深缺: 深缺-Part5

到左五月中， 傳統係公司淡季， 大家工作也較為休閒。 另外因為四月底傾成左澳州航空公司單生意， 老細決定同全公司同事搞個BBQ gathering。 

內部email 一出， 我諗除左安仔一個， 其他所有同事（當然包括我）, 都係唔願意出席嘅。話雖如此， 同人事部check過後， 全公司差唔多八成半人都會去。

背後原因好簡單: 怕得罪老細。 

其實除左出國旅行外， 根本就無足夠理由唔去。。。 

好快就到左BBQ 日， 大家都懷住受難一樣嘅心情出現係大尾篤。 



亦一如我所料， 人事部怕同一team嘅人坐理一齊玩， 失去左聯誼果個意義。 所以係BBQ前幾日， 人事部亞姐April已經將公司出席BBQ果25人分成三team, 大致分佈如下：   


1. 我，佳儀同佢男友亞俊， 打單亞姐同佢老公仔仔， 會計部大家姐  

2. 安仔， Mimi， logistics 經理John少同老婆  

3. 老細， April ，Mimi 兩個?，會計部 D 妹  

當然仲有其他同事甲乙丙 。   



一到埗，要做嘅當然就係男人嘅浪漫： 起爐。 當然仲有分配飲品食物， 洗叉等等。  

安仔team好快就分配好工作。  

老細team 亦然，當然所有野都係D細做晒。  

好，到我隊team......  

呢次係我第一次見到佳儀男朋友， 亞俊。  



一個不折不扣嘅潮童： 大約廿三四歲， 同佳儀差唔多大。 戴著一幅無鏡片嘅黑色膠框眼鏡； 一件黑色， 背後有個銀色大骷顱頭（個牌子好似叫Mastermind Japan, 好似）嘅風褸， 下身就著左一條黑色褲， sorry, 應該叫係裙！？因為條褲有一泡野跌左出黎...姑勿論佢衣著上如何奇怪， 點可能三十幾度著一套全黑，長袖嘅衫同褲！？都係果句，後生D野我地唔明架啦。 

"Hello 亞俊， 我係亞Dick， 佳儀同事， 可以幫手起爐嗎？" 

" 吓， 我唔識架喎， 可唔可以叫其他人吖" 亞俊一幅令人討厭嘅嘴臉咁答我。 

唔識大晒呀， 就係我想再講野教訓呢個?仔果時， 佳儀走過黎亞俊身邊， "不如同我攞野食吖＂ 講完就同亞俊一支箭走去April 張枱度攞野。   

＂我同你搞啦老友。"出聲嘅係打單亞姐個老公， 就係佢說話未畢同時， 佢已經一手攞起地下袋炭， 開始係個爐砌起炭來。 

"好吖好吖，唔該哂" 我當然都加入砌炭行列。 心情亦好快平復返， 唔通因為此等小事同個?仔嘈。 再講， 仲有成日要對住佳儀同佢。 

係燒緊野食途中，安仔走左過黎。



 "喂的哥， 你好嗎， 你呢邊好似好悶咁喎。。。＂佢問我  

 "唓， 都係咁啦， 有乜好野先？＂  

＂頭先Logistics大佬John少問我去唔去上攝影堂， 你都好似啱架ma? "  

" 好耐無影啦， 不過都可以嘅， 預我囉， 時間？＂反正我部相機都封塵左大半年， 去下都無妨。  

＂ok, 夾好時間通知你。＂  

＂好＂ 

 一個＂好＂字， 可以代表一個承諾， 一個比對方嘅一個責任。  

亦因為呢一個＂好＂字， 竟然就成為往後一切事件嘅開端。