《我可以做你的樹洞嗎?》: 15.你似是陽光空氣

忙碌既時間過得特別快，今日係我同曉凝考哂試既日子。早係考試前我地已經定左今日去東龍島到玩，放鬆下。東龍島係位於西貢以南既離島。要由三家村搭船入去。而且，班船只係星期六日先開，所以搭船既人十分之多。於是我同曉凝一齊決定大概黃昏先入去。

今次主要目的係去觀星同睇夜景。平時同曉凝一齊欣賞大自然都係有太陽既時候，今次我地就想睇下星同埋夜景有冇另一番韻味。

我地唔習慣睇住地圖黎行，係冇地圖既情況下，每行一步都係一個探險。我地好享受果種唔知下一秒會發生咩事既刺激感。

於是，我地蕩失左路。

「點解會咁既？」我自言自語。



眼前既係一個小沙灘，四周人影都冇隻。

「其實岩岩一路行黎都係冇咩路人架......」曉凝一言驚醒洛克人：「不過我想同你靜啲一齊行先冇出聲咋嘛！」

聽到呢一句，身體內有一股暖流湧上心田。雖然話平時同曉凝一齊都經常講肉麻野，但係此時此刻，此地此境，顯得格外有情調。

我同曉凝係海灘上鋪左張席，然後訓係上面，望向天上繁星......

「有了你開心啲
乜都稱心滿意


咸魚白菜也好好味......」

曉凝當我右手手臂係枕頭咁訓，我又一直唱住歌黎哄佢開心。

「你睇下果粒星？」曉凝指向天上，閃得最光最亮既果粒星。

「好靚......」

「係呀......」



「但係唔夠你靚。」

「口花花。」

就係咁，我同曉凝一直由傍晚睇星睇到夜晚。

直到我隻手俾曉凝當枕頭咁壓到好攰，我地先郁一郁。

而呢一刻我望到手錶上既時間。

「大獲，過哂鐘。」

大家可能有所不知，去東龍島買船飛時係一定要買埋回程票，而且要當面講埋時間。

呢家係十點，而回程時間係八點半。



我同曉凝即刻去售票處到睇下仲有冇賣剩，結果當然係一早賣哂。

「咁呢家點算好？」我同曉凝係人來人往既道路上穿插。

「唯有係度過夜啦......」曉凝答我。

反正東龍島係露營熱點，我地係沿路買返個營同埋其他工具，好容易就可以札到個營出黎。

只不過係場地難搵。

我同曉凝拎住啲野搵位札營，可惜既係啲有靚景睇既位置全部都full哂。我地一直搵一直搵，始終都仲係未搵到。

然後唔知點解，我同曉凝又行到果個小沙灘。



而個小沙灘又出奇地冇人。

將營搭好之後，我同曉凝坐係沙上。

我同曉凝再睇多陣星星同個海之後，大家都開始有啲眼訓。

於是，我地訓入同一個營入面。

個營唔係太大，要訓哂入去既話，我地兩個就要曲住腳咁訓。我地望住對方，就算眼訓都唔捨得訓。

「哇! 」我指向曉凝身後大叫:「好大條蛇呀!」

「邊度呀?」曉凝即刻轉身望向後面。

而我梗係趁機攬實佢啦。



「好似走甩左啦喎。」我一邊講，一邊摸住曉凝個頭。

「咁都好啲......」曉凝呼左啖氣:「我最驚就係蛇架啦......」

「唔洗驚喎，我會保護你一生一世。」我再用力啲咁攬實曉凝，我最愛既人。

「你係先好講!」然後曉凝一掌打落我個背脊到。