[情人節限定短篇] 餐肉煎蛋飯，毒撚既午餐: 第一章：餐肉煎蛋飯
有時當你覺得食開既野食味道唔同咗，並唔係你既味覺或者食物出現問題，而可能係心情唔同既關係…
由學生時代開始，我就好鍾意食餐肉煎蛋飯。煎得帶點脆的數片餐肉，加上兩隻脆邊既太陽蛋，淋上甜豉油，色香味誘人。用枝匙羹整穿個蛋黃之後開始撈飯食，時而整少少餐肉送飯，好快就食完令人滿足既一餐，跟住返學打波上堂都零舍有精神。就算出到黎社會工作，lunch時都間唔中去搵間茶記食返一餐半餐。
但係社會做野既世界唔同，啲OL同事又要食得健康，再唔係就要環境乾淨，對我間中幫襯既茶記往往嗤之以鼻，年輕既男同事們自然為了各種原因對佢地多多遷就，自自然然一星期總有些日子係我一條毒撚享受孤獨的午餐。話孤獨，其實毒撚又點會怕孤獨。一個人拎住部電話唔係扮工程師就係玩game，不知幾充實。要知道，返工時間邊有咁多時間開game打怪，靠去廁所玩得咁密人地都以為你腎虧啦。
世事難料，轉過一兩份工之後，小毒撚既生命出現咗少少變化。
某年某月加入咗間新公司，老細係外國人，一年無幾次係香港，香港寫字樓加埋我基本上都係得五個人，其中兩個sales仲要係成日唔見人，變相得番我，人事部C9同一個比我仲年輕既女會計同事。
話說位C9基本上日日帶飯，除咗第一日返工公司請食飯同聖誕新年等會出去一齊食之外，佢都係用CCTVB送叮飯渡過lunch。變相我成日都同個女會計同事食飯，以下為方便計，我叫佢E小姐。
E小姐性格同佢外表一樣非常爽快，不多加修飾既一把長直黑髮，淡妝甚至素顏返工，食野方面又無咩特別要求，只係太貴既都唔會去食，所以同佢搵地方食飯都無咩壓力。而且佢都鐘意打機，慢慢地比我毒到佢同我打同一隻game，所以彼此之間多咗共同話題，食飯時間好多時都係度一齊打機、上網搵攻略同交流心得。後來終於比我係新公司附近搵到間唔錯既連鎖茶記，最重要係佢個餐肉煎蛋飯真係好得：厚切餐肉仲要熱到入心，足雙蛋而且堅脆邊。自此之後我地一星期總有兩三日去幫襯。
慢慢地E小姐發現咗我每次去果間茶記都淨係嗌餐肉煎蛋飯黎食，有次佢終於忍唔住問我：
「你唔悶既咩？次次黎都嗌餐蛋飯？」
「鐘意咪唔會悶囉。」我邊整穿隻蛋黃邊答佢。
佢笑笑口咁搖搖頭，一副無可奈何既表情咁，之後突然佢一下拎起枝羹舀起咗我撈好晒蛋汁同豉油既飯黎食，仲一臉滿足咁話又幾好食咁。自始之後佢次次都趁我岩岩撈好晒蛋汁同豉油既時侯舀一啖飯黎食，而我亦從此唔使再一人獨享一碟餐肉煎蛋飯。