《我可以做你的樹洞嗎?》: 24.畢業後

畢業之後，我因為興趣而去左外國讀心理。

如果讀心理可以讀到人心你話幾好。

飛之前我whatsapp過曉凝，但冇回覆。

冇回覆都係一種回覆，對我地兩個黎講或者都係件好事。

到埗後我寄宿於一家人，果家人有媽媽、兒子同女兒，係一個單親家庭。



個呀媽要獨自養仔女，所以經常出門打工，早出晚歸。

佢個仔就係twitch既實況主，終日關自己係房入面開台。雖然唔算多人睇，但聽Sandy講佢都賺到啲錢幫補家計。

而Sandy就係個女仔。

一個令我重新有心跳既女仔。

「你就係我既真命天子！」我到埗一入門口，Sandy咁講。



「吓？」

「塔羅牌係咁講架！」Sandy激動拿住幾張塔羅牌，貼在我臉上。

從來我都相信命運係由自己掌握，好似星座書、塔羅牌呢啲占卜手法只係呃人。

「er……哦。」未熟悉Sandy前，我唔敢輕舉妄動。

話說係我離開香港前，我將我同曉凝最後既合照印左出黎，錶左係相架入面。



有一次，Sandy就係我懷愐過去時偷入我間房。

「你女朋友？」

我嚇到將相架翻轉拍係枱上。

「Let it go.」Sandy擺出一副懶係清高既樣子：「唔好再活在過去啦！」

「唔好自作聰明，以為自己咩都知道。咁樣既人，其實咩都唔明白。」

我係咪講緊自己？講緊自己自以為明白曉凝？

教訓Sandy既同時，我亦都教訓緊自己。

「我明呀！我真係明呀！」



扁住嘴既Sandy，可愛。

大家都知道，向來我都係個被動既人。

好多時要曉凝叫我先會做，倒如去佢個soc搞既活動、攝影比賽。

所以我好多謝Sandy既存在，好多時佢係我未留意到時，已經幫我安排哂啲野。

「點解你對我咁好呢？」我一邊食住佢整既早餐一邊問。

「因為你係我真命天子。」

後來，我的確俾Sandy感動到，不過呢個係另一個故事。



最後，我重啟封閉了的心，和Sandy在一起。

* * *

雖說心理係我既興趣，但係讀master既野都係有一定難度，為左畢業我都用左好多時間落學業到。

埋怨？講真Sandy真係有埋怨過，埋怨過我用好多時間黎讀書做兼職唔陪佢。

佢仲投訴過我好多野架，例如太夜訓啦，食野唔定時呢啲香港人成日都會有既壞習慣。

不過我好感激佢肯同我溝通，等我知道自己有咩做得唔好。

係外國讀書既兩年黎，Sandy就一直不離不棄咁照顧住我。

風雨不改。



所以，我決定畢業後到我照顧返Sandy一生一世。

而為左儲多啲錢......同Sandy結婚，讀master既兩年黎，我亦冇返香港。

順利畢業後，Sandy自願同我移居返香港，話要體驗我以前既生活咁話。

中學同大學時期既包租婆，對鑽戒珠寶好有研究，所以我搵左佢同我去睇鑽戒。

「慢慢揀呀！」包租婆帶我去到舊居附近既珠寶店：「就好似揀老婆咁。」

揀左一段時間，都仲係未搵到自己心目中想要既，於是留返下次先繼續揀。

包租婆突然醒起，之前有一個俾我既包裹寄黎，見近我就順便去拿埋。



係曉凝寄黎既。

我小心翼翼地拆開包裹。

係一本紅色既簿，一本曉凝以前用黎記錄低事物既簿。

或者我應該話佢係一本書，起碼有幾百頁厚。

第一頁是一幅曉凝自己畫的地圖，地圖上顯示既係小學同小學附近既花草樹木、建築物。

而其中幾樣野既隔離寫低左個頁數。

我跟住頁數掀。


「學校後山，鳳凰木，斬於2009年，因要配合學校擴建。」

仲記得當時新聞都有報導，社會各界摒擊，不過香港人都係善忘既。

「學校前門，益記士多，結業於2014年，因業主無理加租。」

間士多充滿我同曉凝小時時光，的確係2014年被迫結業。

「學校側門旁，棕樹，亡於2019年11月16日，因十二號風球山地。」

2019年？

「學校斜對面，7-11便利店，被搶劫於2024年4月23日，女店員當場制服搶匪。」

…

* * *

「十年後你都唔記得啦！」我扮個鬼臉說。

「一定記得。」曉凝既表情依舊認真。