豬籠車內的呂布: 《五》

扶住污糟邋遢嘅呂布去咗附近公廁換衫，衫雖然換咗，臭味仍然撲鼻，但叫做可以接受嗰隻（我自己接受到咋）。


望望錶，已經四點鐘，天都就嚟光，元朗出名多嘢食，不過凌晨四點，可以選擇嘅嘢都唔太多，記憶中教育路有間開通宵嘅茶餐廳，橫掂至在吹下水都冇乜所謂，就同呂布行過去。


話近唔近，話遠唔遠，喺安寧路行過去十分鐘左右，我一路行一路留意呂布，見佢仲係唔想開聲，右手就不停鍊實個拳頭，呢個小動作代表佢有啲解決唔嚟嘅心事，對上一次見佢咁，應該係十年前嘅事，有一日佢忽然同我想去割包皮，我好記得當年同佢嘅一番對話。


「阿東呀！著咗二十幾年樽領，改番冇領，我驚會唔慣，但冇領個人又好似精神啲、醒神啲，唉 ～ 典好啊？」






「布，其實呢啲嘢冇對與錯嘅，只要用到，唔痛，做唔做真係冇所謂㗎喎。」


「但係我聽人講，做咗會耐啲、勁啲喎！」呂布個樣淫賤中帶點自信。


「咁你咪做囉！」我對割包皮真係冇經驗同冇呢個性趣。






「但二十幾歲做又好乸奇怪喎，聽講要帶個紙杯仔同休息成個禮拜，畀人知道咪七到冇朋友？」


「我依家咪知囉！」


「屌！你唔撚同吖！唉 ～ 真係巧苦惱！」






就係呢個包皮問題，令我留意到呂布不停鍊拳頭呢個小動作，最後佢有冇做？我唔知，亦冇去深究。

不知不覺就行到餐廳附近，呢間茶餐廳有個好處，就係唔一定要坐喺入面食，即係可以開張枱坐路食，吸收咗坐的士嘅經驗，為免再發生不愉快事件，都係安全啲好。


一坐低，唔洗講嘢，一定嚟兩支大啤先，男人食飯點都要啤啤佢，加上呂布想講唔講咁，酒後肯定吐真言。


點知呂布一係唔出聲，一出聲就嚇我一驚，佢一手撳住個侍應本簿，一邊同我講


「阿東，唔好飲酒啊，酒真係好撚可怕㗎 ..... 阿哥呀，幫我寫杯熱朱古力得喇！」