《我炒咗車之後入廠訓咗四年覺》: 放學後嘅一場雨

####################


自從開咗學之後，我就一直都好忙… 

補課、溫書、補課、溫書、補課、溫書… 

連食飯時間都要蠶食，有時仲要一路食一路補，一路食一路溫… 

我同貓仔嘅相處時間都少咗好多… 



一如以往，今年我揀嘅課外活動依然都係入劇社。 

不過唔同嘅係， 今年負責老師揾咗我做主席！ 

搞錯啊！我仲要搞個A level啊！ 

所以，每一年老師揾幹事，一定都會揾兩個主席，一正一副。 

今年就揾咗5C班果個何子鈞。 



冇錯，佢的確係好靚仔…不過我都係對佢冇興趣。 

我已經有自已鐘意嘅人。 

不過，自從佢同我都做咗主席之後，我地個劇社就多咗好多師弟妹… 

係喎…大家都當咗我係女神，同時呢個啊鈞好似都有唔少女fans嫁喎… 

至少小息嗰陣，啊鈞坐果張枱一定坐滿哂女仔；情人節，佢收嘅朱古力一定多過其他同學；佢打籃球果陣，場邊觀眾都會以女仔佔多數… 



大概因為咁掛？ 

哈哈！(苦笑)


====================


十月初，天色依然都係烏雲密佈。 

貓仔話佢架車刮花咗，入咗車房。咁今日應該要搭地鐵返學啦… 

好耐冇搭過巴士返學。返學途中，由行去巴士站到學校門口嘅路程，我周不時都feel到對頭嘅男仔將目光打錯我身上，有明目張膽嘅，亦都有用眼角嘅偷望… 



不過，我一早就慣咗嫁喇…好多同學都話我係校花、女神。我自已係咪呢，我就唔知、唔comment啦，不過由其他男仔嘅目光，我都估係嫁喇… 

烏雲最後都係裝唔住啲雨水。臨近放學… 

"沙沙沙…！！" 

呃！大獲啦！ 

唔記得今日會落雨添！ 

我把後備遮好似琴日返去果陣用咗，冇帶返嚟添！ 

死火！ 

最衰陳sir又遲咗放…如果佢一早肯準時放，或者我趕得切去到巴士站… 



不過上到車又點？如果準時放，我都一定趕唔切喺落雨之前返到屋企樓下… 

怨嚟都嘥氣！ 

打鐘之後4個字，陳sir先至放行… 

行到學校近門口，我見到貓仔，於是一心諗住叫佢等埋我… 

點知我望一望佢隔嚟…係一個女仔嘅背影。我見到佢地講咗幾句，唔知佢地講乜，之後個女仔就同貓仔走咗。 

呢個女仔好面善… 

啊！！記得啦！ 



開學日放學，貓仔有車埋佢嫁，好似叫結衣… 

之後…佢就同個女仔一齊走咗，叫都叫唔到，喺大雨之中慢慢變濛。 

貓仔又掛住追其他女仔，唔理我啦… 

咁點樣？ 

等囉！ 

"咦？啊晴？"

我擰轉頭望一望，係啊鈞。 

啊鈞：你仲未走嘅？冇帶遮？ 



我：嗯…我好大頭蝦啊，係咪啊？ 

啊鈞：呢啲經歷我都試過，所以都冇乜嘢嘅… 

我：嗯… 

啊鈞：我遮埋你吖，你住邊？ 

我：柴灣啊。 

啊鈞：我住小西灣，一齊吖！ 

咁大雨…一齊行好過喺度等吖！ 

我：好啊，唔該哂！ 

啊鈞笑笑：my pleasure！ 

我會心微笑一下。 

喺巴士站冇幾遠，我隱約見到貓仔同結衣上車… 

貓仔幫結衣攞袋，仲要捉住結衣隻手！ 

你會明白我嘅心情嗎？ 

但係我冇張自已嘅心情宣之於臉。 

啊鈞：唔好追，我地等下架。 

之後嚟咗架8X。師傅揸車嘅速度好快，冇耐就到咗我落車個站。 

啊鈞：我送埋你返去屋企樓下吖！ 

我：吓…你未到喎！ 

啊鈞：得嫁喇，之後我可以行返去，快嘅話10-15分鐘路程，我ok… 

我：嗯，咁唔該哂你… 

啊鈞對女仔原來都幾體貼喎… 

我估，做佢嘅女朋友應該會好幸福。 

佢比人嘅感覺係對人好體貼入微果種，同貓仔果啲唔同。 

對比返貓仔，貓仔比人嘅感覺就係好識保護人嘅。