《我可以做你的樹洞嗎?》: 14.重遇

我同曉凝之間既話題，因為呢段關係既開始而變得更多。我發覺即使我地之前已經係彼此既樹洞，但係，一齊左之後我知道既野係想像之外既更多。

原來話題，真係可以無窮無盡。

我地出完街之後，返到hall後都仲係唔捨得分別。可能，呢段時間就係所謂既熱戀期。

但係今日，曉凝因為尋晚同我傾到太夜而起唔到身。剩得勉強起到身既我一個返早堂。

平時咁既情況我係一定會走堂，但係個lecturer上堂話已經教哂成個course，今堂開始會同我地高呼返教過既野，所以好重要。



我行到入上堂既地方，居然見到，好耐冇出現過既雯凱。

「雯凱......?」我走過去，望到改變左好多既雯凱。

雯凱再唔係好似以前咁，著住果套一成不變既衫。而係有全新既裝扮配搭，黑色小背心，牛仔熱褲，波鞋。

而且，雯凱化左個淡妝，亦都冇再戴住副老土既眼鏡。

完全唔同哂。



雯凱坐係平時好少人會坐既前排既最右邊個位。佢左邊坐住幾個本科既男仔，但係我同佢地唔熟。

明眼人應該睇得出咩事。

我一邊行過去雯凱果邊，一邊同佢打招呼。

而佢就一邊望實我對眼。

「好耐冇見......」



冇位坐，照常理其他人會去第二度搵位。但係對我而言，常理係由我自己開創既。

所以眼見雯凱隔離冇位，我索性坐係佢隔離既地上。

見返咁耐冇見既朋友，我有好多野想問，例如點解佢好似改變左咁多，又例如點解佢好似默墨咁潛左水咁耐先出現。

雯凱望一望坐係佢腳邊既我。

雯凱又再望一望佢左邊果幾個男仔。

「我想行一行開先......」雯凱對住佢左邊講，然後馬上就起身。

佢冇同我講野，只係扶起我，然後拖住我手臂行出lecture hall。

事出突然，我實在唔明白雯凱想做咩，而佢只係不斷拉我出去。行到出面門口，佢先至拎轉頭。



雯凱既神情唔同左，變得有啲呆滯。過左一陣，佢先至閉上雙眼，深呼吸一下。

「咁耐以黎我一直唔出現係你面前，一直唔理你。只係為左避開你。」

「下? 我唔明......」

「我分享我鐘意睇既書俾你，上堂既時候專登坐你隔離，仲要刻意係你一定得閒既時候約你食飯......到呢家你仲未明我心意?」雯凱苦笑一聲。

我到呢一刻先醒覺，原來雯凱既消失，全因為我。

「我以為只要我打扮得靚啲，化妝，嘗試改變自己性格，就可以吸引到好多男仔，從去忘記你。」

「但係我冇諗過，我只係估得中個開頭，估唔到個結尾。我係吸引到好多男仔，但係，始終無法忘記你。」雯凱又冷笑一下：「但係無論你將來條路點行，我都會一直深愛著你。」



雯凱冇等我回應，因為佢知道我已經有曉凝。佢只係慢慢回頭走返入去，佢既腳步有停過，可能想等待奇蹟，等我從後抱實佢? 當然我冇咁做，我只係目送佢返去。

跟住落黎我又入返lecture hall到，眼角見到坐係邊位既雯凱，目定口呆咁望住前面，旁邊既幾個男仔問佢發生咩事。但係佢冇回答，只係繼續，望實前面。

我唔明白點解雯凱會對我有咁深既感情，何必為左我一個普通既男仔而放棄其他人? 對住呢一個不但外表陌生，連思想都變得陌生既雯凱，我實在無言以對。

我只可以暗地裡，祝福佢。

接下黎既一堂，我不斷回想起雯凱岩岩講過既每一句說話，尤其是係最後果句......成堂我都神不守舍。雯凱，曉凝......