豬籠車內的呂布: 《六》

「吓！我冇聽錯嘛！熱朱古力？一向視酒如命嘅呂公子竟然飲Hot Chocolate ? 我肯輪定佢受咗好很大刺激。」我心諗。


「阿哥仔，麻煩你我要杯凍檬茶吖，嘢食轉頭先嗌，唔該。」


侍應大佬走咗，都係時候入戲肉，單刀直入，我拍一拍呂布膊頭，就話


「布，究竟發生咗啲咩事，搞到你周身屎臭味兼且畀人拉咗咁大鑊？」






呂布一聽到我咁問，啲少動作又嚟喇，耷低頭不停鍊實個拳頭。


「Hey man，relax ～ 呢度得我同你兩個人，我一定同你拆掂喎。」


「東，有冇煙啊？」






「我都唔食煙，點會有吖！」


講完，再望望呂布雙眼，目光空洞，就死就死咁，仆街，我做朋友都算係咁喇！


「得得得，你坐定定响度，乜撚都唔洗做，我行去前面間七仔買，老細，純薄荷萬啱唔啱啊？」






「是 ～」呂布依舊生意失敗咁坐喺度，個囗微微張開。


都唔撚理佢答乜，起身一支火箭咁衝咗去買，費事條仆街仔又唔知走咗去邊，到時仲鍊麻煩。


「旦 ～ 啦！」


就喺佢講完個「啦」字嘅同時，我已經穿過 '蟲洞' 返咗嚟。


「煙啊！仆街，你輕度㗎？咬撚住先得㗎，火啊！屌你！洗唔洗幫起埋機啊？」






以上一番話，我當然冇兜口兜面同佢講啦，一陣又發癲咪玩到今晚，我只係長嘆一句就算撚數。


呂布咬住支煙，深深吸咗一啖，個鼻好似兩條死氣喉咁，噴出兩條白煙，陣煙良久不散，彷彿有一個又一個解唔開嘅心結咁。


「東，呢兩日係我三十幾年人生中最黑暗、最無助嘅兩日，你 ～ 又點會明白一個原本好撚想食海南雞飯嘅人，因為一個又一個嘅錯誤，最終不但冇得食仲要畀人拉撚埋嘅心情吖 .....」


呂布又再吸一口，抬頭望住個天，一字一字講出呢兩日所發生嘅事 .....