《我可以做你的樹洞嗎?》: 10.一

「鈴鈴鈴......」床邊既鍾響起。 

八點正。 

平常上九點堂既日子，都會有曉凝陪我食早餐。 

但因為佢今日居然奇蹟地唔知醒，所以得返我一個。 

呢種感覺已經好耐冇試過啦掛？ 



本來同我一齊上堂坐既駿耀，因為死唔聽我勸唔好再煩住曉凝而同我反左面。至今都仲未和好，我唔搵佢，佢唔搵我。 

然後都叫做有雯凱陪我，但經過行山活動後佢又近乎消聲匿跡。 

獨自一人，一人食早餐，一人上堂，一人返hall。 

呢種好耐冇出現過既無力感，實在令我無所適從...... 

長達三個鐘既lecture終於捱過，我走到門口時，突然被一把熟悉既聲音叫停。 



係駿耀。 

「佑霖......好耐冇見。」 

其實日日上堂都見，只係我地冇同對方講野姐。 

「得唔得閒一齊去canteen食飯？有野想同你講。」 

駿耀難得表現出一面認真既樣，似乎佢搵我係有目的。 



「你當初真係講得冇錯。」駿耀低下頭，望住地面：「我同曉凝真係冇結果。」 

果然不出我所料。 

「我真係以為，只要我努力，就一定可以感動到佢。」 

一時我都唔知點應佢好。 

「但係，原來有啲野真係勉強唔黎。我試過送禮物，試過約佢去沙灘用蠟燭整個心形俾佢，試過改變自己去迎合佢......」 

「但係，呢一切一切只係我單方面所付出。只要自己係唔適合對方既話，無論做咩都好對方都係無動於衷。」 

「你冇事嘛？」我搭搭駿耀膊頭。 

駿耀抬起頭，眼泛淚光。 



「但係，我都係冇後悔過嘗試追佢。」駿耀除低眼鏡，抹走眼角既淚水：「因為如果我完全冇試過，根本連有機會成功果少少機會都會冇埋。」 

「嗯......」其實我完全唔明，早知冇結果又何必白費心機？「咁你好返啲未？」 

「同你傾訴完，好返啲啦。」駿耀鬆一口氣：「多謝哂你，樹洞。」 

原來......原來我唔只係曉曉凝既樹洞。 

突然手機傳黎震動。 

「Voice Note」

其實，Voice Note真係一個白痴到冇人有既發明。人就係因為唔方便聽電話先用texting黎代替，你老母出個錄音function出黎即係又要人地專登開聲聽呀？我唔用耳機又嘈到人地，用耳機有時又唔岩場合。你都錄得音啦不如直接打電話黎同我講算啦唉。



另一點我又唔明啦。你又當你廢事打咁多字，快快趣講哂成堆野先用Voice Note啦。你老母夠膽死錄「哦」「好呀」呢類野俾我？即係你呢家當我好撚得閒去聽你果三秒既Voice Note，定係你以為我識得根據上文下理，推斷出你果三秒既錄音內容？

總括而言，Voice Note真係一個智障發明。

但現實中我冇得揀，我冇得反抗，只可以乖乖咁禁落個play制到。

「老地方等。」係曉凝傳黎既錄音。

如果DSE中文閱讀卷有一題問：「為何有些人用Whatsapp傳達幾個字的訊息時不直接打字，反而要用錄音功能？（6分）」

我會答：「Because fuck you that's why.」

我去到同曉凝之間共識既老地方，其實係校園內既某一棵樹底下。詳細係邊棵樹就唔講啦，以免某日你係某大學某樹下見到一男一女既時候，你會以為係我同曉凝。

到達後，只見曉凝坐係樹既旁邊。



其實由曉凝同我講要黎呢度既時候，我已經知道有緊要既野發生。

因為呢個地方，係我地經歷過最多喜怒哀樂既地方。

中學時，因為學校距離大學近，所以我同曉凝成日黎呢度，憧憬一下將來大學既生活。

果時我地居然心靈相通咁認為呢棵樹同周圍既環境係呢度最優美既地方，所以訂定左呢度以後就係我地既老地方。

呢棵樹其實同普通種係公園既樹差唔多樣（我唔知個品種既名），但係就有個樹洞係接近樹底既位置。

於是我地成日通過個樹洞，向對方講自己既秘密。