《我炒咗車之後入廠訓咗四年覺》: 呷醋
####################
咦？今日係貓仔生日喎！
就暫時放低本書一陣先啦。
往年我都會為佢整一個牛奶蛋糕。我知佢好鐘意食，因為佢次次都會話個蛋糕好正，最鐘意食我親手整嘅蛋糕。
每一次聽到，我個心都會好甜，因為係我最鐘意嘅人讚我整得好。
好啦…今年都整返件先！
之後就會一齊食飯。呢個係我地每年嘅慣例。
至於禮物嘛…都買好嚕。我幫佢買咗一件絕版模型。佢之前話好想要，但係又揾唔好。好彩我有個friend讓出嚟，仲駛咗我唔少積蓄啊！
不過，我望一望個雪櫃先發覺…
唔夠忌廉！
好啦，咁落去附近商場嘅材料鋪買啦。
點知一落到去就見到有張紅紙寫住…
"東主有喜，休息一天"
…
東主你遲一日先有喜好嗎？
死喇…呢度附近仲有冇材料鋪呢？
我唔係好記得。
呢個時候我見到隔嚟鋪頭個老闆行出嚟…
我：老闆！我想問呢度附近仲有冇地方賣蛋糕材料啊？
老闆：有啊！喺上面茶記後門對出條街，你上去睇睇吖！我唔肯定佢有冇開…
吓？唔係冇開啊嘛？！
我：好，唔該…
我上去望一望…啊，好彩有開！
====================
老闆：多謝你40蚊！
我：哦！等等…
老闆：收你40，多謝哂！
之後，我行去茶記後門，打算穿過茶記出返商場。
點知比我見到…
我見到貓仔喺一個卡位度溫緊書…
同結衣一齊！
我仲見到貓仔同結衣個頭，痴得好埋！
呢個時候貓仔咁啱抬高頭，見到我。
貓仔：嗨！咁啱嘅？
我：嗨…係啊…
貓仔：咦？你買咩嚟？
佢指指我個膠袋。
我：喔…係忌廉。
貓仔：哦…
我強顏笑一笑 ：我唔阻你地，走先喇！
貓仔：嗯，拜拜！
我離開果陣，仲聽到結衣問貓仔今晚食唔食飯…
喂！係我約好佢食飯先嫁喎！
不過，我又係佢邊個？我又唔係佢女朋友，憑乜嘢管佢？
已經冇咩心機再繼續整落去喇。不過既然都開咗頭，惟有繼續。
但係，我就係整唔出以前嘅味道。
####################
我：啊？啱啱你話出嚟食飯？
結衣：係啊。
我：今晚唔得喎，我約咗人。
結衣：哦，好喇…
我同結衣溫到6點半左右就送佢走，因為我仲有下一場飯局。
我：喂，結衣，我走喇，之後有嘢做…
結衣：哦…吖，有啲嘢送比你。
我：哦？做咩送嘢比我？
結衣：你生日吖嘛！
我：你又知嘅？
結衣：我有你Facebook嘛！
我：吖…係喎。
結衣喺佢個袋度攞咗個電話殼出嚟。
結衣：嗱，呢個。
我：啊…好靚啊個電話殼。多謝！
####################
7點左右，貓仔終於過嚟屋企。
我仲以為佢溝女溝到唔記得嚟。
貓仔：嗨！我嚟喇！
我：溝完女喇？！仲以為你會放飛機添！
貓仔：咩溝啫？係佢揾我補習。
我：但係你補習補得好sweet sweet喎…
貓仔：咩補習補得好sweet sweet啊？
我：你地啱啱痴得好埋啊，仲唔係有嘢？
貓仔：冇嘢啊。
係咪啊？
貓仔：係喎，你係咪整咗蛋糕？
我：你又知我整咗？你唔比我今年冇整啊？
貓仔：你對我咁好，實有整嘅。
我：唉…你等等我啦…
我入咗廚房攞個蛋糕出嚟。
貓仔：哇！係我最鐘意嘅牛奶蛋糕啊！多謝哂！等我試吓先…
我試咗一啖佢嘅蛋糕…
貓仔：咦？淡咗？
我：sorry啊…今日我狀態冇咁好…
貓仔：定係有嘢唔開心影響到你？我記得有人話過心情好唔好都會影響到甜品嘅質素嫁喎…
我：我…冇嘢啊！
我心情唔好都係因為你啊！你知道嗎？
####################
奇怪…做乜今日晴晴嘅心情好似好差咁嘅？
乜我今日有踩親佢條尾咩？
啊…係因為啱啱佢見到我地果陣以為我地拍拖，葡萄到佢心情唔靚嗎？
睇嚟佢真係誤會咗。
我：我同結衣真係冇嘢嫁…
晴晴：你地有嘢定冇嘢…都唔關我事啦！
喔？晴晴講埋哂啲咁嘅說話嘅？
好熟…喺邊度聽過定見過？
啊…記得喇。
係啲愛情小說，女主角呷醋果陣嘅對白！
唔通佢…
我：咁嘅反應嘅？呷我醋嗎？
晴晴：咩…咩呷醋啊…食蛋糕啦！