《血洗禮賓府》: 第二章 ≪中環之戰≫

「有人中槍呀！！ 有無醫生呀？？」

情況已經失控， 群眾向警察掟汽油彈， 警察用水炮同催淚彈還擊。

「咳，我係醫生， 佢右邊膊頭中槍， 止左血就應該無生命危險。 呢度太多人喇， 你地去叫群眾讓開，我要一個空曠既地方急救。 」

「去和平紀念碑果邊啦。」

一下槍聲過後， 現場一遍混亂。 民眾認為是警方放冷槍， 射殺臺上高呼獨立的建港。





一時之間， 群眾手持一早準備好的汽油彈， 鐵枝等武器， 襲擊駐守係國家銀行、長江中心一帶的防暴警察。 他們的防線就是德輔道為界， 將群眾聚集在海邊一帶， 以便全力保衛後面的禮賓府。

但由於示威者太多， 幾千名警察被逼退守皇后大道中。 示威者不停向警察掟汽油彈、雜物， 同時又燒車、燒建築物， 用鐵馬架起一道防線， 以皇后大道中為界，壁壘分明。

在場的幾千名警察只好用警車佈起防線， 同時中斷整個港島區的通訊系統， 等待上峰指示。

到我漸漸恢復知覺，我望著和平紀念碑，想到一班從印度、英國、加拿大離鄉別井的英勇軍人獻出他們寶貴的生命，為的就是保護這個在東方的自由港口，我不禁流淚，為何這和平紀念碑豎立了一百多年後，香港又一次失守？

「佢傷勢點呀？」 沈婷一直握著我的手， 不停的追問醫生。





「佢傷口止左血，暫時無大礙， 但係要盡快送佢去醫院。 」

「警察要殺佢，依家去醫院咪即係自投羅網？ 唔得！」輝仔斷言拒絕。

「如果警察要殺我，又點會只係打中我膊頭呢？」我只想輝仔冷靜下來。

「無錯，如果要殺佢根本唔會只打傷佢，我估係有人借機會煽動佢地想煽動既暴亂。」沈婷和我的觀點一致。

「就算我被捕都無所謂，依家已經有100萬人上街，如果我真係被捕相信上街既人會更多。我地絕對有同政府談判既籌碼！咳咳。」我道。





「我地都唔怕被捕！政府拉得一個，拉唔曬我地全部咁多人！」在場的一位青年激昂地說著，隨即人人和應。

「依家我地需要搵個地方俾建港休息，不如你地先去開路，我地入去舊立法會再從長計議。」

「好！」

在一班熱血青年掩護下，建港聯同過千名社運人士進入了舊立法會。

「沈婷，外面情況點樣？」

「好混亂，幾個領袖帶住過萬群眾同警察對峙。外面火光熊熊。」

「哈，只要守得住今晚，我諗我地可以逼到政府上談判桌。」

就在在場一片歡呼聲之際，幾個青年在門外衝入黎，不斷在大呼小叫。





「解放軍出動喇！解放軍攻緊黎喇！！」

場內一片震撼，各人各自流露難以置信的面色。

「咩事。你地慢慢講。你消息係邊度黎？」沈婷十分冷靜。

「九龍果邊傳過黎咖！有人係九龍見到昂船洲軍營有解放軍行動，裝甲車同快艇都出動左，佢地冒死衝過西隧防線過黎呢邊彙報！」

「佢地要殺死建港！」

我不禁捉緊沈婷隻手，我從未想到政府會出動解放軍。死亡離我好近，亦都離我們一班人好近好近。

「屌佢老母！估唔到班狗官真係癲既！我地出去同佢死過！」輝仔好憤怒，佢說了我心中想說的說話，尤其是那句屌佢老母。





「你憑咩同人死過？你有槍咩？你可以赤手空拳對抗一個連？」沈婷的說話充滿埋怨與倔強。

「你怪我嗎？」

「唔好嘈喇，我地諗諗辦法點樣可以拖到聽日啦。如果聽朝新聞一出街，情況可能會逆轉。」我思緒好混亂，但我相信如果動亂超過一日，中共一定會被逼讓步。又或者更多人站起來。

「無用咖。」遠處傳來一句，說話的是坐在一角，身穿黑色西裝的七個有色人種其中一個。這群人不知何時出現。他以一口字正腔圓的廣東話續道：「出動解放軍目的只係為左平亂，根本就無談判既餘地。只要殺左你，就可以將呢次動亂推落你呢個港獨份子身上。」

佢一邊說一邊走到我身邊，用眼神向我們一班骨幹掃了一次，然後望著我說：「可唔可以單獨傾兩句？」

我望一望沈婷，她馬上道：「佢依家受左傷，你有提議可以同我地一齊講。」

「如果你有辦法救到建港，你即管講出黎，我地咩都願意做！」輝仔一貫他的衝動性格。

西裝人刻意壓低聲線：「我係別國派過黎的情報人員，我叫沙魯，我任務係黎帶你離開。」





我腦內想到兩件事，一；等解放軍衝進來向我亂槍掃射，我或會成為烈士，但行動肯定失敗。二；我苟且偷生，他日或者可以捲土重來。這是一個兩難的決定。

我只怕，要死的不是我一個。我不知道解放軍會殺多少人。

同一時間，第一批解放軍已經乘坐快艇在大會堂前登陸。

沙魯先開聲：「呢度好快守唔住，我地由秘道上禮賓府再作打算。」

舊立法會大樓和禮賓府之間相傳有秘道相連，是英國人留下來的一個最大防空洞。

「我去通知出面班人，頂佢個肺我地就佔領禮賓府，大不了就將禮賓府變凶宅！」輝仔就是有一股蠻勁，但說話總是不分輕重。

然而， 在他說這句話的那一刻， 我感到莫名的不祥之感。