《我可以做你的樹洞嗎?》: 13.約會

我冇諗過，我同曉凝之間既愛情居然就咁就開始左。

我有啲明白，點解果位神會答我唔知。因為愛情既野，就係咁奇妙。你唔知佢幾時會黎，幾時會走。就好似我都連唔知道，自己跑跑下步居然會暈低，仲要上埋天堂見到個神。若果唔係佢俾我落返黎人間，我諗我唔會再有機會見返曉凝。係死後重生俾我勇氣去同曉凝講出心底既說話。

今日，係我同曉凝作為情侶正式約會既第一日。

畢竟我都兩三年冇拍過拖，所以我都諗左好耐，我地之間既第一次約會去邊度好。

行街睇戲食飯? 又好似太普通。



去打籃球? 冇錯，曉凝係個鐘意打籃球既女仔。但係醫生又叫我唔好咁快做劇烈運動住。

去迪迪尼或者海洋公園? 又要同班蝗蟲迫。

但後來我先發覺，諗呢啲問題係多舊魚。

因為只要有曉凝陪伴，就算係發呆都幸福。

* * *



「......等左好耐?」岩岩放工趕到既我，發現曉凝原來一早就到左。

「唔係呀......我岩岩先到咋。」曉凝收埋佢本身睇緊既書入手袋。

我同曉凝係荷里活廣場入面並肩而行。可能因為身份變左仲未習慣既關係，我同佢一路都冇咩點講野，好含蓄。

什至我連佢隻手都唔敢拖。

「不如我地一齊去你之前話想去果間野到食野先?」我打破尷尬既沉默。



「好呀......」

其實，我之前都未去過果間野食過。個名我已經唔記得左啦，大概係食意粉果類野。而曉凝話想去食既主因，居然係因為果度啲野食平。

我地坐係近入口既位置，買左唔同既套餐。

「我想試呢個......」曉凝話口未完，已經將個叉叉落我碗野到。

雖則以前經常都係咁，但呢家對我而言係唔同感覺。

「你知唔知我最鍾意既電視劇，居然係出自亞視。」傾傾下，我地傾到電視劇呢個話題。

「咦?」曉凝一面驚訝:「之前冇聽你講過喎!」

俾著係以前，曉凝應該會話:「仆你個街亞視黎既喂!」



「係《我和疆屍有個約會》。」我又繼續講:「馬小玲同況天佑之間身份對立，最終又能排除萬難一齊既可歌可泣既愛情故事，真係睇幾多次都會喊......」

「估唔到你居然會睇劇睇到喊喎。」

「嘻，咁係褒定貶義?」

食完飯後，我同曉凝周圍行下。行過CD鋪，聽左幾首歌；行過書店，睇左幾頁書。行行下，居然去左之前兼職時教過既一間小學。

「你知唔知呀，我第一份兼職就係係呢到教班小學生做功課。」我同曉凝講。

語音未落，學校既鐘聲已經響起。我望望手錶，原來已經三點幾夠鐘放學。

「我都好鐘意......教小朋友。」



家長係校門等候，一個一個小學生係校內走出來搵返自己既家長，然後拖住手仔開開心心返屋企。

然後我又醒起原來我連曉凝既手都未拖過。

「喂女朋友仔。我地都行囉?」

於是我借機拖實佢隻手。

我靜雞雞望向曉凝，見到佢係到偷笑。

曉凝隻手，好溫暖......

* * *

「哇! 女朋友?」



行到半路時，一把稚氣既聲音係後方傳黎。

原來係我之前教過既學生，允行。

「估唔到你咁毒都有女鍾意你喎!」

身旁既曉凝係咁大笑，笑到途人路過都望一望過黎。

「係呀! 你有冇呀?」我反問允行，我教過既一位小六學生。

「有喎! 隔離班一個你唔識既女仔做左我女朋友啦喎!」

估唔到呢家既小學生咁早熟。



傾左一陣計之後，允行建議話幫我同曉凝影合照。

於是，我同曉凝企係天橋上既一邊，望向前面無窮且無盡既直路，影低左我同佢開始之後既第一張既合照。

曉凝，無論人生路係短定長，只要係同你一齊行，就會過得最有意義。