#################### 


12月初,我地嘅劇團喺話劇比賽入面攞咗冠軍。因此,嚟緊我地會再有一次演出。 

無疑呢件事係好開心嘅,但係有一點就令我有啲失落… 

就係,個日期係喺… 

12月24號,平安夜。 



我仲想今年可以同上年一樣,同貓仔出嚟影吓啲燈飾。 

而且,今次嘅演出場地都好遠… 

屯門大會堂。 

唉… 

不過,我手上有兩張入場飛,我想請埋貓仔嚟睇我做話劇。 



之後再同佢去食糖水,都唔錯吖… 

原本我想請埋啊媽嚟,但係啊媽佢果日又做夜更。 

咁多出果張飛…比佢請朋友一齊啦… 

==================== 

今年嘅聖誕聯歡好特別,因為應該就係我地喺中學嘅最後一次聖誕聯歡。 



…不過都唔會有人想出年再嚟一次嫁啦,下話? 

今年我地班嘅男仔真係玩得好癲… 

佢地係咁捉啲男同學埋去打開咗嘅班房門口,之後打横抬起佢成個人,擘開佢大脾就將大脾中間位置撞落門度,仲要"一、二、一、二"咁齊心做… 

玩完我地班嘅人就跑去玩隔離班…不過佢地都係玩男仔啫… 

真係睇落都覺得痛…好彩我係唔係男仔啫… 

食完班上面嘅嘢食,我就攞住兩張飛去揾貓仔… 


####################


呢個時候,班房裏面分成幾類人。 

打機嘅圍埋一堆。 

Happy corner同食花生嘅一堆。 

有啲就獨家村自私食。 

"喂張智霖!有人揾你!" 

我:大佬!我唔識唱歌嫁! 

我聞聲一邊回應一邊行出去。 

我:喔?晴晴? 



晴晴:貓仔~平安夜得唔得閒啊? 

我:我都冇拍拖,你話呢? 

晴晴:我果日喺屯門大會堂有話劇做啊,我想請你去睇… 

我:話劇? 

晴晴:嗯… 

我:咁既然你有份做,我點可以唔支持吓呢? 

晴晴:即係你會去?太好喇…另外呢度有多張飛,你請朋友去吖! 



我:好啊! 

晴晴:咁…我返上去先喇。 

==================== 

我食食吓嘢,結衣又走嚟揾我。 

結衣:chilam…24號夜晚你得唔得閒啊? 

我:24號…平安夜啊…我夜晚唔得。 

結衣:吓…夜晚唔得啊…等我仲諗住約你出嚟添… 

我:我有人請我去睇話劇啊…吖!我仲有多一張飛。唔介意嘅話,一齊? 



結衣:話劇?!正啊!我去! 

我:咁就好喇,我代人地唔該哂你啊… 

結衣:唔該我? 

我:人地有多張飛,冇人要,咁咪比我請人去囉… 

結衣:喔… 

我:話劇9點開始,咁我地就6點喺你屋企樓下個巴士站等啦。 

結衣:ok… 

==================== 

白色黑裙邊嘅AE86駛上東區走廊,然後無視車速限制,愈開愈快… 

結衣:你揸得咁快,睇住啊! 

我:你放心啦,我揸過咁多次。 

累積半年有多嘅駕駛經驗,我已經習慣喺高速公路駕馭呢隻野馬,只有遇上攝影機先收歛一下。 

不過話時話,乜啲女人唔係鍾意男人揸靚跑車嫁咩?跑車係咁快嫁啦… 

我:係呢,想唔想食你鄉下嘅日本嘢? 

結衣:日本嘢?去邊食啊? 

我:元朗。果度有一間日本嘢,又抵又好食! 

結衣:吓?我地唔係去屯門咩?屯門食好似方便啲… 

我:我有車嘛,食完揸去果度咪得囉… 

結衣:吖…又係!


==================== 


我:我要一個蟹籽沙津,一個炸蠔圈。結衣你仲有冇嘢想要? 

結衣:我要一磅三文魚刺身,一碗中華冷麵,四件三文魚壽司,仲有… 

我:喂…你再叫落去就食唔哂嫁喇… 

結衣:我個胃裝得落喎! 

我:叫咗刺身冷麵先啦,呢度啲嘢份量好大嫁。 

結衣:咁啊…要住刺身同冷麵先啦。唔該哂。 

我:哈…睇嚟我帶咗隻豬入嚟喎! 

結衣:咩話?! 

我:冇嘢啦!食咁多小心變肥豬啊! 

等嘢食冇嘢做,我就碌吓WhatsApp啲group。 

結衣:係呢,你放假果陣係咪成日都揸小巴嫁? 

我:唔係啦,係果次佢唔夠人手之嘛! 

結衣:喔… 

我:唉!佢有幾條線要行大潭,又唔係易行,果次之前練咗成晚啊! 

結衣:咁咪好辛苦囉! 

我:係辛苦嫁!真係伯母你好! 

呃…對住女仔,我廢事爆粗啦。 

但係佢仲要問:伯母你好?咩意思? 

我:唔好嘅說話,你唔知會比教較好。 

結衣:哦…講啦講啦… 

我:你真係想知? 

結衣:嗯! 

我:咁你伸個頭嚟吖。 

結衣好聽話照做。 

我喺佢耳邊細細聲講:屌你老母。 

結衣:哦!!你講粗口!! 

我:係你話想知嘅! 

過咗一陣,三文魚壽司就上枱,我梗係先下手為強,揀舊三文魚最靚嘅先啦。 

點知結衣又一次同我夾中同一舊! 

我:哈!又會咁啱嘅? 

結衣:係囉,咁啱嘅? 

我:算喇,呢舊讓比你。 

結衣:多謝哂~ 

我:遲早食肥你! 

結衣:咒人肥嘅!黑心啊你!

已有 0 人追稿