《我可以做你的樹洞嗎?》: 6.如果相片中有你

時間過得好快，sem1已經過左一半。一切都過得好平淡安穩:學業上跟得到、返兼職賺既錢又夠衣食住行、同雯凱之間又可以保持到合適既距離......唯一令人覺得出奇既，應該係駿耀，因為佢居然仲追緊曉凝。

雖然話平淡是福，但人總希望係平淡當中搵到一絲缺口，然後再加入不確定、刺激既元素。

但係，我誓估唔到隻元素會刺激到我核爆。

* * *

「佑霖!」某一日摺緊拉把温書既時候，我俾一把女聲嚇到跌左落地:「有好野益你呀!」



原來咁岩曉凝又黎拉把。

「咩事呀?」我俾佢大聲嚇完之後，個人有小小燥。

「嘻嘻......」曉凝盡力忍住笑，行過黎扶我起身:「黎join我個soc搞既活動啦？」

「唔係掛？」我又再一次俾佢嚇親，但係今次冇再嚇到跌落地。

原本我真係唔想去......但係曉凝又話第一次搞活動要我支持，又話我唔應該一直都咁毒，應該識多啲人。



不過，用「毒」一字黎形容我其實係大錯特錯。世人對我既誤解好深，即使係曉凝。

「話唔定你join今次活動會令你識到你既真命天女呢？」曉凝又再補充。

係佢軟硬兼施下，我終於應承左佢去。

曉凝又教我點樣打扮得好啲，等我果日可以charm 啲，吸引多啲女仔喎。我一直都話唔洗搞咁多野架，但係你知曉凝個性格架啦，一不做二不休。最後仲資助左我少少錢去裝身，搞到個soc既活動好似speed dating咁。

但係我真係估唔到，我會因為鬆懈聽左曉凝講而改變左我好多好多既諗法。



記得曉凝由細細個果陣已經好鐘意記錄低身邊既事物。雖然人愈大就愈忙，但係佢依然冇改到呢個習慣，什至增加左另一個方式。

就係用攝影去記錄佢覺得應該要保留低既野。

曉凝個soc就係攝影soc啦，咁個活動就係同遠足soc聯辦既。主要係想同學親近大自然同埋學下點影相咁啦。我本身都算鐘意行山欣賞下藍天白雲丶大自然，但係好少影相。

因為睇返以前影過既相，往往會帶俾我好多不快既回憶。

果一日，朝早十點我就同曉凝由hall出發，搭地鐵去筲箕灣站集合。目的地係我未去過既石澳龍脊。到集合點後，等左十五分鐘左右，所有人都黎齊。

但係，黎到參加活動既大部分都係一對一對既情侶。根本唔存在曉凝所講，打扮得好啲然後今日吸引多啲女仔既情況。

而我係人群中尋尋覓覓，終於俾我搵到獨自一個人黎既女仔。

係雯凱。



「咦?」企係我身邊既曉凝講:「原來雯凱都黎左喎，行埋去同佢傾下計啦。我都要幫手host個活動。」

之後，曉凝就行左去，由得我留係原地。

我行去雯凱果邊，諗住同個相熟既人一齊行會冇咁尷尬。

「你今日好唔同呀!」雯凱同我講。

梗係啦......曉凝同我執過哂成個look，話咁先叫做吸引到女仔。咁我咪睇下係咪真係work囉，點知......點知呢度得佢一個係一支公。

「係呀......」我求其諗下藉口:「過一排轉個look都唔錯丫。」

我地一群人再轉巴士，搭到去龍脊山山腳，再開始行上去。沿途我好少同雯凱講野，因為佢同我都算係沉默既人。



加上我好享受同佢之間無聲勝有聲既感覺。

行到半路，去到一個亭。搞手示意叫我地停低休息下。各人都紛紛坐低，拿出自己一早準備好既野食出黎。

而我同雯凱，居然好夾咁一齊遠離人群，行去最空曠既地方坐低。

我合埋雙眼享受微風吹動同埋陽光既温暖。

雯凱突然打破寧靜。

「佑霖......」雯凱把聲有少少震:「我一直以黎，以為我既幸福係睇住其他人幸福。」

「直到我遇上你。」