《我可以做你的樹洞嗎?》: 19.活著

「我要拎水解酒呀......」俾嘉渝咁樣扯一扯，個頭好似又有啲暈。

「唔好離開我......」嘉渝合著眼，細細聲咁講。

* * *

我同嘉渝搭車去機場時，沿途一聲不發。

我一直心諗：「嘉渝要移民去外國讀書，今次可能係我最後同佢見面。」



但係我咩都講唔出口。

到達機場，我刻意慢慢行，想將時間拖延。但係，嘉渝漸漸愈行愈前。

到閘口時，嘉渝擰轉面同我講。

「我真係要走啦......」

「你可唔可以唔好走？」



「傻啦。」

「咁你會唔會返黎？」

「我都唔知，可能啦。」

講完之後，嘉渝就入左閘，冇再回頭。

* * *



「好......我唔離開你。」我從回憶返回現實。

於是我坐係嘉渝隔離看守佢。

就好似幾年前一樣。

「我知你好想要我架！」嘉渝嬌滴滴咁望住我。

我大驚，正常一個女仔點會講呢啲野? 除非真係醉到死咁濟。

我相信係男人都好想得到嘉渝，因為嘉渝擁有天使面孔魔鬼身材。如果你覺得我形容得太行，咁你可以幻想嘉渝就係你覺得最靚既人，又或者係微笑緊既林嘉欣。

微笑緊既林嘉欣，係可以令時間停止。

但係，我已經有曉凝。



我決意鬆開嘉渝隻手，然後向房門走出去。

「唔好走......」嘉渝歇斯底里地講。

但係我頭也不回，直接將房門關上，由得佢醉醒，免得自己做錯事。

嘉渝訓左我張床，今晚我只好訓梳化。

呢晚我諗返起好多往事，喜怒哀樂既事，關於嘉渝既事，又或關於曉凝既事。

雖然同嘉渝之間既故事早已告一段落，但並唔代表嘉渝從此係我心入面消失。

就算結局係開心既，係傷心既，佢都係一個結局，一個我會記得既結局。



況且遺憾都可以係一種美?

慶幸呢家我有曉凝陪伴身旁，雖然結局未定，但至少我仲可以去嘗試丶去經歷丶去感受。

我唔應該同曉凝冷戰咁耐，我唔應該由得我同曉凝既結局爛尾。

我要再次回到曉凝身邊。