多對路，我即時裝出一個誠懇樣再講一次


「阿蛇，我朋友叫呂布，麻煩你。」


可能佢見我咁認真，唔似講笑，就慢慢起身，再轉身，向身後面大嗌


「係咪有個犯叫呂布啊？有人嚟保釋佢喎！」


「係啊！頭先天睡商場襲警、拒捕同刑毀嗰個。」






「嘩！發生咩 '樹' 啊？咁很大鑊。」我心諗


點都好，救番呂布出嚟先再講，我一邊辦理保釋手續，一邊問阿蛇


「呢位阿蛇，究竟我朋友犯咗咩 '樹'？」


「你朋友就勁咯，人如其名「戰神呂布」，酒大咗，喺商場大吵大鬧，好似發咗癲咁，保安見到咪報警囉，我哋啲伙記去到見佢手腳並用起勢咁打部提款機，上前勸佢又唔領情，仲向我啲同事吐口水，最後咪塔佢返嚟。」


「吓！！」聽完阿蛇咁講，我頓時覺得有啲不可思議。






辧完手續，呆坐報案室度等呂布，不斷盤算究竟咩事令呂布大發神威，錢銀定女人？抑或其他事呢？