豬籠車內的呂布: 《十二》

陳登講完嘅同時，我望一望舖頭個招牌，終於明白頭先點解硬係覺得唔妥咁，原本寫住「下邳豬肉檔」毫無先兆下已經畀人改為「太祖豬肉檔」。


「太祖」，一個完全唔理解嘅名。


劉、關、張、曹四個跟隨陳登慢慢離開街市，人走茶凍，個街市頓時變得冷冷清清、淒淒慘慘同埋有啲戚戚，我仍然無法相信陳登所講嘅嘢，咩叫呢個地方唔再需要我啊，又話咩已經同人合作結盟，每個字我都聽得明，但加埋一齊我就完全唔懂，咩意思啊，我一定係未醒仲發緊夢，所有嘢都係假嘅，佢哋緊係夾埋嚟同我玩吓㗎啫。


「嗱！夠喇，玩都有個譜啊，玩得太大收唔到科，後果自負吖！」我轉身準備追出街市門口。






「你哋咪撚走啊！講清楚先好行，喂！叫緊你哋啊！哎喲 ～」


「啪！」一聲巨響。


可能個街市太跣，燈光太暗，亦可能係我自己唔小心，冇留意清楚前面，點都好，






我 ～ 今次真的仆街了 ～


好應好應咁三腳朝天撻咗落地（無錯，係三腳，你明的。）重重跣喺濕滑嘅地磚上面，理應個身體或者手腳都會好痛，但我一啲都唔在乎，亦冇即時撐番起身，呆呆咁望住天花板，整個人好似冇晒動力咁，已經唔想再諗，唔想再郁。


「不如就咁啦，都幾好吖，眼皮好重，瞓喇，我好想瞓，唔該熄埋啲唔用嘅燈吖，環保啲啊。」






合埋雙眼，漆黑一片，好靜，一粒聲都冇，我淨係聽到自己嘅呼吸聲，好有規律一下一下。


忽然間，我聽到有腳步聲行近，越嚟越近，又停低咗，突然我聽到有把女人叫我


「呂布！」


可能係我嘅幻覺啫，所以我都冇理佢，繼續合埋眼瞓响地，唔再過問任何事、任何嘢。


「沙 ～～ 滴滴答答、滴滴答答 .....」






咩事啊？落雨呀？個身咁濕咁嘅，仲有啲臭喎。