豬籠車內的呂布: 《四》

「噗 ～～～」車內傳嚟一下巨響。


「嘩 ～ 仆街吖！仲炒蛋！」


我連基本反應都未準備好，坐喺我隔離嘅呂布已經打開門拔足狂奔，留下司機大佬同我四目交頭，見佢一反常態，我立即响銀包攞出三十蚊，連隨道個歉，就跑出去追呂布。


「布，咪走啊！」三更半夜喺朗屏邨出面大嗌，雖則街上面無乜人，但都驚啲居民以為搶嘢報警。






呂布唔知受咗咩打擊，完全冇理會我，繼續喺街上狂奔。


「仆你個街！」我心諗。


已經唔夠瞓㗎啦，專登去警署保釋你都唔同你計喇，依家仲要我去追你，你係呂布咋！你估貂蟬呀！






一諗到咁，即時怒火中燒，用盡平生嘅奶力追條仆街仔。


「吔 ～～～」


原本同個仆街仔有成十幾二十米距離，一下子拉近十米左右。






「嗄 ..... 嗄 ..... 咪撚再走喇！咳咳 ～ 仆街仔！」


唔知佢借咗聾耳陳隻耳定玩嘢，毫無停低嘅意思，呢下我真係嬲喇！


有踢開波嘅人都知，後上嘅氣勢係唔可以睇小，咬到牙血都出埋，距離越拉越近，眼見仲爭個零身位左右，腦海突然閃出四個字


「雙龍出海 ～ 海 ～ 海」無錯，係四個字嚟嘅。


我本身唔係咩習武之人，除咗睇過鄭多燕嘅健美操之外，都唔會點做運動（獨撚嘛），更何況係功夫，但係呢個moment腎上腺素急升，再加上谷住谷嗰團火，雙腳突然用力一沉，然後一跳，感覺自己好似王小虎上身咁，兩腳凌空向住呂布背脊踢埋好。






「啊喳 ～～～」配合李小龍獨特叫聲，果然一嘢命中目標。


呂布好似斷線風箏咁插水式跌咗落地，良久都起唔到身。


使出「雙龍出海」後，我亦都撻咗落地，雖然屎忽有啲痛，但個氣勢贏晒，忍唔住要讚一讚自己，唔打過人都唔知自己咁很勁。


我用手慢慢撐番起身，一拐一拐咁行去個仆街仔度。


「嗚 ～ 嗚 ～ 嗚 ～」






唔知係咪我功力太勁關係，呂布個死仔竟然趴喺地度喊緊。


見到咁我啲怒火即時熄晒，行埋佢身邊。


「咩事啊！男人老狗喊咩啫！」我一邊講，一邊拉番呂布起身。


「我冇面見你，你由我啦！」呂布頭耷耷，面如死灰咁。


「有咩咁大鑊啊？一世人兩兄弟，有事一定同你拆掂佢喎。」






「我真係唔知點講 .....」


「嗱嗱臨去公廁換過套衫，再搵個地方慢慢講啦。」


「不過 ......」


「不乜撚嘢過吖，一句就一句，兩句就一對，行啦！」